ەلوردا پوليتسەيلەرى كارانتيننىڭ بۇزىلۋى بويىنشا حاتتاما تولتىرىپ جاتقان جوق
بۇل تۋرالى قازاقپارات نۇر-سۇلتان قالاسىنىڭ پوليتسيا دەپارتامەنتىنە سىلتەمە جاساپ حابارلايدى.
«ءبىز ەشقانداي حاتتاما تولتىرمايمىز، تەك فاكتىنى ءبارىن نۇر-سۇلتان قالاسىنىڭ تاۋارلار مەن قىزمەتتەردىڭ ساپاسىن باقىلاۋ باسقارماسىنا جولدايمىز. پوليتسيا قىزمەتكەرلەرى كارانتين رەجيمىنىڭ بۇزىلعانىن كورسە ازاماتتارعا الدىمەن مۇنىڭ دۇرىس ەمەستىگىن تۇسىندىرەدى، سونداي-اق قۇرامىنا اكىمدىكتىڭ، تاۋارلار مەن قىزمەتتەردىڭ ساپاسىن باقىلاۋ باسقارماسىنىڭ، سونداي-اق ۋچاسكەلىك ينسپەكتورلارى بار موبيلدى توپتى وقيعا ورنىنا شاقىرادى. ودان كەيىنگى جۇمىس تاۋارلار مەن قىزمەتتەردىڭ ساپاسىن باقىلاۋ باسقارماسىنىڭ مىندەتىندە. ولارعا پوليتسيا قىزمەتكەرلەرىنىڭ فوتو جانە ۆيدەودالەلدەرى جىبەرىلەدى»، - دەلىنگەن دەپارتامەنت تاراتقان حابارلامادا.
ەلدە ىندەت قايتا ءورشىپ كەلە جاتىر. سوعان قاراماستان ەلوردادا كارانتين رەجيمى مەن قالانىڭ باس مەملەكەتتىك سانيتارلىق دارىگەرلەرى بەكىتكەن تالاپتاردى ەلەمەيتىن تۇرعىندار دا بار ەكەن.
رەيد شارالارى بارىسىندا قالانىڭ پوليتسيا قىزمەتكەرلەرى مونيتورينگ توبى «ZOLOTO» مەيرامحاناسىندا ءبىر ۋاقىتتا 70 ادامنىڭ وتىرعانىن انىقتاعان.
كليەنتتەر الەۋمەتتىك قاشىقتىق پەن سانيتارلىق-ەپيدەميولوگيالىق نورمالاردى ساقتاماعان. وسىلايشا مەيرامحانا يەسى دە، كەلۋشىلەر دە ادامداردىڭ ومىرىنە قاۋىپ توندىرگەن.
اكىمشىلىك كودەكستىڭ 425-بابى بويىنشا جيناقتالعان ماتەريال نۇر-سۇلتان قالاسىنىڭ تاۋارلار مەن قىزمەتتەردىڭ ساپاسىن باقىلاۋ باسقارماسىنا جولدانعان.