ماسكا تاعىپ ءجۇرۋ ىندەت جۇقتىرماۋعا جاردەمدەسەدى - پروفەسسور

None
None
ورال. قازاقپارات - ماسكا تاعىپ ءجۇرۋ ىندەت جۇقتىرماۋعا جاردەمدەسەدى.

بۇل تۋرالى م. ايكىمبايەۆ اتىنداعى اسا قاۋىپتى جۇقپالى اۋرۋلار ۇلتتىق عىلىمي ورتالىعىنىڭ پروفەسسورى، مەديتسينا عىلىمدارىنىڭ دوكتورى اندرەي دميتروۆسكي ءمالىم ەتتى، دەپ حابارلايدى قازاقپارات ءتىلشىسى.

الماتىدان ارنايى كەلگەن ا. دميتروۆسكي ارىپتەستەرى، مەديتسينا عىلىمدارىنىڭ دوكتورى مارات سىزدىقوۆ، اندرەي كۋزنەتسوۆ جانە بيوقورعاۋ، بيوقاۋىپسىزدىك پەن دەزينفەكسيا جونىندەگى مامان تاتيانا لياتومسكايامەن بىرگە ورالدا ۇيىمداستىرىلعان سەمينار- ترەنينگتەرگە قاتىستى.

وندا باتىسقازاقستاندىق ينفەكسيونيستەر مەن ەپيدەميولوگتارعا بيولوگيالىق قاۋىپسىزدىك قاعيدالارى، COVID-19 پەن اۋىرعان ەمدەلۋشىلەرمەن جۇمىس كەزىندە ينفەكسيالىق باقىلاۋ ەرەجەلەرى مەن ءتارتىبى جونىندە كەڭەس بەرىلدى.

سونىڭ ىشىندە وبلىستىق كوپبەيىندى اۋرۋحانا بازاسىندا 70 مەديتسينا قىزمەتكەرى قاتىسقان شارادا كوروناۆيرۋستىق ينفەكسيانىڭ ادامدار اراسىندا تارالۋى، قوزدىرعىشىنىڭ قورشاعان ورتاعا توزىمدىلىگى، ك ۆ ي ەپيدەميولوگياسىنىڭ ەرەكشەلىكتەرى، ىندەتتىڭ الدىن الۋ جانە كۇرەس ماسەلەلەرى تالقىلاندى.

سونداي-اق بيوماتەريالداردى قاۋىپسىز الۋ، تاسىمالداۋ دا نازاردان تىس قالمادى. كەزدەسۋ بارىسىندا ماماندار قورعانىش كوستيۋمدەرىن قالاي كيۋ جانە شەشۋ، مەديتسينا قالدىقتارىن قالاي دۇرىس جويۋ جولدارىن كورسەتتى. الماتىلىق مامانداردىڭ جۇقپالى اۋرۋلارمەن كۇرەستە تاجىريبەسى مول، قازاقستاندا 1949 -جىلى قۇرىلعان اتالمىش ورتالىقتا كوپتەن بەرى جۇمىس ىستەپ كەلەدى. سونىڭ ىشىندە اندرەي دميتروۆسكييدىڭ وسىندا ەڭبەك ەتكەنىنە 41 جىل تولدى. ول دوكتورلىق ديسسەرتاتسياسىن وبانىڭ كلينيكالىق كورىنىستەرى مەن ونىمەن اۋىرعان ناۋقاسقا مەديتسينالىق كومەك كورسەتۋ جۇيەسى بويىنشا قورعاعان. 5 عىلىم كانديداتىن، 2 دوكتوردى دايىنداعان مامان - 300 دەن استام عىلىمي جۇمىستىڭ اۆتورى، ەكى پاتەنتى جانە بار. پاندەميا كەزىندە عالىم ارىپتەستەرىمەن بىرگە جاڭا ىندەتپەن كۇرەس جولدارىن زەرتتەۋدە. ونىڭ ايتۋىنشا، كوروناۆيرۋستان ساقتانۋدىڭ ەكى ءتاسىلى بار، ول ماسكا تاعۋ جانە وقشاۋلانۋ.

«اۋرۋ كوزى مەن ونىمەن بايلانىس جاسايتىن ادام ماسكا تاقسا، جۇقتىرۋ مۇمكىندىگى 100 دەن 1 پايىزعا دەيىن تومەندەيدى. ماسكا - ەڭ قاراپايىم ءارى ءتيىمدى قۇرال. نەگىزى بىررەتتىك مەديتسينا ماسكالارىن ىلعالدانعانشا قولدانعان دۇرىس. ىلعال تولىپ قالسا، ماسكا ساپاسىن جويادى، سوندىقتان ونى اۋىستىرعان ءجون»، دەيدى اندرەي ميحايلوۆيچ.

ونىڭ پايىمداۋىنشا، پاندەميا تۇرعىنداردىڭ 90 پايىزى يممۋنيتەت العانعا دەيىن سوزىلادى، ياعني ىندەت جۇقتىرمايدى نەمەسە قانداي دا ءبىر تۇرىمەن اۋىرىپ شىعادى. الەمدە ىندەتكە قارسى ۆاكسينا بيىلعى جىل سوڭىندا دايىن بولادى دەپ بولجانۋدا.

ول بەكىتىلگەن حالىقارالىق كريتەريلەر بويىنشا جاسالۋدا. ۆاكسينانى تەز جاساۋعا بولادى، ءبىراق ونى سىناۋ بەلگىلى ءبىر ۋاقىتتى قاجەت ەتەدى. ول اۋەلى جانۋارلارعا سىنالادى. سوسىن ەرىكتىلەردىڭ العاشقى توبىنا جاسالادى، سولاي جالعاسا بەرەدى. بۇل كەمىندە ءبىر جىلعا سوزىلادى. عالىمنىڭ سوزىنە قاراعاندا، رەسەي مەن قىتاي وسى ساتىلاردىڭ بارىنەن وتپەستەن، بىردەن ەرىكتىلەردى سىناپ كورە باستادى. بۇل - سىناۋ مەرزىمىن قىسقارتىپ، سوڭعى ناتيجەگە جەتۋدىڭ ءبىر جولى. ەگەر ەكپە جاسالماسا، ىندەتتى بۇكىل دۇنيە ءجۇزىنىڭ حالقى جۇقتىرۋى مۇمكىن. ۆاكسينا قولدانىلعاننان كەيىن ۆيرۋس ءبىرجولا جويىلا ما، ونى ايتۋ دا قيىن.

«ىندەتكە قارسى تۇرۋ ءۇشىن بىزگە كوپتەن قالىپتاسقان مەنتاليتەتىمىزدى وزگەرتۋگە تۋرا كەلەدى. ياعني كوپ بولىپ جينالىپ، مەرەكەلەردى اتاپ وتۋدەن، قوناققا بارۋدان باس تارتۋ كەرەك. قاشىقتان قارىم- قاتىناس جاساۋعا دا بولادى عوي. ۇيدە وقشاۋلانىپ، كوشەگە شىققاندا، قوعامدىق ورىندارعا بارعاندا، ماسكا تاعۋ كەرەك»، دەپ تۇيىندەدى ويىن ا. دميتروۆسكي.

ەسكە سالا كەتەيىك، بۇدان بۇرىن ب ق و- دا رەسەي شەكاراسىنان قازاقستانعا وتكەن 8 ادامنان كوروناۆيرۋس انىقتالعانىن، وڭىردە شەكتەۋ شارالارى كۇشەيتىلگەنىن جازعان بولاتىنبىز.

اۆتور: ەلجان ەرالى

سوڭعى جاڭالىقتار