ەۋروپادا كوروناۆيرۋس تاعى دا ءورشىدى

دۇنيەجۇزىلىك دەنساۋلىق ساقتاۋ ۇيىمى (د د س ۇ) ەۋروپاداعى جاعدايدىڭ ىندەت قاتتى ورشىگەن ناۋرىزداعى جاعدايدان الدەقايدا اۋىر ەكەنىن مالىمدەدى.

«تەك وتكەن اپتانىڭ وزىندە عانا الەمدە ۆيرۋستى جۇقتىرۋدىڭ 300 جاڭا جاعدايى تىركەلدى»، - دەپ مالىمدەدى د د س ۇ- نىڭ ەۋروپا بويىنشا وڭىرلىك ديرەكتورى حانس كليۋگە. ناۋرىز ايىنىڭ سوڭىندا ەۋروپادا ۆيرۋس جۇقتىرۋدىڭ جاڭا جاعدايلارى 26475 كە جەتتى. «جاعداي وتە مۇشكىل»، - دەدى كليۋگە.

ەۋروپانىڭ كوپتەگەن ەلىندە قازىر سوڭعى بىرنەشە ايداعى ەڭ جوعارعى كورسەتكىشتەر تىركەلۋدە. كليۋگەنىڭ سوزىنشە، ۆيرۋستىڭ الەم ەلدەرى اراسىندا تاراۋ كورسەتكىشى دە ءوسىپ كەلەدى. «شىلدەدە اۋرۋ جۇقتىرۋ كورسەتكىشى تومەن بولاتىن. ال قىركۇيەكتەگى كورسەتكىشتەر بىزگە ەسكەرتۋ ىسپەتتەس بولۋى كەرەك ەدى»، - دەدى ول.

ىندەتتىڭ تاراۋ كورسەتكىشى ءوسىپ وتىرعان ەلدەردىڭ ءبىرى نيدەرلاندى. بۇل ەل جاقىندا بريتانيانىڭ «قىزىل تىزىمىنە» ەندى. قازىر نيدەرلاندىدان كەلەتىندەر 14 كۇنگە وقشاۋلاندىرىلۋى ءتيىس. ال يسپانيادا ستۋدەنتتەر كوشەگە شىعىپ، جوعارى وقۋ ورىندارى مەن مەكتەپتەردەگى قاۋىپسىزدىكتى نىعايتۋدى تالاپ ەتتى. ناقتىراق ايتقاندا ولار تازالىق ستاندارتتارىن جەتىلدىرىپ، ۇستازداردىڭ جەكە قاۋىپسىزدىك قۇرىلعىلارىمەن قامتاماسىز ەتىلۋىن تالاپ ەتىپ وتىر. سوڭعى تاۋلىكتەردە بۇل ەلدە كوروناۆيرۋستان 239 ادام قايتىس بولدى. بۇل ماۋسىم ايىنان كەيىنگى ەڭ ۇلكەن كورسەتكىش.

اۋرۋ ءجۇقتىرۋ جاعدايلارى اسىرەسە مادريدتە كوبەيدى. فرانتسيادا كاسىپوداق ۇيىمدارىنىڭ وكىلدەرى باس كوتەرمەك. ولار ەكونوميكامەن بايلانىستى ماسەلەلەردى شەشۋ ءۇشىن ۇكىمەت تاراپىنان قولعا الىنىپ وتىرعان شارالار جەتكىلىكسىز دەپ ەسەپتەيدى. بيلىكتىڭ بولجامىنشا، 2020 -جىلى 800 مىڭنان استام ادام جۇمىسىنان ايىرىلۋى مۇمكىن. فرانتسيادا سوڭعى تاۋلىكتەردە COVID-19 جۇقتىرۋدىڭ 10 مىڭ جاڭا جاعدايى تىركەلگەن. گەرمانيادا سوڭعى 24 ساعاتتا ۆيرۋس جۇقتىرعاندار سانى بيىلعى جىلدىڭ ءساۋىر ايىنان بەرگى ۋاقىتتاعى ەڭ جوعارعى كورسەتكىش بولىپ وتىر.