جانىبەك حاننىڭ كەسەنەسىن زەرتتەۋ: جاپونيادا گەنەتيكالىق ساراپتاما جاسالۋدا

ارحەلوگيالىق قازبا جۇمىستارى كەزىندە تابىلعان زاتتار جاپونياعا گەنەتيكالىق ساراپتامادان وتكىزۋگە جىبەرىلدى. بۇل تۋرالى وبلىستىق مادەنيەت، ارحيۆتەر مەن قۇجاتتامالار باسقارماسى باسشىسىنىڭ مىندەتىن اتقارۋشى گۇلميرا بەكنازاروۆا جۋرناليستەرمەن وتكەن بريفينگتە ايتتى، دەپ حابارلايدى قازاقپارات ءتىلشىسى.

«2018 -جىلى وبلىستىق مۋزەيگە ارحەولوگيالىق قازبا جۇمىستارىن جۇرگىزۋ ءۇشىن بەرىلگەن ليتسەنزيانىڭ ارقاسىندا قورعالجىن اۋدانى اۋماعىندا ورنالاسقان جانىبەك حاننىڭ ورتاعاسىرلىق كەسەنەسىنىڭ قيراندىلارىن عىلىمي- زەرتتەۋ بويىنشا قولعا الىنعان جۇمىستار اياقتالۋعا تاياۋ. بۇل جوباعا 2019 -جىلى وبلىس اكىمدىگى تاراپىنان قارجىلاي قولداۋ كورسەتىلدى»، - دەيدى اقمولا وبلىسىنىڭ مادەنيەت، ارحيۆتەر مەن قۇجاتتامالار باسقارماسى باسشىسىنىڭ مىندەتىن اتقارۋشى گۇلميرا بەكنازاروۆا.

باسقارما باسشىسى اتاپ وتكەندەي، كەسەنەنى زەرتتەۋ جۇمىستارى 2 كەزەڭمەن جۇرگىزىلگەن. جانىبەك- شالقار كەسەنەسىنىڭ قيراندىلارىنان تابىلعان زاتتاردى جان- جاقتى زەرتتەگەننەن كەيىن عالىمدار وسىندا حان اۋلەتىنىڭ وكىلدەرى جەرلەنگەن دەگەن قورىتىندىعا كەلگەن.

«تابىلعان ارحەولوگيالىق جادىگەرلەر نۇر- سۇلتانداعى قازاقستان رەسپۋبليكاسىنىڭ ۇلتتىق مۋزەيىنە وتكىزىلىپ، سودان كەيىن رەسەيدەگى انتروپولوگيالىق كورىنىستى انىقتاۋ ءۇشىن جاپونياعا گەنەتيكالىق ساراپتاماعا جىبەرىلدى. زەرتتەۋ قورىتىندىسى بيىلعى جىلدىڭ سوڭىندا شىعارىلادى. ءبىراق ءبىز قازىردىڭ وزىندە تاريحي سەنساتسيانىڭ الدىندا تۇرمىز دەپ ۇمىتتەنەمىز»، - دەپ تولىقتىردى گۇلميرا بەكنازاروۆا.

ايتا كەتەيىك، وبلىستاعى 11 مۇراجاي ءوز جوبالارىن ىسكە اسىرۋدى توقتاتقان جوق. اعىمداعى كەزەڭدە 1595 ەكسكۋرسيا، 439 ءدارىس، 238 كورمە ۇيىمداستىرىلىپ، 936 مۇراجاي زاتتارى الىنىپ، وڭدەلگەن.