ادەبي «التىن توبىلعى» بايقاۋىنىڭ جەڭىمپازدارى انىقتالدى

مەيىرىمدى وياتار اسەرلى وقيعا، قىزىقتى جايت، جۇرەك تەبىرەنتەر حيكايا، جالىندى ولەڭدەر.

«التىن توبىلعى» ادەبي بايقاۋىنا قاتىسقان جاس اقىن-جازۋشىلاردىڭ شىعارمالارىن وسىلاي سيپاتتاۋعا بولادى.

بايقاۋعا نۇرسۇلتان نازاربايەۆ قورى مۇرىندىق بولعان، بۇل بيىل التىنشى رەت ءوتتى. جوبا جىل سايىن شىعارماشىل جاستاردىڭ نازارىن اۋدارىپ، قالامىنىڭ ۇشتالۋىنا شابىت بەرىپ كەلەدى.

پاندەمياعا بايلانىستى بيىل بايقاۋ جەڭىمپازدارى ونلاين تۇردە جاريالاندى.

نۇرسۇلتان نازاربايەۆ قورىنىڭ اتقارۋشى ديرەكتورى قانات جۇمابايەۆ ءىس-شارانىڭ اشىلۋ سالتاناتىندا: «التىن توبىلعى» - جىل ساناپ تانىمال بولىپ كەلە جاتقان جوبانىڭ ءبىرى. 2015-جىلى بايقاۋعا 120 شىعارما قاتىسسا، بيىل قازاقستاننىڭ تۇكپىر-تۇكپىرىنەن 161 تۋىندى باق سىنادى.

ءار اۆتورعا بايقاۋعا قىزىعۋشىلىق تانىتقانى ءۇشىن، ەرەكشە شىعارمالارى ءۇشىن العىس ايتامىز»، - دەدى.

بايقاۋ جەڭىمپازدارى:

- «جىلدىڭ ۇزدىك پوەزياسى» نوميناتسياسىندا - جانىبەك ءاليمانوۆ، قاراعاندى قالاسى («دالا جىرلارى» شىعارماسى)؛

- «جىلدىڭ ۇزدىك پروزاسى» - تۇركىستان قالاسىنان كەلگەن باقىتبەك حادىر («ماجۋسيلەر»)؛

- «جىلدىڭ ۇزدىك بالالار شىعارماسى» - ەسەمانوۆ حاميت، تاراز قالاسى («كۇننەن كەلگەن باتىر»)؛

- «جىلدىڭ ۇزدىك دراماتۋرگياسى» - الماتى وبلىسىنان كەلگەن مۇرات قولعانات («كۋاگەر»).

بۇل جەڭىمپازداردىڭ ءارقايسىسى 2 ميلليون تەڭگەدەن الدى.

قازىلار القاسىنىڭ مۇشەلەرى «ابايدىڭ 175 جىلدىعىنا ارنالعان شىعارمالار» ارنايى سىيلىعىنىڭ جەڭىمپازىن انىقتاۋ بارىسىندا سىيلىقتى ەكى اۆتورعا تاعايىنداۋدى ءجون دەپ تاپتى.

ولار - الماتى قالاسىنان ۋمتىل زاقان («شىڭعىستاۋ ءمىنجات. حاكىم» شىعارماسى) جانە باعاشار تۇرسىنباي ۇلى («جاس اباي») ءارقايسىسى 1,5 ميلليون تەڭگە كولەمىندەگى سىياقى الدى.

«التىن توبىلعى» بايقاۋ جەڭىمپازدارىن انىقتاۋ سالتاناتىن ءبىزدىڭ YouTube ارناسىنان كورۋگە بولادى. سىلتەمە پروفيلدە كورسەتىلگەن.