الماتى زووباعىندا كوشەدەن تابىلعان سيمبا اتتى ارىستانعا جاڭا باسپانا سالىندى

سيمباعا ارنالعان زاماناۋي قورشاۋ «Snow Leopard Foundation» قورىنىڭ قولداۋىمەن سالىندى. ونىڭ جالپى اۋدانى 750 شارشى مەتردەن اسادى. ول ءۇش ايماقتان تۇرادى - ەكسپوزيتسيالىق سىرتقى قورشاۋ، دەمالاتىن ايماق جانە قىسقى بولمە.

ەكسپوزيتسيالىق قورشاۋعا تابيعي ماتەريالدار قولدانىلدى. قۇرىلىسشىلار اعاش پەن تاستى پايدالانعان. سونىمەن قاتار، تەرەڭدىگى 1,5 مەتر باسسەيىن سالىندى. مۇنىڭ ءبارى جىرتقىش اڭ ءوزىن جاقسى سەزىنۋى ءۇشىن جاسالعان. قورشاۋ قۇرىلىسى قىزمەتكەرلەر مەن قوناقتاردىڭ قاۋىپسىزدىگىن بارىنشا ەسكەرە وتىرىپ، حالىقارالىق زووباقتار قاۋىمداستىعىنىڭ ستاندارتتارىنا سايكەس جۇرگىزىلگەن.

«ءبارىمىز دە اقتاۋلىق ارىستاننىڭ ومىرىنە الاڭدادىق جانە سيمبانى قۇتقارىپ قالدىق. ونىڭ ەندى ءوز ءۇيى بار. قورشاۋدى زامان تالابىنا ساي سالعانىمىزعا وتە قۋانىشتىمىز»، - دەيدى «Snow Leopard Foundation» قورىنىڭ وكىلى ءنۇرالي الييەۆ. جاڭا جىلدان باستاپ سيمبا حايۋاناتتار باعىنىڭ مەنشىگىنە بەرىلەدى. ۆەتەرينار مامانداردىڭ ايتۋىنشا، ارىستاننىڭ دەنساۋلىعى جاقسى، ول كەڭ ءارى ىڭعايلى جاڭا ورىنعا اۋىسۋعا دايىن.

«سيمبا ايتارلىقتاي ءوستى جانە ول جاسىنا ساي سالماق قوستى. ول بىرنەشە اي بويى ءبىزدىڭ كارانتين ستاتسيونارىندا بولدى. وسى ۋاقىت ىشىندە ءبىز كەشەندى مەديتسينالىق تەكسەرۋدەن وتكىزدىك»، - دەيدى زووباق ۆەتەرينارى الينا چيميرۋك.

ەسكە سالا كەتەيىك، 25 - ماۋسىمدا ماڭعىستاۋ وبلىسىنىڭ اقشۇقىر اۋىلىنىڭ جەرگىلىكتى تۇرعىندارى كوشەدە جۇرگەن ارىستاندى كورىپ، دابىل قاققان بولاتىن. جىرتقىش جانۋاردى ماماندار ۇستاپ، سيرككە تابىستادى . كەيىن ورمان شارۋاشىلىعى جانە جانۋارلار الەمى كوميتەتىنىڭ باسپا ءسوز حاتشىسى ساكەن دىلداحمەت ارىستاننىڭ تاعدىرى تۋرالى ايتىپ بەردى . 10 - شىلدەدە جىرتقىش جانۋاردى زاڭسىز اسىراعان اقتاۋ تۇرعىنىنا سوت ۇكىمى شىقتى. سيمبا الماتىعا جەتكىزىلدى.

اۆتور: الما مۇقانوۆا