سەمەيدە اعاش وڭدەۋ سەحى ورتەندى

ش ق و توتەنشە جاعدايلار دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، 23-قاراشادا ساعات 19.10 شاماسىندا ەلەمەسوۆ كوشەسىندەگى اعاش وڭدەۋ سەحىندا ءورت شىققان.

«وقيعا ورنىنا دەرەۋ جەتكەن ءورت سوندىرۋشىلەر ءتىلسىز جاۋدى اۋىزدىقتاۋعا كىرىستى. شاتىردىڭ اعاش قۇرىلىمدارىن شارپىعان قىزىل جالىننىڭ جالپى اۋماعى 120 شارشى مەترگە جەتكەن. سونداي- اق وت جيھازعا، جەكە زاتتار مەن ەسىككە جايىلعان. ءورتتى ءوشىرۋ كەزىندە قۇتقارۋشىلار سەح ىشىنەن 27 ليترلىك 2 گاز باللونىن سىرتقا الىپ شىعىپ ۇلگەردى»، - دەپ حابارلادى ۆەدومستۆو وكىلدەرى.

30 مينۋت ىشىندە ءتىلسىز جاۋ تولىقتاي سوندىرىلگەن. الدىن الا مالىمەت بويىنشا، ءورتتىڭ شىعۋىنا وتپەن ابايسىز ارەكەت ەتۋ نەمەسە ەلەكتر جابدىقتارىنىڭ اپاتتىق رەجيمى سەبەپ بولۋى مۇمكىن.

اۆتور: تالعاتجان مۇحامەتبەك ۇلى