نۇر-سۇلتاندا جول قوزعالىسىنا وزگەرىس ەنگىزىلىپ جاتىر

دەپارتامەنتتىڭ باسپا ءسوز قىزمەتىنە تاراتقان مالىمەتتەرگە قاراعاندا، اتالمىش شارا مەملەكەتىك ورگاندارمەن بىرلەسە وتىرىپ، جول-كولىك وقيعالارىنىڭ الدىن الۋ ماقساتىدا جۇزەگە اسىرىلۋدا.

استانالىق پوليتسيا دەپارتامەنتىنىڭ باسشىسى ەرجان سادەنوۆتىڭ ايتۋىنشا، بيىلعى جىلى جول قوزعالىسىن ۇيىمداستىرۋ كەستەسىن وزگەرتۋ بويىنشا جۇمىستار جۇزەگە اسىرىلىپ، جول قوزعالىسىن رەتتەيتىن تەحنيكالىق قۇرىلعىلار ورناتىلدى.

مىسالى 23 رەتتەلمەيتىن جاياۋ جۇرگىنشىلەر وتەتىن جول مەن 8 داڭعىلدا باعدارشام ورناتىلدى.

جاياۋ جۇرگىنشىلەر وتەتىن 16 جول جارىقتاندىرىلىپ، 8 داڭعىلدا قوسىمشا باعدارشام سەكتسيالارى ورناتىلدى. ەلوردانىڭ جول قوزعالىسىن ۇيىمداستىرۋ كەستەسىنە وزگەرىس ەنگىزۋ جۇمىستارى شەتەل تاجىريبەسى بويىنشا ىلكى جوبا اياسىندا جىل بويىنا شەتىنەن جۇزەگە اسىرىلدى.

بۇگىنگى تاڭدا 19 داڭعىلدا سول جاققا بۇرىلىپ، مانيەۆر جاساۋعا تىيىم سالىنىپ، كولىك اعىنىندا قاراما-قايشى قوزعالىستى قىسقارتۋ ماقساتىندا اينالىپ، بۇرىلۋعا دا تيىم سالىندى. بۇل رەتتە بالاما مۇمكىندىك رەتىندە 13 جول بولىگىندە اينالىپ، بۇرىلۋعا مۇمكىندىك بەرەتىن قاۋىپسىز ورىندار جاسالدى.

تاعى 2 بولىكتە وسى تەكتەس جۇمىستار جۇرگىزىلۋدە. بيىلعى جىلى ءۋاليحانوۆ پەن سەيفۋللين («ارتەم»، «ماگنۋم» ساۋدا ۇيلەرى) داڭعىلىندا العاشقى دياگونالدى جاياۋ جۇرگىنشىلەر وتكەلى قولدانىسقا ەنگىزىلدى.

جاياۋ جۇرگىنشىلەرگە ارنالعان بۇل وتكەلدىڭ وزگەلەردەن ايىرماشىلىعى بۇكىل اۆتوموبيل قوزعالىسىنىڭ داڭعىلدا ۋاقىتشا توقتاپ، جاياۋ جۇرگىنشىلەردىڭ ءبارىنىڭ ءبىر مەزگىلدە، سونىمەن قاتار جولدى قيعاشىنان كەسىپ وتۋىنە مۇمكىندىك جاساۋ بولىپ تابىلادى. كولىككە قاراعاندا، جاياۋ جۇرگىنشىلەرگە باسىمدىق بەرۋ جولدى قيعاشىنان كەسىپ وتۋگە مۇمكىندىك جاسايدى.

ءوز كەزەگىندە بۇل جاياۋ جۇرگىنشىلەر ءۇشىن قولايلى ءارى قاۋىپسىز بولىپ تابىلادى. بالالار زارداپ شەگەتىن جول-كولىك وقيعالارىنىڭ الدىن الۋ ماقساتىندا ءبىلىم بەرۋ نىساندارىنىڭ جانىنداعى 69 جول بولىگىنە اق-سارى تۇسكە بويالعان جولاقتار سالىندى.

ال 92 جول بولىگىندە سارىمەن بويالعان جاساندى جايسىز جولدار مەن قوزعالىستى شەكتەيتىن جول بەلگىلەرى ورناتىلدى. وتىرار 8/1 مەن جەلتوقسان كوشەلەرىندە جاياۋ جۇرگىنشىلەر وتەتىن جولعا بىرنەشە مەتر قالعانعا دەيىنگى ارالىققا جۇرگىزۋشىلەرگە ەسكەرتۋ رەتىندە يرەلەك جولاقتار جاسالدى. سونىمەن قاتار باعدارشامنىڭ قىزىل-جاسىل تۇستەرى جاناتىن ۋاقىت ارالىعى 3-تەن 4 سەكۋندقا دەيىن ارتتى. وسى شارالاردىڭ ناتيجەسىندە رەتتەلەتىن داڭعىلدارداعى جول-كولىك وقيعالارىنىڭ سانى %55 قىسقاردى.

«جالپى وسى باعىتتا اتقارىلعان جۇمىستار ەلوردا جولدارىندا جول-كولىك وقيعالارىنىڭ سانىن ەداۋىر قىسقارتۋعا مۇمكىندىك بەردى»، - دەلىنگەن پوليتسيا دەپارتامەنتىنىڭ باسپا ءسوز قىزمەتى تاراتقان اقپاراتتا.