21:45, 04 - جەلتوقسان 2020 | GMT +6
نۇر-سۇلتانداعى سپورت كەشەندەرىنىڭ بىرىنەن قالتا ۇرىسى ۇستالدى
نۇر- سۇلتان. قازاقپارات - استانالىق پوليتسيا قىزمەتكەرلەرى جەدەل-ىزدەۋ شارالارى كەزىندە 28 جاستاعى ەلوردا تۇرعىنىن قولعا ءتۇسىردى، دەپ حابارلايدى قازاقپارات نۇر-سۇلتان قالالىق پوليتسيا دەپارتامەنتىنىڭ باسپا ءسوز قىزمەتىنە سىلتەمە جاساپ.
تەرگەۋ بارىسىندا كۇدىكتىنىڭ ءوزى جاتتىعاتىن سپورت كەشەندەرىنىڭ بىرىندە، كيىم ىلەتىن ورىننان كۇرتەشەنىڭ قالتاسىندا تۇرعان «ايفون» ماركالى ۇيالى تەلەفونىن قولدى قىلعانى انىقتالدى. ۇرلانعان زاتتىڭ سوماسى 200 مىڭ تەڭگەنى قۇرايدى.
قىلمىستىق ىسكە قاتىستى ق ر ق ك 188-بابى («ۇرلىق») بويىنشا سوتقا دەيىنگى تەرگەۋ ءجۇرىپ جاتىر. ۇيالى تەلەفون تاركىلەنىپ، يەسىنە قايتارىلدى.
ونىڭ ەلوردا اۋماعىنداعى وسى سەكىلدى وزگە دە قىلمىستارعا قاتىسى بار-جوعى تەكسەرىلىپ جاتىر.
نۇر-سۇلتان قالاسىنىڭ پوليتسيا دەپارتامەنتى ازاماتتاردى اسا مۇقيات بولىپ، قۇندى زاتتاردى قاراۋسىز قالدىرماۋدى سۇرايدى.