قىتاي بيلىگى ەلدەگى بالا تۋۋ كورسەتكىشىن ارتتىرماق

بۇگىنگى تاڭدا كورشى ەلدە 250 ميلليوننان استام ادام 60 جاستان اسقان ەكەن. «ءبىر جانۇيا - ءبىر بالا» زاڭىنىڭ كۇشى جويىلعانىنا 4 جىل بولسا دا، بالا تۋۋ كورسەتكىشى وتە تومەن دەڭگەيدە. بۇعان نە سەبەپ؟

قىتايدا 1949 بەن 1976 -جىلدار ارالىعىنداعى حالىق سانى 540 ميلليوننان 940 ميلليونعا دەيىن وسكەننەن كەيىن جەرگىلىكتى بيلىك بالا تۋۋ سانىن شەكتەگەن بولاتىن. بولجام بويىنشا «ءبىر جانۇيا - ءبىر بالا» ساياساتى ارقاسىندا شامامەن 400 ميلليون بالا دۇنيەگە كەلمەگەن. الايدا حالىق سانى ازايىپ قويماي، ەلدە جۇمىس ىستەۋگە قابىلەتتى ادامداردىڭ سانى دا قىسقاردى. ال 2016 -جىلى بۇل زاڭنىڭ كۇشى جويىلىپ حالىق ەكى بالا تۋۋعا قۇقىلى بولدى.

ما لي - ەكى قىزدىڭ اناسى. ەكەۋىن دە «ءبىر جانۇيا - ءبىر بالا» ساياساتى ءوز كۇشىندە بولعان كەزدە بوساندى. سالدارىنان ەكىنشىسىنە ايىپپۇل تولەۋگە ءماجبۇر بولدى. بۇل شەشىمىنە قازىر ول ەش وكىنبەيدى. دەگەنمەن بالا تاربيەسى وتباسىلىق بيۋدجەتكە وڭاي سوقپايتىنىن ايتىپ وتىر. ماسەلەن، ءبىر بالانى جان- جاقتى دامىتۋ ءۇشىن قوسىمشا ساباقتارعا ايىنا شامامەن 10 مىڭ يۋان نەمەسە 600 مىڭ تەڭگە جۇمسالادى.

ما لي، ەكى بالانىڭ اناسى:

- ماسەلە بالا تۋۋدا ەمەس، ولاردى تاربيەسىنە كەتەتىن قاجەتتىلىكپەن قامتاماسىز ەتۋ. ءار اتا- انا ءوز بالاسىنا ەڭ جاقسىسىن قالايدى عوي. بۇل بالالار اراسىندا دا، ەرەسەكتەر اراسىندا دا باسەكەلەستىككە اكەلەدى. سوندىقتان بولار كوبى بالا تۋۋدان باس تارتۋى مۇمكىن.

جۇرگىزىلگەن ساۋالناماعا سايكەس بالا تۋۋ كورسەتكىشى باسپانا ماسەلەسىمەن دە تىعىز بايلانىستى. قىتايدا سوڭعى جىلدارى جىلجىمايتىن مۇلىكتىڭ باعاسى 60 پروتسەنتكە قىمباتتادى. مىسالى، بەيجىڭدە 3 بولمەلى پاتەر شامامەن 1 ميلليون ا ق ش دوللارى تۇرادى. ءبىراق بالا تۋۋعا كەدەرگى قاراجات قانا ەمەس سىندى.

ۋاڭ جيۋي، ءبىر بالانىڭ اناسى:

- تاعى ءبىر بالا تۋۋ ۇلكەن جاۋاپكەرشىلىك دەپ ويلايمىن. مەن كوپ ۋاقىتىمدى بالاعا ارناۋىم كەرەك. مەنى مازالايتىنى وسى. ويتكەنى بوس ۋاقىتىمدى وزىمە عانا جۇمساعىم كەلەدى.

ساراپشىلاردىڭ بولجامىنشا، 15 جىلدان كەيىن قىتايدا 60 جاستان اسقانداردىڭ سانى 400 ميلليونعا دەيىن جەتەدى. ال عاسىردىڭ ورتاسىندا جۇمىسقا قابىلەتتى حالىقتىڭ قاتارى 200 ميلليونعا قىسقارماق. جاعدايدى وزگەرتۋ ءۇشىن بيلىك تۇرعىنداردى ساياسي جانە قارجىلاي تۇرعىسىندا ىنتالاندىرۋ كەرەك دەيدى ماماندار.

اۆتورلارى: بوتاگوز سىرعابايەۆا، ايگەرىم سۇلەيمەنوۆا

www.24.kz