ءوز مەملەكەتىن وگەي ەتىپ كورسەتۋدى كوزدەيتىن كوزقاراستارمەن كەلىسۋگە بولمايدى - مەملەكەتتىك حاتشى
بۇل تۋرالى «قوعام جانە مەملەكەت: «Birgemiz» - 30 جىلدىق سەرىكتەستىك پەن دامۋ» اتتى IX ازاماتتىق فورۋمنىڭ جالپى وتىرىسىندا ق ر مەملەكەتتىك حاتشىسى قىرىمبەك كوشەربايەۆ ايتتى، دەپ حابارلايدى قازاقپارات ءتىلشىسى.
«ءوزى تاڭداعان قوعامدا ءومىر سۇرە وتىرىپ، ءوز مەملەكەتىن وگەي ەتىپ كورسەتۋدى كوزدەيتىن انتاگونيستىك كوزقاراستارمەن تىپتەن كەلىسۋگە بولمايدى. سول سەبەپتى ءبىزدىڭ باستى ۇستانىمىمىز ازامات، ازاماتتىق قوعام، مەملەكەت دەگەن ۇشتىك ۇعىممەن ۇيلەسىپ جاتۋى ءتيىس. ءبىزدىڭ پايىمداۋىمىزشا، اتالعان ۇشتىكتىڭ ءارقايسى - ءبىر-بىرىمەن بىتىسپەس جاۋ ەمەس، كەرىسىنشە بىرلىكتىڭ رۋحاني نارىمەن سۋسىندانعان ءبىرتۇتاس اعزا. ياعني، مەملەكەت دەگەنىمىز ەل ازاماتتارىنىڭ ەركىن ەرىك-جىگەرىنىڭ ارقاسىندا ەڭسە تىكتەگەن كونستيتۋتسيالىق دەڭگەدەگى قوعامدىق كەلىسىمنىڭ ماۋەلى جەمىسى، مارتەبەلى بيىگى»، - دەدى قىرىمبەك كوشەربايەۆ. سوندىقتان دا مەملەكەتتىك حاتشى ولاردىڭ ءوزارا جاۋاپكەرشىلىگى مەن ءوزارا بايلانىسىنىڭ تەرەڭدەۋى ەل دامۋىنىڭ دا بەرەكەتى بولاتىندىعىن باسا ايتتى.
«دالىرەك ايتساق، قازىرگى تاڭدا جاۋاپتى قىزمەت، ازامات ءوزىنىڭ ەگەمەن ەلىنە ەڭبەك ءسىڭىرىپ، وتانداستارىنىڭ دا زاڭدى قۇقىعى مەن ەركىندىگىنىڭ جانە مۇددەسى جولىندا قىزمەت ەتەتىن جاۋاپتى ازاماتتىق قوعامنىڭ اجىراماس بولشەگى بولىپ تابىلادى. سول سەبەپتى جوعارىدا ايتىلعان ۇشتىكتىڭ - جاۋاپتى ازامات، جاۋاپتى ازاماتتىق قوعام، جاۋاپتى مەملەكەت دەگەن جاڭا فورمۋلاعا ۇلاسۋى ەل دامۋىندا ەرەكشە ءرول اتقارماق»، - دەدى ول.
اۆتور: مارلان جيەمباي