ەلوردا تۇرعىنى «كامازىمەن» پوليتسيادان قاشىپ، قالا شەتىندە ۇستالدى

پوليتسيانىڭ زاڭدى تالابىنا باعىنباعان ول اكىمشىلىك كودەكستىڭ ءتورت بابىمەن جاۋاپكەرشىلىككە تارتىلدى، دەپ حابارلايدى قازاقپارات ءتىلشىسى قالالىق پوليتسيا دەپارتامەنتىنىڭ باسپا ءسوز قىزمەتىنە سىلتەمە جاساپ.

ايتا كەتسەك Instagram-داعى پابليكتىڭ بىرىندە بۇعان دەيىن «كاماز» جۇك كولىگىن قۋالاپ بارا جاتقان پوليتسيا كولىكتەرىنىڭ ۆيدەوسى جاريالانعان ەدى. پوليتسيا دەپارتامەنتىنىڭ حابارلاۋىنشا، وقيعا بۇگىن، ياعني 19-قاراشادا تىركەلگەن.

«ساعات 14.20 دا ايناكول كوشەسىندە پوليتسيا قىزمەتكەرلەرى قوزعالىس بارىسىنداعى «كاماز» جۇرگىزۋشىسىنىڭ تەلەفونمەن سويلەسىپ بارا جاتقانىن بايقاپ قالعان. پوليتسيا قىزمەتكەرلەرى ونى توقتاتىپ الىپ، جۇرگىزۋشى كۋالىگىن تالاپ ەتكەن. الايدا جۇرگىزۋشى تالاپتى ەلەمەي، كولىگىن جۇرگىزىپ كەتە بەرگەن»، - دەپ حابارلايدى دەپارتامەنتتىڭ باسپا ءسوز قىزمەتى.

ءتارتىپ ساقشىلارى كولىكپەن «كاماز» جۇرگىزۋشىسىن قالادان شىققانشا قۋالاعان. اقىرى جۇرگىزۋشى ۇستالىپ، اۋداندىق پوليتسيا بولىمىنە جەتكىزىلگەن. جۇرگىزۋشى ەلوردانىڭ 32 جاستاعى تۇرعىنى بولىپ شىقتى.

پوليتسيا قىزمەتكەرلەرىنىڭ تالابىن ورىنداماي، زاڭ تارتىپكە مويىنسۇنباعانى ءۇشىن، كولىك جۇرگىزەتىن قۇجاتى بولماي، جول ءتارتىبىن ەلەمەي، قارسى بەتكە شىعىپ جۇرگەنى ءۇشىن كۇدىكتى اكىمشىلىك كودەكستىڭ 4 بابى بويىنشا (667، 612، 613، 596) جاۋاپكەرشىلىككە تارتىلعان. ال ونىڭ جۇك كولىگى ايىپ تۇراعىنا قويىلدى.