ول كەزدە ناديا وتىزدا ەدى

بۇل كىسى وزگە ۇلت وكىلدەرىنىڭ ىشىندە قازاق ونەرىن قادىرلەۋدىڭ ەتالونىنا اينالعان ساناۋلى ءسوز ساڭلاعىنىڭ ءبىرى ەكەنىن مۇقىم قازاق مويىنداعان.

جوعارىداعى سۋرەتتى تۇسىرگەن بولات وماراليەۆ بولاتىن.

«ەگەمەن قازاقستاننىڭ « بەلدى جۋرناليستەرىنىڭ ءبىرى ارمان وكتيابردىڭ مەرەيتويلىق سۇحباتى «نادەجدا اپاي، 80 دەيتىن بەلەستىڭ بيىگىندەسىز. ەسەنقۇل ءىنىڭىز ايتقانداي، تىرشىلىكتە ادام شىركىن قاشقانعا دا، قۋعانعا دا ىلەسىپ، جاقسىنى دا، جاماندى دا كورەدى. قولىڭىزعا دومبىرا ۇستاعان مونشاقتاي كۇنىڭىزدەن الاشتىڭ ايالى الاقانىندا كەلەسىز. اسقان اسۋ، اتتاعان بەلەس، ءجۇرىپ وتكەن جولىڭىزعا وسى بيىكتەن كوز تاستاعاندا نەنى كورەسىز؟» دەگەن ساۋالىمەن ورىلگەن ەكەن.

ونەگەلى ونەر يەسى: «اسپانكوڭىل قازاقتىڭ اپپاق نيەتىن كورەم. زاۋ بيىكپەن استاسقان اسقار شىڭدارى بار سالقار دالانى كورەم. الاتاۋداي ايبىندى، الاكولدەي ايدىندى حالقىمدى كورەم. الاقانىنا سالىپ، قۇشاعىن اشقان، كوڭىلى تاۋ بۇلاعىنداي تازا اقەدىل اعايىندى كورەم. قادىرى التىننان بيىك قارانار اعالاردى، تەكتىلىكتى تۇمار ەتكەن اياۋلى انالاردى كورەم. مىنە، وسىلار مەنىڭ ونەرىم مەن ءومىرىمدى ورگە سۇيرەدى، باسىمدى تورگە سۇيرەدى، جىعىلعاندا جانىما جالاۋ بولدى. اتىمدى بايگەدەن كەلتىرىپ، اقىنىم دەپ ارقامنان قاقتى. اق تىلەگىن اياعان جوق. اللا اۋزىما ءسوز سالىپ، باسىما باق قوندىرسا، قانداي دا ءبىر بيىككە جەتكەن بولسام، ارمانى بيىك ادامداردىڭ اق-تىلەگىنىڭ شاراپاتى دەپ بىلەم»، دەگەن ەكەن.

ەندەشە، الەۋمەتتىك جەلىدەن وسىدان 50 جىل بۇرىن تۇسىرىلگەن جانى سۇلۋ اقىننىڭ سيرەك سۋرەتىن تاۋىپ، ونىڭ سىرىن وقىرمانمەن ءبولىسىپ وتىرعان جايىمىز بار.

- بۇل سۋرەتتى 1970 -جىلى ءتۇسىرىپپىن. وزىمدە 50 جىل ساقتاعان ەكەنمىن.

ومىردە قىزعانشاق ەمەسپىن، ءبىراق ءوز فوتوونەرىمە كەلگەندە قىزعانشاقپىن. ايتىسكەر جانە جازبا اقىن نادەجدا اندرەيەۆنا لۋشنيكوۆا قازاقتىڭ ورتاسىندا، اۋىلدا تۋىپ- وسكەن، قازاقى تاربيەلەنگەن دارىندى قىز. مەكتەپتى دە، جوعارى وقۋ ورنىن دا قازاقشا بىتىرگەن. بۇل سۋرەتتى ناديا قىزىلوردا پەداگوگيكالىق ۋچيليشەسىندە وقىپ جۇرگەندە ءتۇسىرۋدىڭ ءساتى كەلىپتى.

- الماتىدان اسەت بەيسەۋوۆ پەن تۇمانباي مولداعاليەۆ ەكەۋى كەلىپ، پەدۋچيليشەدە وقىرماندارىمەن، ستۋدەنتتەرمەن كەزدەسۋ كەشى ءوتتى. سوندا باسقا دا اقىن قىزدارمەن بىرگە ولەڭ وقىدى. ينتەرنەتتى قاراسام، ناديا قازاق پەداگوگيكالىق ينستيتۋتىن 1969 -جىلى ءبىتىرىپتى. ءوزى ءبىراز وقىپ كەتكەن پەدۋچيليشەدە دە مۇعالىم بولدى دەپ ەستىگەنمىن. ال سۋرەتتى 1970 -جىلى ءتۇسىردىم. سوندا ناديا 30 جاستا ەكەن، - دەيدى قىزىلوردالىق ارداگەر فوتو ءتىلشى بولات وماراليەۆ.

«سول كۇنى ەسىمدە، تۇمانباي جاڭا ولەڭدەرىن وقىدى. اسەت جاڭا جازىلعان «التىنىم» ءانىنىڭ وسى جەردە تۇساۋىن كەسىپ، تۇڭعىش رەت ورىنداپ جاتقانىن ايتتى. كوپ نارسە ەستە قالماپتى، قايتا تۇمانباي مەن اسەتتىڭ كەلگەنىن ۇمىتپاعان ەكەنمىن»، دەپ ەسكە الادى شىعارماشىلىق قورجىنى قازىناعا تولى بايىرعى فوتو ءتىلشى.