قازاقستانداعى شەتەلدىك ەڭبەكشى زەينەتاقى جۇيەسىنە قالاي قاتىسادى

ەۋرازيالىق ەكونوميكالىق وداق تۋرالى شارتتا زەينەتاقىمەن قامسىزداندىرۋ ماسەلەسىن رەتتەۋ ماقساتىندا جەكە حالىقارالىق شارت ازىرلەۋ كوزدەلگەن. وسىعان بايلانىستى ءتيىستى كەلىسىم ازىرلەنىپ، 2019-جىلدىڭ 20- جەلتوقسانىندا مەملەكەت باسشىلارى قول قويدى.

اتالعان كەلىسىمنىڭ نەگىزگى ماقساتى - جۇمىسقا ورنالاستىرۋشى مەملەكەت ءوز ازاماتتارىنا تارايتىن جاعدايلاردا جانە تارتىپپەن ەڭبەكشىلەردىڭ زەينەتاقى قۇقىقتارىن قالىپتاستىرۋ، ساقتاۋ جانە ىسكە اسىرۋ، ەڭبەكشىلەردىڭ زەينەتاقىلارىن تاعايىنداۋعا جانە ەكسپورتتاۋعا بايلانىستى ماسەلەلەردى شەشۋ، سونداي-اق مۇشە مەملەكەتتەر اراسىندا زەينەتاقىمەن قامسىزداندىرۋ سالاسىنداعى ىنتىماقتاستىقتى نىعايتۋ.

ق ر ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆتىڭ ايتۋىنشا، ە ا ە و- عا مۇشە مەملەكەتتەردە ءارتۇرلى زەينەتاقى جۇيەسى قالىپتاسقان.

مىسالى، بەلارۋستا جيناقتاۋشى زەينەتاقى جۇيەسى جوق. ال باسقا ەلدەردە جيناقتاۋشى جۇيەلەرى ءارتۇرلى. زەينەتاقى جۇيەلەرىن قارجىلاندىرۋ جانە زەينەتاقى قاراجاتىن ءبولۋ تاسىلدەرىندە دە ايىرماشىلىق بار. بۇدان باسقا زەينەتاقى جۇيەلەرى قۇرىلىمدىق جاعىنان، ياعني زەينەتكەرلىك جاسى، مولشەرى، ەڭبەك ءوتىلى جانە باسقا دا پارامەترلەر بويىنشا ەرەكشەلەنەدى.

«قازىرگى ۋاقىتتا تۇراقتى تۇراتىن شەتەلدىك ازاماتتار ءۇشىن زەينەتاقىمەن قامسىزداندىرۋ ماسەلەسى رەتتەلگەن. ال جۇمىس ماقساتىندا ۋاقىتشا كەلگەن ەڭبەكشىلەر ءۇشىن بۇل ماسەلە رەتتەلمەگەن كۇيدە قالىپ وتىر. سوندىقتان اتالعان كەلىسىمنىڭ كۇشىنە ەنۋى ەڭبەكشىلەردىڭ زەينەتاقى سالاسىنداعى ماسەلەلەرىن رەتتەۋگە مۇمكىندىك بەرەدى. اتاپ ايتقاندا جۇمىسقا ورنالاستىرۋشى مەملەكەتتىڭ ازاماتتارى مەن ەڭبەكشىلەردىڭ تەڭ قۇقىقتارىن قامتاماسىز ەتىلەدى. ءار مەملەكەت ءوز اۋماعىندا جۇمىس ءوتىلى كەزەڭدەرى ءۇشىن زەينەتاقى تولەيتىن بولادى. ءاربىر مۇشە مەملەكەت زەينەتاقى الۋ قۇقىعىن ايقىنداپ، ونىڭ مولشەرىن ءوزىنىڭ ۇلتتىق زاڭناماسىنا سايكەس ەسەپتەيدى»، - دەدى مينيستر.

ۆەدومستۆو باسشىسىنىڭ سوزىنە قاراعاندا، كەلىسىم اياسىندا قازاقستان تاراپىنان ەڭبەكشى كوشىپ- قونۋشىلارعا ۇلتتىق زاڭنامادا بەلگىلەگەن تارتىپپەن تەك جيناقتاۋشى زەينەتاقى جۇيەسىنەن زەينەتاقى تولەمدەرى كوزدەلەدى.

«كەلىسىمدى ىسكە اسىرۋ جونىندەگى قۇزىرەتتى ورگان رەتىندە ءبىزدىڭ تاراپىمىزدان ءبىرىڭعاي جيناقتاۋشى زەينەتاقى قورى بەلگىلەنەدى»، - دەدى ءبىرجان نۇرىمبەتوۆ.