شەتەلدەن ۇشىپ كەلگەن قازاقستاندىقتار پ ت ر قورىتىندىسىن قانشا ۋاقىتتا الا الادى

بۇل تۋرالى كولىكتەگى باس مەملەكەتتىك سانيتارلىق دارىگەر ءسادۋاقاس بايعابىلوۆ ايتتى، دەپ حابارلايدى قازاقپارات.

«تۇركيادان شىمكەنتكە كەلگەن بارلىق اۋە جولاۋشىلارىنىڭ COVID-19 ۆيرۋسىنا تاپسىرعان پ ت ر- انىقتامالارى بولدى. 10 حالىقارالىق اۋە رەيسى، 1383 جولاۋشى ۇشىپ كەلدى. سونىڭ ىشىندە 1230 ادامنىڭ انىقتاماسى بار بولسا، قازاقستاننىڭ 153 ازاماتى انىقتاماسىز ۇشقان، سونىڭ ىشىندە: نۇر-سۇلتانعا - 3 اۋە رەيسى كەلدى، وندا 398 جولاۋشىسى بولعان، انىقتامامەن - 361 ادام، انىقتاماسىز - 37 ادام. الماتى قالاسىنا ۇشىپ قونعان 6 اۋە رەيسىمەن 899 جولاۋشى كەلگەن. سونىڭ ىشىندە 783 ادامنىڭ انىقتاماسى بار بولسا، 116 ادام انىقتاماسىز ۇشىپ كەلدى»، - دەدى ءسادۋاقاس بايعابىلوۆ جەلىدەگى پاراقشاسىندا.

ونىڭ ايتۋىنشا، قازاقستانعا ارنايى انىقتاماسىز ۇشىپ كەلگەن ەل ازاماتتارى پ ت ر تالداۋ تاپسىرۋ ءۇشىن نۇر-سۇلتان جانە الماتى قالالارىندا تەگىن كارانتيندىك ستاتسيونارلارعا جاتقىزىلادى.

«كارانتينگە جاتقىزىلعان قازاقستان ازاماتتارى پ ت ر قورىتىندىسىن تالداۋ تاپسىرىلعان كەزدەن 5-6 ساعات وتكەن سوڭ الادى. جولاۋشىلار حالىقارالىق اۋە رەيستەرىمەن ب ا ءا، تۇركيا، ۋكراينا، بەلارۋس، رەسەيدەن ۇشىپ كەلگەن ەدى. پ ت ر تەست تاپسىرۋ تۋرالى انىقتاما قاعاز ۇلگىسىندە دە، ەلەكتروندىق تاسىمالداۋشىدا دا (سمارتفون) جارامدى»، - دەپ تولىقتىردى ول.