اۋىلداردا بالالاردى شىمىرلىققا باۋليتىن ءداستۇرلى بوكس پەن كۇرەستى دامىتۋ كەرەك - قىرىمبەك كوشەربايەۆ
بۇل تۋرالى «قوعام جانە مەملەكەت: «Birgemiz» - 30 جىلدىق سەرىكتەستىك پەن دامۋ» اتتى IX ازاماتتىق فورۋمنىڭ جالپى وتىرىسىندا ق ر مەملەكەتتىك حاتشىسى قىرىمبەك كوشەربايەۆ ايتتى، دەپ حابارلايدى قازاقپارات ءتىلشىسى.
«ءبىز جاس ۇرپاقتىڭ ءسابي شاقتارىنان مادەنيەت، عىلىم جانە ءبىلىم بەرۋ ۇيىرمەلەرىنە بارىپ، سپورت سەكتسيالارىنا قاتىسۋىنا بارىنشا جاعداي جاساۋىمىز كەرەك. ويتكەنى، بۇل بالالاردى ءوزارا بىرىكتىرىپ، ۇيىمداسىپ تىرلىك ەتۋگە جاقىنداستىراتىن وزىندىك تاربيە مەكتەبى بولماق. جەرگىلىكتى اتقارۋشى ورگاندار ازاماتتىق قوعام وكىلدەرىمەن بىرلەسىپ، بالعىن بۇلدىرشىندەردىڭ تالانتتارىن اشىپ، تالاپتارىن شىڭداۋعا، ولاردىڭ بيىك ماقساتتارعا ۇمتىلۋىنا جول كورسەتۋى ءتيىس»، - دەدى مەملەكەتتىك حاتشى.
سونىمەن قاتار ول جەرگىلىكتى جەرلەردە بيۋدجەتتى قاراستىرعاندا قىمبات سپورت كلۋبتارىنا ەمەس بالالار مەن جاسوسپىرىمدەردىڭ ۇيىرمەلەرى مەن سەكسيالارىنا قاراجات ءبولۋ ماسەلەسىنە كوپ ءمان بەرۋ كەرەكتىگىن باسا ايتتى.
«مۇنان بولەك، ءبىز قاي جەردە تۇراتىنىنا قاراماستان بالالاردىڭ قۇقىعىمەن قاجەتتىلىگى بىردەي ەكەندىگىن ەسكەرۋىمىز كەرەك. سوندىقتان اۋىل مەن قالا بالالارىنىڭ اراجىگىن الشاقتاتپاي ەكەۋىنە بىردەي دەڭگەيدە كوڭىل ءبولىنۋى ءتيىس. ارينە، ەلىمىز كەڭ بايتاق. وڭىرلەردىڭ ءوسۋ مۇمكىندىگى دە ءارقالاي. ايماقتارداعى ۇيىمداستىرۋشىلىق، قارجىلىق، كادرلىق الەۋەت بارىندە بىردەي تەڭ ەمەس. ءبىراق، ءبىز بار مۇمكىندىكتى قاراستىرىپ، ءبىرىنشى كەزەكتە اۋىلدىق مادەنيەت جانە دەمالىس ورىندارىن، سپورت ۇيىرمەلەرىن دامىتۋعا كۇش سالۋىمىز قاجەت. اۋىلدىق جەرلەردە مادەنيەت، دەمالىس جانە سپورت سالالار بويىنشا بارشا ۇعىمدى، يكەمدى ستاندارتتار قالىپتاستىرۋ قاجەت»، - دەدى ول.
مەملەكەتتىك حاتشى تۇرعىلىقتى حالىقتىڭ سانى مەن جەرگىلىكتى بيۋدجەتتىڭ مۇمكىندىگىن سارالاي وتىرىپ، مەملەكەتتىڭ نەمەسە دەمەۋشىلەردىڭ ەسەبىنەن بالالاردى فۋتبول، حوككەي، ۆولەيبول، باسكەتبول سياقتى كوماندالىق ويىن تۇرلەرىنە جاتتىقتىراتىن باپكەرلەردى قىزمەتكە تارتۋ كەرەكتىگىن دە ايتتى.
«سپورتتىڭ ناق وسى كوماندالىق تۇرلەرى بالالاردى باسقا قۇرداستارىمەن ءوارا ساناسىپ، ولاردىڭ ۇجىمداسىپ شەشىم قابىلداۋعا تاربيەلەيدى. بۇعان قوسا، اۋىلداردا بالالاردى شىمىرلىققا باۋليتىن ءداستۇرلى بوكس پەن كۇرەستى دامىتىپ، جاستاردىڭ دۇنيەتانىمى مەن ويلاۋ قابىلەتىن شىڭدايتىن سپورتتىڭ شاحمات، كيبەرسپورت جانە باسقا دا ينتەللەكتۋالدىق تۇرلەرىن وركەندەتۋ كەرەك»، - دەدى قىرىمبەك كوشەربايەۆ.