استانادا ساۋدا ويىن-ساۋىق ورتالىقتارىنا سەنبى كۇنى جۇمىس ىستەۋگە رۇقسات بەرىلدى

نۇر-سۇلتاننىڭ باس سانيتار دارىگەرى جاننا پىراليەۆا حابارلاعانداي، ەندى قاۋلىعا سايكەس ساۋدا، ويىن-ساۋىق ورتالىقتارى، ساۋدا ۇيلەرى، جابىق جانە ازىق-تۇلىك ساتپايتىن بازارلار سەنبى كۇندەرى دە جۇمىس ىستەي الادى.

«20- قاراشا كۇنى نۇر-سۇلتاندا 248№ كارانتيندىك شارالار تۋرالى جاڭا قاۋلى شىقتى، وعان سايكەس ماسكا تاعۋ، الەۋمەتتىك قاشىقتىقتى ساقتاۋ، تەرمومەتريا، انتيسەپتيكتەر مەن سانيتايزەرلەردىڭ بولۋى شارت. س و و، ساۋدا ۇيلەرى مەن ورتالىقتارىنىڭ، جابىق ازىق-تۇلىك جانە ازىق-تۇلىك ەمەس بازارلاردىڭ جۇمىس كەستەسىنە وزگەرىستەر ەنگىزىلدى. ەندى اتالعان ساۋدا نىساندارى سەنبى كۇندەرى ساعات 09:00 دەن 20:00 گە دەيىن جۇمىس ىستەيتىن بولادى. ءبىراق مونيتورينگتىك توپتار كارانتين جانە شەكتەۋ شارالارىن بۇزۋ فاكتىلەرىن انىقتاعان جاعدايدا، سەنبى كۇندەرى ولارعا جۇمىس ىستەۋگە تىيىم سالىنادى. جەكسەنبى كۇندەرى بۇرىنعىشا بارلىعى جابىق بولادى. جۇمىس كۇندەرى ساۋدا نىساندارى كەستە بويىنشا 10:00 دەن 23:00 گە دەيىن جۇمىس ىستەيدى»، - دەدى جاننا پىراليەۆا.

ساۋدا وبەكتىلەرىندە ورنالاسقان سۇلۋلىق سالوندارى، اتەلە، حيميالىق تازالاۋ، شاشتاراز، اياق كيىم جوندەۋ شەبەرحاناسى سياقتى قوسىمشا قىزمەتتەر ءۇشىن جاڭا كەستە ەنگىزىلدى. بۇل بيزنەس سۋبەكتىلەرى سەنبى جانە جەكسەنبى كۇندەرى 09:00 دەن 20:00 گە دەيىن جۇمىس ىستەي الادى.

«ەگەر دەمالىس كۇندەرى س و و- دا تەك سۋپەرماركەتتەر مەن ءدارىحانالار اشىلسا، ەندى ولارعا قوسىمشا قىزمەت كورسەتەتىن شاعىن بيزنەس سۋبەكتىلەرى دە قوسىلادى»، - دەپ ءتۇسىندىردى ەلوردانىڭ باس سانيتارلىق دارىگەرى.

بۇل رەتتە ساۋدا وبەكتىلەرىنە كەلۋشىلەر عيماراتتىڭ %30 ىن عانا تولتىرۋى كەرەك، ياعني ءبىر كەلۋشىگە ءتورت شارشى مەتر تيەسىلى بولۋى ءتيىس. بۇل نورمانى عيمارات اكىمشىلىگى دە، جالعا الۋشىلار دا قاداعالاپ وتىرۋى كەرەك. ەگەر ادامدار كوپ بولسا، ولار ادامدار اعىنىن شەكتەۋى كەرەك.

كليەنتتەر ءۇشىن ماسكا تاعۋ جانە قاشىقتىق ساقتاۋ تالابى ساقتالادى. ولاردى بۇزعان جاعدايدا، جەكە تۇلعالار جاۋاپقا تارتىلادى.