عالىمدار قازاق حالقىنىڭ گەنىن زەرتتەۋگە كىرىستى

ءارى گەنەتيكالىق زەرتتەۋدىڭ ارقاسىندا كەڭ تارالعان اۋرۋدىڭ الدىن الماق.

ادام د ن ق- سىنا زەر سالۋ نەمەسە عىلىمدا گەنەتيكالىق تالداۋ دەپ اتالىپ كەتكەن مۇنداي زەرتتەۋ قازىرگى تاڭدا قاتەرلى ىسىك پەن جۇرەك اۋرۋلارىن ەمدەۋگە قولدانىلۋدا. بۇل اۋرۋلاردىڭ سەبەبىن تابۋ قيىنداۋ. مۇنداي كەزدە دارىگەرلەر اۋرۋدىڭ سەبەبىن گەننەن ىزدەپ، ناقتى دياگنوز قويادى.

الايدا زەرتتەۋ ساپالى بولۋى ءۇشىن ونى سالىستىراتىنداي قولدا ارنايى گەن بازاسى بولعان ءجون. ال قازاقستاندىقتاردىڭ گەنىن ەۋروپالىقتارمەن نەمەسە جاپوندارمەن سالىستىرۋ اقىلعا قونىمسىز. قازاقستاندا مۇنداي بازا جوق. نازاربايەۆ ۋنيۆەرسيتەتىنىڭ National Laboratory Astana زەرتحاناسىنىڭ عالىمدارى ەل ازاماتتارىنىڭ گەنەتيكالىق قۇرىلىمىن زەرتتەۋگە جانە ورتاق بازا قۇرۋعا كىرىسۋىنىڭ ءمانى وسىندا.

قازىر عالىمدار جان- جاققا، ءوڭىر- وڭىرگە بارىپ بيوماتەريال جيناپ جاتىر.

جوباعا قاتىسۋشىلاردىڭ ءبىرى اينۇر اقىلجانوۆانىڭ ايتۋىنشا، ەل ازاماتتارىنىڭ گەنەتيكالىق قۇرىلىمىن زەرتتەۋ ارقىلى قازاقستاندا كەزدەسەتىن قاتەرلى اۋرۋلارعا باعا بەرۋگە جانە ونىڭ ەمىن تابۋعا بولادى.

ءارى قازاقستاندىقتاردىڭ ورتاق گەنەتيكالىق بازاسىن قۇرىپ، ونى حالىقارالىق بازالارمەن سالىستىرۋعا، سونىڭ نەگىزىندە ادامزات گەنومى كارتاسىنداعى ەلىمىزدىڭ «ورنىن» انىقتاۋعا بولادى.

«ءبىزدىڭ ماقسات، ءبىر جاعىنان، ازاماتتارىمىزدىڭ قانداي اۋرۋعا ءالسىز، قانداي پاتولوگيالىق اۋىتقۋدىڭ ءجيى كەزدەسەتىنىن انىقتاۋ بولسا، ەكىنشى جاعىنان، قازاق، ورىس، ۇيعىر جانە وزبەك حالىقتارىنىڭ ەۆوليۋتسيالىق تۇرعىدا قانشالىقتى ءبىر- بىرىنە جاقىن ەكەنىن انىقتاۋ. ودان ءارى كارىس، جاپون، اراب جانە ەۋروپا حالىقتارىمەن سالىستىرىپ كورەمىز»، - دەيدى اقىلجانوۆا.

عالىمدار قازاق، ورىس، وزبەك جانە ۇيعىر ۇلتتارىنىڭ د ن ق- سىن جيناپ جاتىر. بۇلار - ەلدە ەڭ كوپ تارالعان ۇلت پەن ەتنوستار.

ازىرشە العاشقى كەزەڭگە سايكەس، 500 ادامنىڭ بيوماتەريالى جينالدى. بارىنشا كوپ ماتەريال جيناۋ كوزدەلۋدە. ستاتيستيكالىق دەرەك كوپ بولعان سايىن ونىڭ شىنايىلىعى مەن ناقتىلىعى دا سوعۇرلىم جوعارى بولماق.

«ءبىر عانا ۇلتتىڭ گەنىن الىپ زەرتتەۋگە بولمايدى. ويتكەنى قازاقستان سان ۇلتتىڭ ارالاس- قۇرالاس بولعانى مەكەنى. ۇلى جىبەك جولى وتكەن، شىعىس پەن باتىس، ازيا مەن ەۋروپا بايلانىسقان مەكەن. سوندىقتان قازاق حالقىنىڭ ءوزى كورشىلەس جاتقان ءتۇرلى حالىقتارمەن قاتىناستا بولعاندىقتان، تەك قازاقتىڭ عانا گەنىن زەرتتەۋ ءبىرشاما اعاتتىق بولادى»، - دەيدى زەرتتەۋشى.

2019 -جىلدىڭ قاراشاسىنان بەرى عالىمدار اقمولا، قاراعاندى، قوستاناي وبلىستارىن ارالادى. بيىل پاندەمياعا بايلانىستى الماتى وبلىسىن ارالاۋعا مۇمكىندىك بولمادى.

عالىمدار جينالعان تۇتاس بيوماتەريالداردى زەرتتەۋ ءۇشىن جاساندى ينتەللەكت قولدانۋدى قۇپ كورۋدە.

Tengrinews.kz