دانيار ەلەۋسىنوۆ تيتۋلدىق جەكپە-جەك الدىندا مالىمدەمە جاسادى

سالتاناتتى شارادان كەيىن بوكسشى DAZN Boxing پورتالىنا الداعى جوسپارى جايىندا ايتىپ بەردى.

- قارسىلاسىڭ بۇل ايقاس ول ءۇشىن تۇك ەمەس ەكەنىن، وڭاي جەڭەتىنىن ايتتى. سەن دە وعان جاۋاپ رەتىندە قينالماي ۇتاتىنىڭدى جەتكىزدىڭ. نەگە وعان سەنىمدىسىڭ، بىلۋگە بولا ما؟

- ماعان ءبارىبىر، بۇل مەن ءۇشىن ماڭىزدى ەمەس. ويتكەنى، مەن رينگكە تەك جەڭۋ ءۇشىن شىعامىن. رينگكە شىققان سوڭ يندونگو ءىس جۇزىندە جاڭاعى سوزىنە جاۋاپ بەرۋگە ءتيىس. بۇل وعان وڭايعا سوقپايتىنى انىق، ال ماعان تۇك ەمەس.

- قاعاز جۇزىندە بۇل - سەنىڭ سپورت جولىڭداعى ەڭ كۇردەلى ايقاس. كەيبىرەۋلەر ساعان مۇنداي جەكپە-جەككە شىعۋعا ءالى ەرتە دەپ جاتىر. ءوزىڭ نە ويلايسىڭ؟

- مەن وزىمە سەنىمدىمىن، كەرەمەت سەزىمدەمىن. مەن بۇعان دايىنمىن.

ەسكە سالا كەتەيىك، 27- قاراشا كۇنى امەريكانىڭ فلوريدا شتاتىنداعى Seminole Hard Rock Hotel Casino ارەناسىندا بوكس كەشى وتەدى. وندا ەلەۋسىنوۆ پەن يندونگو جارتىلاي ورتا سالماقتاعى IBF Inter- Continental بەلبەۋىنە تالاسادى. قازاقستاندا بۇل كەزدەسۋدى «حابار» تەلەارناسى تىكەلەي ەفيردە كورسەتەدى.

ترانسلياتسيا استانا ۋاقىتىمەن 06:00-دە باستالادى.

ايتا كەتەيىك، دانيار سوڭعى جەكپە-جەگىن وتكەن جىلدىڭ جەلتوقسان ايىندا وتكىزىپ، 5-راۋندتا امەريكالىق الان سانچەستى (20-5-1، 10 ك و) تەحنيكالىق نوكاۋتپەن جەڭگەن ەدى.