رەفورمالار جونىندەگى جوعارى كەڭەس مەكەمەارالىق ۇزاق داۋلارعا نۇكتە قويۋى كەرەك – توقايەۆ
بۇل تۋرالى اقوردادا وتكەن رەفورمالار جونىندەگى جوعارى كەڭەستىڭ ءبىرىنشى وتىرىسىندا ق ر پرەزيدەنتى قاسىم- جومارت توقايەۆ ايتتى، دەپ حابارلايدى قازاقپارات ءتىلشىسى.
مەملەكەت باسشىسى ەل ازاماتتارىنىڭ تىڭ تاسىلدەر مەن ءتيىمدى شەشىمدەر كۇتەتىنىن، مۇنداي ساتتە رەفورمالار جونىندەگى جوعارى كەڭەستىڭ ماڭىزدى ءرول اتقاراتىنىن اتاپ ءوتتى.
كەڭەس ۇلتتىق ەكونوميكانىڭ باسەكەگە قابىلەتتىلىگىن نىعايتۋعا جانە تۇرعىنداردىڭ ءال- اۋقاتىن ارتتىرۋعا بايلانىستى اسا كۇردەلى ماسەلەلەر بويىنشا شەشىمدەر قابىلدايتىندىعىنا نازار اۋدارتتى. پرەزيدەنت ءوز سوزىندە كەڭەس قىزمەتى باسقا كونسۋلتاتيۆتىك- كەڭەستىك ورگانداردان تۇبەگەيلى ەرەكشەلەنۋى ءتيىس ەكەنىن، قوعامداعى وزەكتى ماسەلەلەردى نەمەسە ءتۇيىندى تۇيتكىلدەردى جاسىرماي اشىق ايتۋ قاجەت ەكەنىن باسا ايتتى.
«دەرەكتەردى ءتىزىپ، قالىپتاسقان جاعدايدى سيپاتتاۋمەن شەكتەلۋگە بولمايدى. باستىسى - ۋاقىتىلى شەشىم قابىلداۋ. كەڭەس ءىس جۇزىندە جۇزەگە اسپايتىن، الدىن الا ازىرلەنگەن ۇسىنىستاردى قۇپتاپ قانا وتىرماۋى ءتيىس. كەڭەس مەكەمەارالىق ۇزاق داۋلارعا نۇكتە قويۋى كەرەك. ۇلتتىق ەكونوميكانى باسقارۋدا، قوعامدىق دامۋدا، ينستيتۋتسيونالدىق رەفورمالار جۇرگىزۋدە جاڭا باعىتتار ۇسىنۋعا مىندەتتى. ارينە، قازىرگى جۇمىستاردى دا باقىلاۋى ءتيىس»، - دەدى قاسىم- جومارت توقايەۆ.
پرەزيدەنت كەڭەستىڭ كەلەسى وتىرىسىندا مەملەكەتتىك جوسپارلاۋ جۇيەسىندەگى جاڭا تاسىلدەردى قاراستىرۋدى جانە وسى ماسەلە بويىنشا شەشىم قابىلداۋدى ۇسىندى.
«ءبىز ءاربىر سالادا مەملەكەتتىڭ ماقساتتارى مەن دامۋ كەزەڭدەرىن ايقىندايتىن باعدارلامالىق قۇجاتتاردىڭ يكەمدى ارحيتەكتۋراسىن قۇرۋىمىز كەرەك. جۇيە بيۋدجەتتى جوسپارلاۋمەن بايلانىستىرىلادى جانە مەملەكەتتىك ورگاندار باسشىلارىنىڭ جۇكتەلگەن مىندەتتىڭ ورىندالۋىنا تىكەلەي جاۋاپتى ەكەنىن بەكىتەدى. جوعارى كەڭەستىڭ شەشىمدەرىنىڭ ورىندالۋىن، ۇلتتىق جوبالاردىڭ جۇزەگە اسىرىلۋىن، رەفورمالاردى جوبالىق باسقارۋ قاعيداتتارىنىڭ ەنگىزىلۋىن قامتاماسىز ەتۋ ماڭىزدى. قازىرگى كەزەڭدە بۇل - ستراتەگيالىق جوسپارلاۋ جانە رەفورمالار جونىندەگى اگەنتتىكتىڭ نەگىزگى مىندەتى»، - دەدى قازاقستان پرەزيدەنتى.
ەسكە سالايىق، بۇگىن مەملەكەت باسشىسى رەفورمالار جونىندەگى جوعارى كەڭەستىڭ ءبىرىنشى وتىرىسىن وتكىزدى.