الماتىدا «تۇيەلەر» دەكوراتيۆتى پاننوسى باستاپقى قالپىنا كەلتىرىلەدى

ول بۇزاقىلاردىڭ قولىنان زارداپ شەككەن كومپوزيتسيانى باستاپقى قالپىنا كەلتىرۋدى قولعا الدى، دەپ حابارلايدى قازاقپارات ءتىلشىسى.

الماتى اكىمى باقىتجان ساعىنتايەۆ Instagram پاراقشاسىندا پاننونىڭ الماتىلىقتار ءۇشىن سۇيىكتى ساۋلەت بەينەلەرىنىڭ بىرىنە اينالعانىن جازدى.

«تۇيەلەر» ءساندى-بەدەرلى پاننوسىنىڭ اۆتورى، ءمۇسىنشى پاۆەل شوروحوۆ كومپوزيتسيانى باستاپقى قالپىنا كەلتىرۋ تۋرالى ءوتىنىشىمدى ماقۇلدادى. 1982 -جىلى جاسالعان پاننو «دوستىق» سكۆەرىندە تۇر. بۇگىندە ول الماتىلىقتاردىڭ سۇيىكتى ارحيتەكتۋرالىق بەينەلەرىنىڭ بىرىنە اينالدى»، - دەپ جازدى ب. ساعىنتايەۆ.

الماتى اكىمى پاۆەل شوروحوۆ الماتىنىڭ ۆيزيت كارتوچكاسىنا اينالعان ءبىرقاتار ءمۇسىننىڭ اۆتورى ەكەنىن ەسكە سالدى. ولار - ارباتتا تۇرعان «ويىنداعى بالالار»، «فلامينگو»، «لوتوس»، سونداي-اق قازاق مەملەكەتتىك سيركىنىڭ جانىنداعى «اكروباتكا»، «پانتەرا»، «سايقىمازاق» جانە تاعى باسقا تۋىندىلار. ونىڭ جۇمىستارى قازاقستان، رەسەي، گەرمانيا، اۆستريا، يتاليا مۋزەيلەرىنە قويىلعان. پاۆەل شوروحوۆتىڭ ايتۋىنشا، ءقازىر ول سىرتقى قابىقتى قالپىنا كەلتىرۋ جۇمىسىمەن اينالىسىپ جاتىر.

«كورىپ تۇرعاندارىڭىزداي، مىس قابىقتىڭ وڭ جانە سول جاق شەتتەرى جۇلىنىپ قالعان. كوپ زيان كەلتىرىلگەن. مىس قاباتىنىڭ شامامەن ۇشتەن ءبىر بولىگى زاقىمدالعان. مودەلدىڭ ءوزى تەمىربەتونمەن قۇراستىرىلعان»، - دەپ ءتۇسىندىردى اۆتور.

سونىمەن قاتار، ول پاننونى قالپىنا كەلتىرۋ قيىن ەكەنىن، ونى جوندەۋگە شامامەن ون كۇن قاجەت ەكەنىن اتاپ ءوتتى.

اۆتور: الما مۇقانوۆا