ورالدا «جايىقتىڭ قوس قىرانى» اتتى رەسپۋبليكالىق اقىندار ايتىسى وتەدى
ب ق و مادەنيەت باسقارماسى ءمالىم ەتكەنىندەي، جۇباننىڭ 100 جىلدىعى مەن قادىردىڭ 85 -جىلدىعى وڭىردە 25-27 - قىركۇيەك كۇندەرى اتالىپ وتىلەدى. العاشقى كۇنى اقجايىق اۋدانى ورتالىعى چاپايەۆ اۋىلىندا جۇبان ورتالىعى اشىلادى. ورال قالاسىندا وتەتىن «جايىقتىڭ قوس قىرانى» رەسپۋبليكالىق ايتىسى ەكى كۇنگە سوزىلماقشى. ورالدا جۇبان ەسكەرتكىشى، سونداي- اق اباي داڭعىلى اشىلادى. قادىر مىرزا ءالي ەسكەرتكىشىنە گۇل شوقتارى قويىلىپ، اقىن اتىنداعى وبلىستىق مادەنيەت جانە ونەر ورتالىعىندا «قازاقتىڭ قادىرى» وبلىستىق جىر ءمۇشايراسىنىڭ جەڭىمپاز- جۇلدەگەرلەرى ماراپاتتالادى.
ج. مولداعاليەۆ اتىنداعى وبلىستىق عىلىمي امبەباپ كىتاپحاناسىندا «جۇبان جىرلارى - عاسىر ءۇنى» اتتى حالىقارالىق عىلىمي- پراكتيكالىق كونفەرەنتسيا وتەدى. ح. بوكەيەۆا اتىنداعى وبلىستىق قازاق دراما تەاترىندا «جۇبان» ەنتسيكلوپەدياسىنىڭ تۇساۋى كەسىلىپ، «قيال قاناتى» ، «جۇبان وقۋلارى» بايقاۋلارىنىڭ جەڭىمپازدارىنا قۇرمەت كورسەتىلەدى. تەاتردا «جۇبان» سپەكتاكلىنىڭ پرەمەراسى قويىلادى. ەسكە سالا كەتەيىك، بۇدان بۇرىن ورالدا جۇبان اقىننىڭ 100 جىلدىعىنا ارنالعان بايقاۋدىڭ مارەگە جەتكەنىن جازعان بولاتىنبىز.