د د س ۇ الەم ەلدەرىنىڭ ىندەتپەن كۇرەسىن باعالادى

دۇنيەجۇزىلىك دەنساۋلىق ساقتاۋ ۇيىمىنىڭ عالامدىق دايىندىق جونىندەگى كەڭەستىڭ (Global Preparedness Monitoring Board) جاڭا ەسەبىندە وسىلاي دەپ جازىلعان.

14-قىركۇيەكتە جاريالانعان ەسەپتە دەنساۋلىق ساقتاۋ سالاسى ساراپشىلارىنىڭ جىلدار بويعى ەسكەرتۋىنە قاراماستان الەم ەلدەرىنىڭ ىندەتكە دايىندىققا از قاراجات جۇمساعانى جازىلعان. بايانداماعا سايكەس، كوپتەگەن ەل باسشىلارى عىلىمي، ۇزدىك تاجىريبەلەر مەن ايعاقتارعا سۇيەنە وتىرىپ، ەرتەرەك شەشىم قابىلداۋ مۇمكىندىگىن جىبەرىپ العان. سونىڭ كەسىرىنەن قوعامدا «سەنىمسىزدىك بويلاپ، ىندەتكە توتەپ بەرۋ كۇردەلەنگەن».

بىلتىر جىل سوڭىندا قىتايدا پايدا بولعالى بەرى كوروناۆيرۋستىڭ جاڭا ءتۇرى كەمىندە 29 ميلليون ادامعا جۇققان، 925 مىڭنان استام ادام قايتىس بولعان. پاندەميا ەكونوميكانى كۇيرەتىپ، الەۋمەتتىك سالانى كۇيزەلتتى. بايانداما اۆتورلارىنىڭ ەسەبىنشە، الەم covid-تىڭ كەسىرىنەن 11 تريلليون دوللار شىعىنعا ۇشىراعان.

الەم بويىنشا ۆيرۋس جۇقتىرعانداردىڭ جارتىسى - امەريكادا. ا ق ش، برازيليا، مەكسيكا الەمدە پاندەميادان كوبىرەك زارداپ شەككەن ەلدەردىڭ ءبىرى. 13-قىركۇيەكتە ددسۇ ۆيرۋس جۇقتىرعاندار سانىنىڭ ءبىر كۇندە بۇرىن-سوڭدى بولماعان جوعارى كورسەتكىشكە جەتكەنىن حابارلادى: 24 ساعات ىشىندە الەمدە 307930 ادامنان كوروناۆيرۋس ينفەكسياسى انىقتالعان. ەۋروپادا اتاپ ايتقاندا، يسپانيا، فرانسيادا سوڭعى اپتالاردا ىندەتتىڭ ءورشۋى بايقالعان.

ورتالىق ازيادا بۇعان دەيىن وزبەكستان كوروناۆيرۋس جۇقتىرعاندار سانىنىڭ كوبەيگەنىن حابارلاعان. 10-قىركۇيەكتە ءبىر كۇندە 749 ادامنان ۆيرۋس تابىلعان. ەلدە ۆيرۋس جۇقتىرعانداردىڭ جالپى سانى 48 مىڭنان اسقان، 400 ادام قايتىس بولعان. كوروناۆيرۋس بارىن مويىنداماي كەلە جاتقان تۇركىمەنستاندا وسىعان دەيىن اۋرۋحانالاردىڭ تولىپ كەتكەنى، رەسپيراتورلىق اۋرۋعا شالدىققانداردىڭ كۇرت ۇلعايعانى حابارلانعان.

تاجىكستاندا سوڭعى اقپارات بويىنشا، 9088 ادامنان كوروناۆيرۋس تابىلعان، 72 ادام قايتىس بولعان. قىرعىزستاندا ۆيرۋس جۇقتىرعاندار 44999 ادامعا جەتكەن، 1063 ادام قايتىس بولعان. قازاقستاندا كوروناۆيرۋسقا ۇقساس پنيەۆمونياعا شالدىققانداردى قوسقاندا ۆيرۋس جۇقتىرعاندار 136 مىڭنان اسقان، 2000 نان استام ادام قايتىس بولعان.

azattyq.org