مەملەكەت باسشىسى: حالىقارالىق قاتىناستار جۇيەسى بەلگىسىزدىك جاعدايىنا، بەيبەرەكەتسىزدىككە بەت بۇرۋدا

None
None
نۇر- سۇلتان. قازاقپارات - مەملەكەت باسشىسى قاسىم- جومارت توقايەۆ Nur Otan پارتياسىنىڭ كەزەكتەن تىس ⅩⅩسەزىنە قاتىستى، دەپ حابارلايدى اقوردا.

قاسىم- جومارت توقايەۆ قازاقستاننىڭ تۇڭعىش پرەزيدەنتى - ەلباسى نۇرسۇلتان نازاربايەۆتىڭ توراعالىعىمەن وتكەن Nur Otan پارتياسىنىڭ كەزەكتەن تىس ⅩⅩ قۇرىلتايىنا قاتىستى. سەزد دەلەگاتتارى الدىندا سويلەگەن سوزىندە قازاقستان پرەزيدەنتى Nur Otan پارتياسى بۇگىندە ەل تاعدىرىنا جاۋاپتى ەڭ باستى ساياسي كۇشكە اينالعانىن اتاپ ءوتتى. مەملەكەت باسشىسى قازاقستان قازىرگى احۋالعا قاراماستان ستراتەگيالىق دامۋ ماقساتتارىن دايەكتى تۇردە جۇزەگە اسىرىپ جاتقانىن ايتتى. بۇل رەتتە، ەلباسى ساياساتىنىڭ ساباقتاستىعىن قامتاماسىز ەتۋ - نەگىزگى مىندەتتىڭ ءبىرى.

قاسىم- جومارت توقايەۆ بيىلعى جولداۋىندا Nur Otan پارتياسىنىڭ قوعامداعى جەتەكشىلىك رولىنە جوعارى باعا بەرگەنىنە توقتالدى. قازاقستان پرەزيدەنتىنىڭ ايتۋىنشا، الەم عالامدىق وزگەرىستەر داۋىرىنە اياق باسىپ، حالىقارالىق قاتىناستار جۇيەسى بەلگىسىزدىك جاعدايىنا، ءتىپتى، بەيبەرەكەتسىزدىككە بەت بۇرۋدا. مەملەكەت باسشىسى وتكەن عاسىرداعى تەرەڭ رەتسەسسيا الەمدىك ەكونوميكانى ون جىلعا ارتقا لاقتىرىپ تاستاعانىن، ال بۇرىنعى ءوسۋ قارقىنى مەن تۇراقتى دامۋدى قالپىنا كەلتىرۋ ءۇشىن ۇلكەن كۇش پەن ۋاقىت قاجەت ەكەنىن جەتكىزدى.

«قازاقستاننىڭ تۇراقتى دامۋ تۇرعىسىنان مۇمكىندىگى مول. سەبەبى بىزدە، ەڭ الدىمەن، ناقتى دامۋ جوسپارى بار. ونى جۇزەگە اسىرۋعا قارجىلىق رەسۋرسىمىز دا جەتكىلىكتى. جاۋاپكەرشىلىكتى سەزىنە الاتىن ميلليونداعان ازاماتتاردىڭ قولداۋىنىڭ ارقاسىندا ءبىز ىشكى ساياسي تۇراقتىلىقتى ساقتاپ، بيزنەس قوعامداستىقتى قولداپ، مەملەكەتتىڭ بارلىق الەۋمەتتىك مىندەتتەمەلەرىن ورىنداي الۋىن قامتاماسىز ەتە الدىق. ءبىزدىڭ بۇعان قول جەتكىزۋىمىزدە حالقىمىزدىڭ ءداستۇرلى قۇندىلىقتارى، ءوزارا جاردەمدەسۋ، تاباندىلىق پەن جاناشىرلىق سەكىلدى قاسيەتتەرى ەرەكشە ءرول اتقاردى»، - دەدى مەملەكەت باسشىسى.

قاسىم- جومارت توقايەۆ كوروناۆيرۋس پاندەمياسىمەن كۇرەسكە حالىقتىڭ ۇلكەن ۇلەس قوسقانىن اتاپ ءوتىپ، سونداي قيىن- قىستاۋ شاقتا ەل ازاماتتارى شىنايى ىنتىماقتاستىق پەن جاپپاي جانقيارلىق تانىتقانىن ايتتى. ونىڭ سوزىنشە، «ءبىز بىرگەمىز» ۇرانى قازاقستاندىق پاتريوتيزمنىڭ فورمۋلاسىنا اينالدى. قازاقستان پرەزيدەنتى داعدارىس كەزىندە باسقارۋشى پارتيانىڭ دا، ۇكىمەتتىڭ دە، سونداي- اق، بۇكىل قوعامنىڭ دا الدىنان ۇلكەن مۇمكىندىكتەر اشىلاتىنىن ايتتى.

«وسى تاريحي مۇمكىندىكتى پايدالانۋ ءۇشىن ءبىز ەلىمىزگە دامۋدىڭ جاڭا پاراديگماسىن ۇسىنۋىمىز قاجەت. بۇل جەردە پرەزيدەنت، ۇكىمەت جانە زاڭ شىعارۋشى سالا سياقتى بيلىك تارماقتارى كۇش جۇمىلدىرۋى كەرەك. سوندىقتان الداعى سايلاۋ بۇكىل قوعام ءۇشىن وتە ماڭىزدى بولماق»، - دەدى مەملەكەت باسشىسى.

سونىمەن قاتار قاسىم- جومارت توقايەۆ ەلباسى قالىپتاستىرعان بەس ينستيتۋتسيونالدى رەفورما مەن ۇلت جوسپارىن جۇيەلى جاڭعىرتۋعا تىڭ سەرپىن بەرۋگە شاقىردى.

«وسى ماقساتتا ءبىز 2025 -جىلعا دەيىنگى «وزگەرىستەر جولى: ءار ازاماتقا لايىقتى ءومىر!» اتتى سايلاۋالدى باعدارلاماسىن قابىلدايمىز. بۇل ەگجەي- تەگجەيلى زەردەلەنگەن، شىنايى قۇجات. ەكونوميكاداعى قيىندىقتارعا قاراماستان، Nur Otan ۇكىمەتپەن بىرگە الداعى بەس جىلدىقتا اتالعان باعدارلامانى جۇزەگە اسىرۋ ءۇشىن 21 تريلليون تەڭگە ءبولۋدى جوسپارلاپ وتىر. باعدارلاما ەلىمىزدىڭ الەۋمەتتىك دامۋىن ىلگەرىلەتۋگە جانە حالىقتىڭ ءال- اۋقاتىن ارتتىرۋعا باعىتتالعان ناقتى شارالاردىڭ ءتيىمدى كەشەنىن قامتيدى. پارتيا جۇرتشىلىق تاراپىنان كەلىپ تۇسكەن بارلىق ۇسىنىستار مەن تالاپ- تىلەكتەردى ەسكەردى. ءبىزدىڭ باعدارلامانى بۇكىل ەلىمىز دايىندادى دەسەك، ارتىق ايتقاندىق ەمەس»، - دەدى پرەزيدەنت.

قاسىم- جومارت توقايەۆ اتالعان باعدارلامانى جۇزەگە اسىرۋ ءۇشىن نەگىزگى ءتورت باسىمدىققا نازار اۋدارىلاتىنىن اتاپ ءوتتى. مەملەكەت باسشىسى ءبىرىنشى مىندەت رەتىندە ءار ازاماتقا ءوز الەۋەتىن ىسكە اسىرۋ ءۇشىن تەڭ مۇمكىندىك بەرىلەتىنىن جەتكىزدى. پرەزيدەنت الداعى بەس جىل ىشىندە الەۋمەتتىك تولەمدەردى يندەكستەۋ ءۇشىن 3 تريلليون تەڭگەدەن استام قارجى بولىنەتىنىن مالىمدەدى. زەينەتاقى مولشەرى دە جىل سايىن يندەكستەلەتىن بولادى. بۇل رەتتە ونىڭ ءوسىم مولشەرى ينفلياتسيا دەڭگەيىنەن ەكى پايىزعا كوپ بولۋى ءتيىس.

مەملەكەت باسشىسى دەنساۋلىعى مىقتى ينتەللەكتۋالدى ۇلت قالىپتاستىرۋدى پارتيا باعدارلاماسىنداعى ەكىنشى باسىمدىق رەتىندە اتادى. جاھاندىق جاڭا سىن- قاتەرلەردى ەسكەرە وتىرىپ، بۇل باعىتتى ىلگەرىلەتۋ ءۇشىن ءبىلىم، عىلىم، دەنساۋلىق ساقتاۋ، مادەنيەت جانە سپورت سالالارىنا بولىنەتىن قاراجات كوبەيەدى.

«بۇل - ادامي كاپيتالعا، ەلىمىزدىڭ بولاشاعىنا قۇيىلعان ستراتەگيالىق ينۆەستيتسيا. دەنساۋلىق ساقتاۋ ىسىنە بولىنەتىن قارجى كولەمى ىشكى جالپى ءونىمنىڭ 5 پايىزىنان كەم بولمايدى. جاڭا ىقتيمال ەپيدەميالارعا دايىن بولۋ كەرەك»، - دەدى قاسىم- جومارت توقايەۆ.

باياندامادا ءۇشىنشى باسىم باعىت رەتىندە ەكونوميكانىڭ جانە ايماقتاردىڭ تۇراقتى دامۋى ايقىندالعانى ايتىلدى. پرەزيدەنت جاھان ەكونوميكاسى ۇزاق توقىراۋعا ۇشىراعانىن اتاپ ءوتتى. دەگەنمەن ول مۇنداي داعدارىس ەكونوميكانى جاڭا ۇلگىدە قالىپتاستىرۋ ءۇشىن جۇيەلى رەفورمالار جاساۋعا مۇمكىندىك بەرەدى دەپ سانايدى.

«الەمدەگى بارلىق ەكونوميكا عالىمدار مەن پاراساتتى ساياساتكەرلەر ادامزات تاريحىنداعى تەڭدەسسىز جاھاندىق داعدارىس جاعدايىندا ەكونوميكالىق پروتسەسستەردى باسقارۋدا مەملەكەتتىڭ ءرولى بارىنشا ارتىپ وتىر دەگەن تۇجىرىمعا كەلدى»، - دەدى مەملەكەت باسشىسى.

سونىمەن قاتار قاسىم- جومارت توقايەۆ قاتاڭ ءارى تەڭدەستىرىلگەن ماكروەكونوميكالىق ساياسات، جەكە مەنشىك سەكتوردى قولداۋ، حالىق الدىنداعى الەۋمەتتىك مىندەتتەردى ورىنداۋ ەسەبىنەن ەكونوميكانىڭ ءوسىمىن قامتاماسىز ەتۋدىڭ ماڭىزىنا توقتالدى. بۇل رەتتە شىعىنداردى باقىلاۋدى قاتاڭ نازاردا ۇستاۋ كەرەك. Nur Otan باعدارلاماسىنداعى ءتورتىنشى باسىمدىق - «حالىق ۇنىنە قۇلاق اساتىن مەملەكەت» جانە جاۋاپتى ازاماتتار.

پرەزيدەنتتىڭ پىكىرىنشە، تۇراقتى دامۋ ءۇشىن سەنىم مەن جاۋاپكەرشىلىككە نەگىزدەلگەن مەملەكەت پەن قوعامنىڭ ءوزارا ءىس- قيمىلى قاجەت. بۇل رەتتە مەملەكەت باسشىسى ءبىزدىڭ ورتاق جۇمىسىمىزدىڭ باستى باعدارى حالىق مۇددەسى مەن پروبلەمالارى ەكەنىن ناقتىلادى. پرەزيدەنتتىڭ ايتۋىنشا، مەملەكەت حالىق ءۇنى مەن پىكىرىنە قۇلاق اسۋى ءتيىس.

«پارتيا جۇمىسىنىڭ وڭ كوەففيتسيەنتى ازاماتتارىمىزدىڭ ءومىرىن جاقسارتاتىن ناقتى شەشىمدەرگە بايلانىستى بولماق. بوس ءسوز بەن قۇرعاق ۋادە ەمەس، ناقتى ارەكەت قانا حالىق سەنىمىنە جانە ساياسي كوشباسشىلىققا قول جەتكىزۋگە مۇمكىندىك بەرەدى. سوندىقتان پارتيا مەملەكەتتىك باسقارۋ جۇيەسىن جاڭعىرتۋدى مىقتاپ قولعا الادى. بۇل ستراتەگيالىق سيپاتتاعى مىندەت»، - دەدى قازاقستان پرەزيدەنتى.

مەملەكەت باسشىسى ءوز سوزىندە پارتيانىڭ جاڭا باعدارلاماسى دامىعان ازاماتتىق قوعام مەن ەكونوميكالىق تۇرعىدان تولىققاندى مەملەكەت قۇرۋعا باعىتتالعانىن ايتتى. قاسىم- جومارت توقايەۆ جەتەكشى پارتيانىڭ مارتەبەسى بيلىككە قول جەتكىزۋدە ەمەس، مەملەكەت پەن حالىققا ناقتى پايدا تيگىزۋ مۇمكىندىگىندە ەكەنىن اتاپ ءوتتى.

«مەملەكەتتىك باسقارۋ جۇيەسىندەگى لاۋازىمدى قىزمەت اتقاراتىن پارتيا مۇشەلەرى ەڭبەكقورلىقتىڭ، ساياسي جاۋاپكەرشىلىك پەن ازاماتتىق پاتريوتيزمنىڭ ايقىن ۇلگىسى بولۋعا مىندەتتى. پارتيامىزدىڭ مۇشەلەرى بولاشاقتا دا وسى ۇددەدەن تابىلارىنا كۇمان كەلتىرمەيمىن»، - دەدى پرەزيدەنت.

مەملەكەت باسشىسى ءسوزىن قورىتىندىلاي كەلە، تاۋەلسىزدىگىمىزدىڭ وتىز جىلدىعى ءماجىلىس جانە ءماسليحات دەپۋتاتتارىنىڭ سايلاۋىمەن باستالىپ جاتقانىنا، ونىڭ سيمۆولدىق ءمانى زور ەكەنىنە نازار اۋداردى.

«الداعى سايلاۋ قوعامنىڭ ءبىرتۇتاستىعىن جانە بەرەكە- بىرلىگىمىزدى بەكەمدەي تۇسەدى دەپ سەنەمىن. بۇل ناۋقاننىڭ اشىق، ءادىل ءارى زاڭدى ءوتۋى ءۇشىن بارلىق جاعدايدى جاسايمىز. مەن، مەملەكەت باسشىسى رەتىندە، مۇنى ءجىتى قاداعالايمىن»، - دەدى قاسىم- جومارت توقايەۆ.

سوڭعى جاڭالىقتار