ساپارحان وماروۆ جەر ماسەلەسىنە قاتىستى وزەكتى پروبلەمانى اتادى

بۇل تۋرالى ۇكىمەت وتىرىسىندا ق ر اۋىل شارۋاشىلىعى ءمينيسترى ساپارحان وماروۆ ايتتى، دەپ حابارلايدى قازاقپارات ءتىلشىسى.

«جەر قاتىناستارى بويىنشا ەل باسشىلىعى حالىقتىڭ جەر رەسۋرستارىنا قولجەتىمدىلىگىن قامتاماسىز ەتۋ ءۇشىن ءبىرقاتار ناقتى تاپسىرمالار بەردى. جەر قاتىناستارىن باسقارۋدىڭ بازالىق قۇرالى مەملەكەتتىك جەر كاداسترىنىڭ اۆتوماتتاندىرىلعان اقپاراتتىق جۇيەسى بولىپ سانالادى. وندا جەر ۋچاسكەلەرى بويىنشا ەلەكتروندىق فورماتتا 6,5 ميلليون مالىمەت، ونىڭ ىشىندە توپىراقتىق، گەوبوتانيكالىق جانە اۋىل شارۋاشىلىعى كارتالارى ساقتالادى. حالىققا جەر قاتىناستارى سالاسىندا كورسەتىلەتىن ەلەكتروندىق مەملەكەتتىك قىزمەتتەردىڭ 15 ءتۇرىنىڭ 12 ءسى وسى جۇيە ارقىلى كورسەتىلەدى. جەر قاتىناستارى سالاسىنداعى وزەكتى پروبلەمالاردىڭ ءبىرى جەر ۋچاسكەسىن الۋ كەزىندەگى كەزەككە قويۋدى تارتىپكە كەلتىرۋ بولىپ وتىر. 2021-جىلدىڭ ءبىرىنشى توقسانىنىڭ سوڭىنا دەيىن جەر ۋچاسكەسىن الۋ ءۇشىن كەزەككە قويۋدى اۆتوماتتاندىرۋدى اياقتاۋ جوسپارلانۋدا»، - دەدى ساپارحان وماروۆ.

ونىڭ ايتۋىنشا، قازىرگى ۋاقىتتا اۋىل شارۋاشىلىعى مينيسترلىگى جەردى سيفرلاندىرۋ ماسەلەلەرى بويىنشا سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىمەن بىرلەسىپ جۇمىس جۇرگىزىپ جاتىر.

«2020-جىلدىڭ سوڭىنا دەيىن 26 ميلليون گەكتار الاڭدا توپىراقتىق، 25 ميلليون گەكتار الاڭدا گەوبوتانيكالىق، 6,5 ميلليون گەكتار الاڭدا اۋىل شارۋاشىلىعى كارتالارى ازىرلەنەتىن بولادى. 2021-2022-جىلدارى توپىراقتىق جانە گەوبوتانيكالىق كارتالارمەن قامتۋدى 40 ميلليون گەكتارعا دەيىن، اۋىل شارۋاشىلىعى كارتالارىمەن قامتۋدى 33,2 ميلليون گەكتارعا دەيىن ۇلعايتۋ جوسپارلانعان. قازاقستان رەسپۋبليكاسىنىڭ اگروونەركاسىپتىك كەشەنىن دامىتۋدىڭ 2022-2026-جىلدارعا ارنالعان مەملەكەتتىك باعدارلاماسىن ازىرلەۋ اياسىندا سيفرلىق اۋىل شارۋاشىلىعى كارتالارىمەن بۇكىل كولەمدى قامتۋ جوسپارلانعان»، - دەدى مينيستر.