ا ق ش- تا ەكى اپتادان كەيىن پرەزيدەنتتىك سايلاۋ وتەدى

بيىلعى سايلاۋدا داۋىس بەرۋ پروتسەسى ادەتتەگىدەن وزگەشە. ىندەتكە قاراماستان حالىق ازاماتتىق مىندەتىن بۇلجىتپاي اتقارىپ، بەلسەندىلىك تانىتىپ جاتىر. ا ق ش- تا ەكى اپتادان كەيىن وتەتىن پرەزيدەنتتىك سايلاۋعا ەل تۇرعىندارىنىڭ %20 ءى ءوز تاڭداۋىن جاساپ ۇلگەرگەن. رەسەي ەلىندەگى سايلاۋ دا سانيتارلىق تالاپقا سايكەس ۇيىمداستىرىلدى. ەندى ۋكراينا جۇرتى الداعى ساياسي شاراعا قامدانىپ جاتىر.

ارايلىم جاقسىلىق قىزى، ءتىلشى:

- ا ق ش- تا پرەزيدەنتتىك سايلاۋدىڭ باستالۋىنا تۋرا ەكى اپتا قالدى. الايدا سايلاۋشىلاردىڭ شامامەن %20 ءى ءوز تاڭداۋىن پوشتا ارقىلى جاساپ ۇلگەرگەن. جۇرگىزىلگەن ساۋالناما ناتيجەسى بويىنشا بيىل امەريكالىقتاردىڭ %40 ى پوشتا ارقىلى داۋىس بەرەدى. بۇل 2016 -جىلمەن سالىستىرعاندا ەكى ەسەگە كوپ. ەلدىڭ ءار شتاتىندا داۋىس بەرۋ ءتارتىبى ءارتۇرلى. ءتىپتى بيۋللەتەندەرگە ارناعان جاشىكتەردىڭ ءتۇرى دە ءبىر- بىرىنە ۇقسامايدى.

قازىر تۇرعىندار ىندەت ءورشىپ تۇرعان كەزدە ۆيرۋس جۇقتىرىپ الام دەپ قاۋىپتەنەدى. ءبىراق ساراپشىلار «الداعى ساياسي دودادا حالىقتىڭ قاتىسۋ بەلسەندىلىگى جوعارى بولاتىنىنا كۇمان جوق»، دەيدى. ازىرگە تەحاس، كاليفورنيا مەن فلوريدا شتاتىنىڭ تۇرعىندارى بەلسەندىلىك تانىتىپ، ەڭ كوپ داۋىس بەرگەن ايماقتار قاتارىندا.

دجۋلي ۋايز، كينگ وكرۋگى سايلاۋ كوميسسياسىنىڭ باسشىسى:

- بيىل سايلاۋداعى بەلسەندىلىك %90 كە دەيىن جەتەدى دەپ بولجايمىز. ماسەلەن ءقازىردىڭ وزىندە پوشتا ارقىلى 300 مىڭ بيۋللەتەن كەلدى. ءوز تاجىريبەمدە حالىقتىڭ سايلاۋعا ءدال وسىلاي قامدانۋ بەلسەندىلىگىن العاش رەت كورىپ وتىرمىن.

كيەۆين لاسك، سايلاۋشى:

- شىنىمدى ايتسام، تاڭداۋ جاساعاندا قاتتى قوبالجىدىم. قازىرگى كەزدە پوشتا ارقىلى داۋىس بەرگەن قاۋىپسىز دەپ ويلايمىن. دەنساۋلىقتىڭ قامىن دا ويلاۋ كەرەك.

***

وسىدان ءبىر اي بۇرىن رەسەيدىڭ بارلىق ايماقتارىندا ءبىرىڭعاي داۋىس بەرۋ كۇنى اياقتالدى. دودا كوروناۆيرۋس ىندەتى ءورشىپ تۇرعان كەزدە جوسپارلانعاندىقتان 3 كۇن ءوتتى. زەينەركەرلەر مەن مۇمكىندىگى شەكتەۋلى جانداردىڭ ۇيىنە كوميسسيا وكىلدەرى كەلگەن. كەي ازاماتتار مەملەكەتتىك قىزمەتتەردىڭ ءبىرىڭعاي پورتالى ارقىلى ونلاين داۋىس بەردى. سايلاۋ ۋچاسكىلەرىندە بارلىق سانيتارلىق نورمالار قاتاڭ ساقتالدى.

***

كوروناۆيرۋس ىندەتى ۋكراينادا دا جەرگىلىكتى سايلاۋدىڭ وتۋىنە كەدەرگى ەمەس. ساياسي دودا وسى ايدىڭ 25-ىنە جوسپارلانعان. ماماندار داۋىس بەرۋشىلەرگە «مىندەتتى تۇردە ماسكا تاعىپ كەلۋ كەرەك» دەگەن تالاپ قويدى. ال، سايلاۋ كوميسسياسىنىڭ مۇشەلەرى بەتپەردە، قولعاپ پەن ارنايى كوزىلدىرىكپەن وتىرادى.

www.24.kz