«ەر ەدىگە - نوعايلى ءداۋىرىنىڭ جىرى» اتتى داستان جارىققا شىقتى

كونفەرەنتسيادا جىر جيناعىنىڭ تۇساۋكەسەرى ءوتتى، دەپ حابارلايدى قازاقپارات ءتىلشىسى.

تۇركى حالىقتارىنا ورتاق مۇرا «ەدىگە» تاريحي-قاھارماندىق ەپوسىنىڭ باستى كەيىپكەرى ەر ەدىگە باتىردىڭ ءومىرى مەن ەرلىك جولىن ناسيحاتتاۋ ماقساتىندا اقتوبەدە عىلىمي-تاجىريبەلىك كونفەرەنتسياسى ءوتتى.

وعان قازاق ۇلتتىق ونەر ۋنيۆەرسيتەتىنىڭ پروفەسسورى الماسبەك الماتوۆ قاتىسىپ، بىرنەشە عالىم لەبىزىن ونلاين جولدادى.

«ەدىگە باتىر - تاريحي تۇلعا. وسى ورايدا بۇگىن ورتا عاسىرداعى ايبىندى مەملەكەتىمىز التىن وردانىڭ 750 جىلدىعىنا تۇسپا-تۇس كەلىپ وتىرعان شارانىڭ دا ورنى ەرەكشە. التىن وردانىڭ 750 جىلدىعى دەگەنىمىزدىڭ ءوزى تاريحتى تانۋ، باتىر بابالارىمىزدى ۇلىقتاۋ جانە باس قوسۋداعى باستى ماقساتىمىز ەدىگە باتىردى تۇلعالاندىرۋ، تاريحي ورىنىن زەردەلەۋ»، - دەپ اتاپ ءوتتى وبلىس اكىمى وڭداسىن ورازالين.

ايماق باسشىسى الداعى ۋاقىتتا دا ەدىگە باتىر مەن ونىڭ ۇرپاقتارىنا قاتىستى قولعا العان تىڭ جوبالار مەن زەرتتەۋلەردىڭ ءبارى تابىستى جۇزەگە اسا بەرەتىندىگىن جەتكىزدى.

ايتا كەتەيىك، وتكەن جىلى «ەدىگە» تاريحي-قاھارماندىق ەپوسىنىڭ باستى كەيىپكەرى «ەر ەدىگە - نوعايلى ءداۋىرىنىڭ جىرلارى» اتتى مۋزىكالىق البومىن دايىنداۋ ءۇشىن 40 تام استام جىرشى- جىراۋدىڭ ورىنداۋىندا دىبىستىق جازباعا ءتۇسىرۋ جۇمىسى باستالدى. ءىستىڭ باسى-قاسىندا قازاقستاننىڭ ەڭبەك سىڭىرگەن قايراتكەرى الماس الماتوۆ جەتەكشىلىك ەتكەن بەلگىلى ولكەتانۋشىلار، ەتنوگرافتار، مۋزىكا زەرتتەۋشىلەرى ءجۇردى.

ءار ءوڭىر جىرشى-جىراۋلارىنىڭ ورىنداۋىنداعى اتاقتى مۇرىن جىراۋ سەڭگىرباي ۇلى جىرلاعان «قىرىمنىڭ قىرىق باتىرى»، حالىق اقىنى نۇرپەيىس بايعانين جىرلاعان «قاراساي-قازي»، نۇرتۋعان كەنجەعۇل ۇلى جىرلاعان «ماۋلىمنياز»، «ەدىگە»، «وراق-ماماي»، «قاراساي-قازي» سەكىلدى داستاندارى جيناققا ەندى.

داستان بيىل 500 دانامەن جارىققا شىقتى. مۋزىكالىق داستان ەكى بولىكتەن تۇرادى. ۇلتتىق ناقىشپەن بەزەندىرىلگەن ءبىرىنشى كىتاپتا «قىرىمنىڭ قىرىق باتىرى» جانە «ەدىگە باتىر» تۋرالى تاريحي مالىمەت، جىردى بىزگە جەتكىزگەن جىراۋلار، ەلىمىزدىڭ ءار وڭىرىنەن سول مۇرالاردى جىرلاعان جىرشى-جىراۋلاردىڭ ءومىربايانى قازاق، ورىس جانە اعىلشىن تىلىندە بەرىلسە، كەلەسى كىتاپشانىڭ ىشىندە جىر جازىلعان 10 ديسك ورنالاسقان. مۋزىكالىق البوم كىتاپحانالارعا تاراتىلىپ، جىر قادىرىن بىلەتىن قالىڭ كورەرمەن ءۇشىن تەڭدەسى جوق دۇنيە بولماق. سونداي-اق ءارى قاراي شارالار لەگى «ەدىگە دەگەن ەر ەكەن...» اتتى جىرشىلاردىڭ جىر كەشىنە ۇلاستى.