جامبىل وبلىسىندا قاراسورا وڭدەيتىن زاۋىت سالىنۋى مۇمكىن

وتىرىسقا ايماق باسشىسى بەردىبەك ساپاربايەۆ، وبلىس پروكۋرورى نۇرعالىم ءابدىروۆ، ۇ ق ك باسشىسى مارات يرمەنوۆ، پوليتسيا دەپارتامەنتىنىڭ باستىعى جانات سۇلەيمەنوۆ قاتىستى. ايتا كەتۋ كەرەك، كەزدەسۋگە دەيىن وبلىس اكىمى جابايى قاراسورا وسەتىن ۇلكەن القاپتارعا يە شۋ جانە مەركى اۋداندارىنىڭ اۋماعىنداعى «قاراسورا - 2020» جەدەل- الدىن الۋ شاراسىنىڭ بارىسىمەن تانىستى.

«پرەزيدەنت قاسىم- جومارت توقايەۆ ەسىرتكى تاراتۋعا قاتىستى جازانى قاتاڭداتۋدى تاپسىردى. قۇقىق قورعاۋ ورگاندارى ەسىرتكى قۇرالدارىنىڭ زاڭسىز اينالىمىنا قارسى تۇرۋدا، تىيىم سالىنعان پرەپاراتتاردىڭ ەنۋىنە جانە ولاردى وتكىزۋ فاكتىلەرىنىڭ جولىن كەسۋدە. جىل سايىن «دەلتا- دولينا» ەسىرتكى بيزنەسىنە قارسى كۇرەس بويىنشا ايماقارالىق ءبولىم قىزمەتكەرلەرى ەسىرتكى تاسىمالداۋشىلاردى قۇرىقتاۋ ماۋسىمىن جۇرگىزەدى. ناشاقورلىقتىڭ الدىن الۋعا ەرەكشە كوڭىل بولىنەدى»، - دەپ اتاپ ءوتتى وبلىس اكىمى.

پوليتسيا دەپارتامەنتىنىڭ باستىعى جانات سۇلەيمەنوۆتىڭ ايتۋىنشا، جىل باسىنان بەرى 423 ەسىرتكى قىلمىسى تىركەلگەن، ونىڭ ىشىندە تىيىم سالىنعان زاتتاردى ساتۋدىڭ 82، اسا ءىرى مولشەردە ساقتاۋدىڭ 45، قۇرامىندا ەسىرتكى بار وسىمدىكتەردى ءوسىرۋدىڭ 22 فاكتىسى بار. بارلىعى 2,4 توننادان استام ەسىرتكى، ونىڭ 1,9 تونناسى «قاراسورا» جەدەل الدىن الۋ شاراسى اياسىندا تاركىلەنگەن. پوليتسيانىڭ كۇشىمەن ءبىر كەلىدەن استام گەروين مەن وسىنشا مولشەردەگى سينتەتيكالىق ەسىرتكى، 55 كەلى گاشيشتىڭ دايىندالۋى مەن تاسىمالدانۋىنا جولى كەسىلدى. پوليتسيا ەرىكتىلەرمەن بىرگە ۇيلەر مەن عيماراتتاردىڭ قابىرعالارىنان 550-دەن استام گراففيتيدى جازبا جويىلىپ، ينتەرنەتتەگى 50 دەن استام سايت بۇعاتتالعان.

«جامبىل وبلىسىنىڭ اۋماعىندا ءجۇز مىڭ گەكتاردان استام جابايى قاراسورا بار. كاننابيستى مەديتسينالىق ماقساتتا زەرتتەۋ جانە پايدالانۋ قازىرگى تاڭدا قارقىن الۋدا. باسقا ەلدەردىڭ ءتيىمدى تاجىريبەسىن نەگىزگە الا وتىرىپ، كاننابيستى دارىلىك ماقساتتاردا پايدالانۋعا مۇمكىندىك بەرەتىن قاۋىپسىز جانە ءتيىمدى جۇيەنى قۇرۋدىڭ ۋاقىتى جەتتى دەپ ويلايمىن. بۇل جوبا ءوڭىردىڭ الەۋمەتتىك- ەكونوميكالىق دامۋىنا ءوز ۇلەسىن قوساتىنى ءسوزسىز»، - دەدى بەردىبەك ساپاربايەۆ.

اتالعان جوبانىڭ جۇزەگە اسۋىنا ينۆەستورلار دا مۇددەلى. «Zhana Zhol Holding limited» ج ش س ديرەكتورى الەكساندر كيم جامبىل وبلىسى اۋماعىندا مەديتسينالىق كاننابيس ءوسىرۋ مەن ءوندىرۋ بويىنشا جوباسىن ۇسىندى. ول كاننابيستىڭ وندىرىستىك ماقساتتاعى اينالىمى جونىندەگى وزگە ەلدەردىڭ تاجىريبەسى تۋرالى ايتىپ بەردى. كومپانيا عىلىمي- زەرتتەۋ جۇمىستارىن دامىتىپ، قاراسورانى ءوسىرۋ مەن ءوندىرۋ باعىتىنداعى زاماناۋي تەحنولوگيالاردى ەنگىزىپ، كەيىن ءدارى- دارمەك وندىرىسىنە قاجەتتى كومپونەنتتەردى الۋدى كوزدەپ وتىر. ونىڭ ۇستىنە جەرگىلىكتى تۇرعىندار ءۇشىن جاڭا جۇمىس ورىندارى اشىلماق.

«ءوڭىردىڭ كليماتتىق جاعدايى، گەوگرافيالىق ورنالاسۋى دارىلىك زاتتاردىڭ شيكىزاتىن زەرتتەۋگە، قايتا وڭدەۋگە، وندىرۋگە مۇمكىندىك بەرەدى»، - دەپ اتاپ ءوتتى الەكساندر كيم.

ول جوبانى 4 كەزەڭدە جۇزەگە اسىرۋدى ۇسىنىپ وتىر. ونىڭ اياسىندا زەرتتەۋ جۇمىستارى جۇرگىزىلىپ، قولدانىستاعى زاڭناماعا وزگەرىستەر ەنگىزىلمەك. سونداي- اق، جاڭا ەكونوميكالىق كلاستەر جاساقتالادى. بەردىبەك ساپاربايەۆ مۇدەللى تاراپتاردىڭ بىرلەسە جۇمىس اتقارۋى ماڭىزدى ەكەنىن اتاپ ءوتتى.

«العاشقى كەزەڭدە پيلوتتىق جوبانى جۇزەگە اسىرۋ قاجەت. وسىلايشا ءبىز تاۋەكەلگە جول بەرمەيمىز. جەرگىلىكتى مەملەكەتتىك ورگاندار مينيسترلىكتەرمەن تىعىز قارىم- قاتىناستا جۇمىس اتقارىپ، جوبانى سوزبالاڭعا سالماۋى كەرەك»، - دەپ تۇيىندەدى بەردىبەك ساپاربايەۆ.