گەرحارد شرەدەر: نۇرسۇلتان نازاربايەۆ ءازىل ارالاستىرىپ سويلەپ وتىراتىن

None
None
نۇر-سۇلتان. قازاقپارات - گەرمانيا فەدەراتيۆتى رەسپۋبليكاسىنىڭ بۇرىنعى فەدەرالدى كانتسلەرى گەرحارد شرەدەر نۇرسۇلتان نازاربايەۆپەن ەڭ العاش رەت 2001-جىلى 1- قازاندا كەزدەسكەن ەكەن.

نازاربايەۆتىڭ سول كەزدە گەرمانياعا مەملەكەتتىك ساپارمەن كەلگەن كەزى. ءدال سول جىلعى 11- قىركۇيەكتە نيۋ-يوركتەگى تەرروريستىك اكتىنىڭ سالدارىنان الەمدەگى ساياسي احۋال ەداۋىر كۇردەلەنىپ تۇرعان بولاتىن، دەپ حابارلايدى قازاقپارات ءتىلشىسى.

«ول تۇستا قازاقستاننىڭ دا، گەرمانيانىڭ دا الدىندا تەرروريزم قاۋپىنە قارسى ورتاق مىندەت تۇرعان ەدى. جالپى نۇرسۇلتان نازاربايەۆتىڭ تەرروريزمگە قارسى كۇرەسكە حالىقارالىق دەڭگەيدە كۇش سالعانى ءمالىم. ودان بۇرىن دا نازاربايەۆتىڭ ورتالىق ازياداعى بەيبىتشىلىك پەن تۇراقتىلىقتى قامتاماسىز ەتۋگە باعىتتالعان باستامالارىنان حابارىم بار-تىن. قازاقستان تاۋەلسىزدىك الماس بۇرىن ول اتوم قارۋىنان باس تارتىپ، ايماقتىق جانە جاھاندىق دەڭگەيدەگى قاۋىپسىزدىككە زور ۇلەس قوستى. مەن ونىڭ بۇل باستاماسىن قاتتى باعالايمىن، ويتكەنى بۇل شىنىندا دا قۇرمەتكە لايىق»، - دەيدى ول.

نەمىستىڭ قوعام قايراتكەرى ءا دەگەننەن ەلباسىمەن ويى ءبىر جەردەن شىعىپ وتىرعانىن ەسكە الادى.

«ول كىسى ءازىل ارالاستىرىپ سويلەپ وتىرادى ەكەن. ءبىراق سونىمەن قاتار نازاربايەۆقا سەنۋگە تۇرارلىق ادام ەكەنىن ۇعا باستادىم. ەگەر ول «ءيا» نەمەسە «جوق» دەسە، ونىڭ ايتقانى ەكىۇشتى ماعىنا بىلدىرمەيتىن. وسى قاسيەتى ءالى بويىندا ەكەنىن اتاپ ءوتۋ كەرەك»، - دەپ ەسكە الادى وتكەن شاقتى ەكس-فەدەرالدى كانتسلەر.

گەرحارد شرەدەر مەملەكەت باسشىلارىنىڭ دوستىعى وتە ماڭىزدى ەكەنىن اتاپ وتەدى. سەبەبى باسشىلاردىڭ ءبىر-بىرىنە سەنىمى ءوزارا تۇسىنىستىككە جول اشىپ، حالىقارالىق ساياساتتاعى ۆاليۋتالاردىڭ ءبىرى سانالادى. ەگەر مەملەكەت باسشىلارى ءبىرىن-ءبىرى جاقسى تانىسا، ولارعا جان-جاقتى پوزيتسيالاردى قىسقارتۋعا تولىق مۇمكىندىك بار. ءارتۇرلى مەملەكەتتە ءارتۇرلى پوزيتسيا بار، ءبىراق كومپروميستى قاشان دا تاۋىپ الۋعا بولادى.

«نۇرسۇلتان نازاربايەۆ كومپروميسكە قاشان دا دايىن ادام. ول كىسى كۇش سالماسا، گەرمانيادا عانا ەمەس، قازاقستاندا دا زاڭسىز ەسىرتكى اينالىمىنا قارسى كۇرەستە جەتىستىكتەرگە جەتۋ مۇمكىن بولماس ەدى. ەلدى جاڭعىرتۋ بارىسىن قالاي تالقىلاعانىمىز ءالى كۇنگە دەيىن ەسىمدە. شىنىندا دا، بۇل باعىتتا كەرەمەت ناتيجەلەرگە قول جەتكىزدىك. باتىس كەيدە قازاقستاننىڭ ەرەكشە اشىقتىعىمەن ءارى ءدىني تۇرعىدا ارتۇرلىلىگىمەن ەرەكشەلەنەتىنىن ەسكەرمەيدى. مەن كاتوليكتىك جانە يەۆانگەليستتىك قاۋىمداستىق وكىلدەرىمەن سويلەستىم. ولاردىڭ بارلىعى بىردەي پىكىردە. «قازاقستانداعى ءدىني سەنىم بوستاندىعى ماڭىزدى دەڭگەيدە. مۇنىڭ ءبارى قازاقستاننىڭ تۇڭعىش پرەزيدەنتى ساياساتىنىڭ ارقاسى» دەيدى ولار.

بۇل ەرەكشە قۇرمەتكە لايىق، ويتكەنى مۇسىلمانى باسىم مەملەكەتتەر ءدىني اشىقتىقتىڭ وسىنداي دارەجەسىن كورسەتە المايدى»، - دەيدى گەرحارد شرەدەر.

قازاقستان مەن گەرمانيانىڭ اراسىندا سول كەزدەن باستاپ ەرەكشە قارىم-قاتىناس ورناعان.

توقسانىنشى جىلداردان بەرى قازاقستاننان گەرمانياعا مىڭداعان نەمىس ورالدى. سونىمەن قاتار تاريحي وتانىنا ورالماي، قازاق جەرىن پانا تۇتىپ قالعان نەمىستەردىڭ دە سانى از ەمەس.

گەرحارد شرەدەردىڭ ايتۋىنشا، بۇل - ەلدەگى تۇراقتىلىققا باسا ءمان بەرگەن نۇرسۇلتان نازاربايەۆتىڭ ارقاسى. گەرمانيانىڭ بۇرىنعى كانتسلەرى ساياساتتىڭ وسى باعىتى قاسىم-جومارت توقايەۆتىڭ باسشىلىعىندا دا جالعاساتىنىنا سەنىم ءبىلدىرىپ وتىر.

سوڭعى جاڭالىقتار