قازاقتىڭ ءسوز قۇدىرەتى ۇلتتىق كلاسسيكالىق اندەردىڭ ماتىنىندە جاتىر - دەنيس ياكوۆليەۆ

بۇل تۋرالى «ۇلى دالانىڭ ۇلتارالىق ءتىلى» رەسپۋبليكالىق فورۋمىندا ق ر ۇلتتىق گۆاردياسى ءان- بي ءانسامبلىنىڭ كونسەرتمەيستەرى دەنيس ياكوۆليەۆ ايتتى، دەپ حابارلايدى قازاقپارات ءتىلشىسى.

«مەن 1991 -جىلى قوستاناي وبلىسى، امانقاراعاي اۋىلىندا تۋعانمىن. ۇلتتىم - ورىس. ن. وستروۆسكي اتىنداعى ورتا مەكتەپتى ءبىتىردىم. قازىر احمەت بايتۇرسىنوۆ اتىنداعى قوستاناي ايماقتىق ۋنيۆەرسيتەتىندە وقيمىن. مەن بالا كەزىمنەن ءان ايتامىن. العاشقى رەت ۇلكەن ساحنادا، قازاق تىلىندە باتىرحان شۇكەنوۆتىڭ «وتان انا» ءانىن ورىندادىم. ول كەزدە سەگىزىنشى سىنىپتا وقيتىن ەدىم. بۇل ءاندى ماعان مارقۇم ۇستازىم سەرەبروۆ ۆالەريي اناتوليەۆيچ ۇيرەتتى»، - دەيدى دەنيس ياكوۆليەۆ.

ول قازاقشا سويلەۋدى اسكەردە ۇيرەنگەنىن ايتتى. «اسكەري ورتا ماعان بارىنشا كومەكتەستى. قارۋلاس دوستارىم جاقىن تارتىپ، مەنىمەن قازاق تىلىندە سويلەستى. قازاق تىلىندە قالاي سويلەپ كەتكەنىمدى ءوزىم دە بايقاماي قالدىم. ءبىراق ۇيرەنەتىنىم ءالى دە كوپ. ەڭ قىزىعى، اسكەردەن كەيىن مۋزىكالىق كوللەدجگە تۇسكىم كەلگەن كەزدە، مەن تاڭداعان ماماندىق بويىنشا تەك قازاق توبى بولدى. سوسىن مەن نار تاۋەكەل دەپ كوزىمدى جۇمدىم دا ءتۇسىپ كەتتىم. ءتىل ۇيرەنگەنىمنىڭ ارقاسىندا، ومىرىمدە كوپتەگەن وزگەرىستەر ورىن الدى. تىڭداۋشىلارىمنىڭ اياسى دا، دوستارىم دا كوبەيدى. قىزمەت اتقارۋ بارىسىندا رەسپۋبليكالىق اسكەري اندەر كونكۋرسىنا قاتىسىپ، 2-ورىنعا يە بولدىم. كەيىن، وسى جەتىستىكتەر ۇلتتىق ۇلان ءان - بي انسامبلىنە قىزمەتكە تۇرۋعا كومەكتەستى. قازىر مەنىڭ رەپەرتۋارىمدا كوپ قازاقشا اندەر بار. ولاردىڭ ىشىندە: حالىق اندەرى، اۆتورلىق اندەر، تاعى وپەرادان ۇزىندىلەر بار»، - دەيدى ول.

ونىڭ ايتۋىنشا، ەندىگى ماقساتى - ۇلتتىق ونەرىمىزدى دارىپتەپ، قازىرگى جاستارعا ناسيحاتتاپ، دۇرىس باعىتتا كورسەتىپ، سونى جۇرەكتەرىنە جەتكىزە ورىنداۋ.

«ۇلتتىق ونەرىمىزدى، مادەنيەتىمىزدى، ءداستۇرلى اندەرىمىزدى ءجيى ناسيحاتتاۋىمىز كەرەك. ويتكەنى قازاقتىڭ ءسوز قۇدىرەتى، ءسوز مارجانى - ۇلتتىق كلاسسيكالىق اندەردىڭ ماتىنىندە جاتىر. قازاقتىڭ وسى كلاسسيكالىق ونەرىنەن ەتنوس وكىلدەرى باق سىنايتىن جوعارى دەڭگەيدەگى بايقاۋلار ۇيىمداستىرىلۋى ءتيىس. بۇل بايقاۋلاردىڭ باس جۇلدەسى ايتىسقا تىگىلەتىن كولىكپەن بىردەي بولماسا، كەم بولماۋى كەرەك. بۇل ءوز كەزەگىندە وزگە ەتنوس جاستارىنا قازاقتىڭ ونەرى مەن ءتىلىن بىلۋگە، ۇيرەنۋگە داڭعىل جول اشادى دەپ ويلايمىن»، - دەيدى دەنيس ياكوۆليەۆ.

اۆتور: زارينا قاھارمان