جايىق وزەنىنىڭ جاعدايى قازاقستان- رەسەي فورۋمىندا كەڭىنەن تالقىلانادى

قاراشا ايىندا كوكشەتاۋ قالاسىندا قازاقستان مەن رەسەي ەلدەرى شەكارالىق ارىپتەستىگى فورۋمى وتەدى. جيىندا نەگىزگى باسىمدىق جايىق وزەنىنىڭ جاعدايىن تالقىلاۋعا بەرىلەدى. بۇل تۋرالى ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ باتىس قازاقستان وبلىسى جۇرتشىلىعىمەن بولعان ونلاين- كەزدەسۋدە مالىمدەدى.

«ءبىزدىڭ مينيسترلىكتىڭ باستاماسىمەن وسى جىلى قاراشادا كوكشەتاۋدا وتەتىن شەكارالىق ارىپتەستىك فورۋمىندا باسىمدىق جايىق وزەنىنىڭ جاعدايىنا، جايىق وزەنىندەگى پروبلەمالارعا بەرىلەدى. ءبىز رەسەي فەدەراتسياسىنا بىرنەشە رەت بارىپ، بۇل ماسەلەلەردى كوتەرگەنبىز»، - دەدى م. مىرزاعاليەۆ.

ونلاين- كەزدەسۋگە قاتىسقان ەكولوگيا مينيسترلىگى شەكارالىق وزەندەر دەپارتامەنتىنىڭ ديرەكتورى ءاليا شالابەكوۆا وزەندە گيدرولوگيالىق زەرتتەۋ جۇرگىزۋ تۋرالى كەلىسىمگە قول جەتكىزىلگەنىن ايتتى. اتالعان زەرتتەۋدە گيدروتەحنيكالىق عيماراتتاردىڭ وزەنگە اسەرى دە ەسكەرىلەدى.

Zoom-جۇزدەسۋ بارىسىندا باتىس قازاقستان وبلىسى تۇرعىندارى مينيسترلىك وكىلدەرىمەن وڭىردەگى ەكولوگيالىق پروبلەمالاردى شەشۋگە ارنالعان جول كارتاسى جوباسىن دا تالقىلادى. جوسپار ەكولوگيانى جاقسارتۋعا نەگىزدەلگەن جيىرماعا جۋىق ءىس- شارادان تۇرادى. ونىڭ ىشىندە مەملەكەتتىك ورمان قورىنداعى جاسىل القاپتار اۋماعىن 2025 -جىلعا دەيىن 782 گەكتاردان 1200 گەكتارعا جەتكىزۋ، جولاۋشىلار كولىگىندە ديزەل وتىنىن پايدالانۋعا تىيىم سالۋ، وندىرىسكە قالدىقتار مونيتورينگىنىڭ اۆتوماتتاندىرىلعان جۇيەسىن ەنگىزۋ جانە تاعى باسقا اتقارىلاتىن جۇمىستار بار. جول كارتاسى حالىقتىڭ ۇسىنىستارى ەسكەرىلىپ، ەكى اپتا ىشىندە دايىندالىپ بىتەدى.