پاۆلوداردا بالاسىن دالاعا تاستاپ، قاشىپ كەتكەن ايەلگە قىلمىستىق ءىس قوزعالدى

None
None
پاۆلودار. قازاقپارات - پاۆلودار وبلىسىندا بالاسىن دالادا قالدىرعان انا ۇستالدى، دەپ حابارلايدى قازاقپارات Polisia.kz رەسۋرسىنا سىلتەمە جاساپ.

پاۆلوداردا ۋچاسكەلىك پوليتسيا ينسپەكتورلارىنىڭ جەدەل ءىس- قيمىلىنىڭ ارقاسىندا بالاسىنىڭ ءومىرىن قاتەرگە تىككەن 33 جاستاعى انا ۇستالدى. 26-قاراشا ساعات 20.40-تا پوليتسياعا پاۆلودار قالاسىنداعى «اۆتوۆوكزال» ترامۆاي ايالداماسىنىڭ ورىندىعىنان 8-9 ايلىق ازيات تيپتەس بالا تابىلعانى تۋرالى حابارلاما كەلىپ ءتۇستى.

كوزبەن شولىپ قاراۋ كەزىندە بالادا كوزگە كورىنەتىن دەنە جاراقاتى بولعان جوق. دەرەۋ بالا تۋرالى باعدار جاسالىپ، اۋماقتىق جانە شەكارا ماڭىنداعى اۋداندارعا تاراتىلدى. جاقىن ماڭداعى بارلىق كوشەلەر تەكسەرىلدى، كۋاگەرلەر مەن كورگەن ادامدار سۇرالدى. جەدەل قىزمەتكەرلەر مەن ۋچاسكەلىك پوليتسيا ينسپەكتورلارى قىس مەزگىلىندە ۇلكەن جۇمىس اتقاردى.

ناتيجەسىندە ۋچاسكەلىك ينسپەكتورلار 32 جاستاعى جەرگىلىكتى تۇرعىن باسقارعان «Toyota Camry» اۆتوكولىگىن انىقتادى. ونىڭ ايتۋىنشا، ول «InDriver « موبيلدى قوسىمشاسى ارقىلى جولاۋشىلار تاسىمالىمەن اينالىسادى. 26-قاراشادا ول سەمەيدەن پاۆلودار قالاسىنا بالاسى بار ايەلدى اكەلىپ، اۆتوۆوكزالعا قالدىرعان. ەكى ساعاتتان استام ۋاقىت ارالىعىندا كۇدىكتى ايەل ۇستالدى.

«وقيعا بويىنشا ق ر ق ك 119-بابىنىڭ 1-بولىگى بويىنشا سوتقا دەيىنگى تەرگەۋ باستالدى»، - دەيدى پاۆلودار وبلىسى پوليتسيا دەپارتامەنتىنىڭ باستىعى نۇرلان ءماسىموۆ.


پوليتسيا قىزمەتكەرلەرى ايەلدىڭ جالعىزباستى انا ەكەنىن، اسىراۋىندا كامەلەتكە تولماعان ەكى ۇلى (9 جاس، 1,2 جاس) بار ەكەنىن انىقتادى. ۇلكەن ۇلى اجەسىمەن بىرگە ەكىباستۇز قالاسىندا تۇرادى. سوڭعى جىلدارى ايەل تاراز قالاسىندا تۇرعان. ۇلىن تاستاپ كەتۋدى الدىن الا جوسپارلاپتى.


سوڭعى جاڭالىقتار