قۇس تۇماۋى ادامعا جۇعۋى مۇمكىن - ماماندار

None
None
پەتروپاۆل. قازاقپارات - سولتۇستىك قازاقستان وبلىسىندا قۇس تۇماۋىنىڭ تارالۋىنا بايلانىستى ماماندار تۇرعىندارعا ءبىرقاتار ساقتىق شاراسىن ۇستانۋ قاجەتتىگىن ەسكەرتەدى.

ويتكەنى بۇل اۋرۋ ادامعا جۇعادى، دەپ حابارلايدى قازاقپارات ءتىلشىسى.

جوعارى پاتوگەندى قۇس تۇماۋى ادام ءۇشىن قاۋىپتى. مامانداردىڭ ايتۋىنشا، نەگىزىنەن ول اۋرۋ قۇستىڭ ەتى مەن جۇمىرتقاسىن پايدالانعاننان جۇعادى.

«قانداي بولماسىن ۆيرۋس 70 گرادۋستان ارتىق ىستىق تەمپەراتۋرادا ولەدى. سول سەبەپتى شيكىدەي پىسكەن جۇمىرتقانى جەۋگە بولمايدى. كىمنىڭ يممۋنيتەتى ناشار، تىنىس الۋ مۇشەلەرىنىڭ سوزىلمالى اۋرۋلارى بار - ولار دا قۇس تۇماۋىن جۇقتىرىپ، اۋرۋى مۇمكىن. بۇعان دەيىن دە وڭىردە قۇس تۇماۋى تىركەلدى. الايدا ازىرشە ادامدار ونى جۇقتىرعان جوق»، - دەيدى ق ر ا ش م ۆەتەرينارلىق باقىلاۋ جانە قاداعالاۋ كوميتەتىنىڭ وبلىستىق اۋماقتىق يسپەكسياسىنىڭ جەتەكشىسى مارات يبرايەۆ. قۇس تۇماۋىن جۇقتىرعان ادامدا ونىڭ بەلگىلەرى تەك ءۇش كۇننەن كەيىن عانا بىلىنە باستايدى. كادىمگى تۇماۋدان ايىرماشىلىعى جوق: ادامنىڭ دەنە قىزۋى كوتەرىلەدى، بۋىندارى سىرقىراپ اۋىرىپ، تاماعى قىزارادى، جوتەل پايدا بولادى. كەيدە كونيۋكتيۆيت پايدا بولادى ەكەن. «اۋرۋ اسقىنعان جاعدايدا وكپە- جۇرەك جەتىسپەۋشىلىگى پايدا بولادى. وكپە ءىسىپ، پنەۆمونياعا ۇلاسۋى مۇمكىن. قان تامىرلارىنىڭ جۇمىسى بۇزىلىپ، ءىش وتەدى، قۇسىپ، مي ءىسىنىپ كەتەدى. قۇس تۇماۋىن جۇقتىرعان ادام ادەتتەگى تۇماۋداعى پرەپاراتتارمەن ەمدەلەدى»، - دەيدى س ق و تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ ءبولىم باسشىسى يۋليا گايسينا.

مامانداردىڭ ايتۋىنشا، قۇس تۇماۋىنىڭ الدىن الۋعا بولادى. ول ءۇشىن قۇستى قاماپ ۇستاۋ قاجەت. ال اۋرۋدىڭ بەلگىلەرى پايدا بولعان جاعدايدا بىردەن ۆەتەرينار ماماندارعا حابارلاعان ءجون. قۇستى باعۋعا كيەتىن ارنايى كيىم بولۋى قاجەت. ونى ۇنەمى جۋىپ، تازالاپ وتىرعان ءجون.

«قۇسقا بەرىلەتىن جەمازىقتى جابايى قۇستار كىرمەيتىندەي جابىق ۇستاۋ كەرەك. ال قۇس ەتى مەن جۇمىرتقاسىن رۇقسات ەتىلمەگەن جەرلەردە ساۋدا جاساۋشىلاردان الماۋ قاجەت. سۋدى قايناتىپ ىشۋگە نەمەسە بوتەلكەدەگى سۋدى پايدالانۋعا كەڭەس بەرەمىز. قولدى ءجيى جۋىپ، ماسكا تاعىڭىز جانە ءبىر رەتتىك سۋلىقتاردى پايدالانىڭىز. جالپى تۇماۋدان ساقتانۋدىڭ جاقسى جولى - ارنايى ەكپە ەككىزۋ. ال اۋرۋدىڭ العاشقى بەلگىلەرى پايدا بولعان جاعدايدا بىردەن دارىگەرگە كورىنگەن ءجون»، - دەيدى يۋليا گايسينا.

بۇعان دەيىن س ق و-نىڭ 7 اۋدانىندا قۇس تۇماۋىنىڭ وشاعى انىقتالعانىن، قۇس تۇماۋىنىڭ بەلەڭ الۋىنا بايلانىستى 10 ەلدىمەكەننىڭ كارانتينگە جابىلعانىن ايتقان ەدىك. سونداي-اق س ق و- دا ءۇي قۇستارىنا قۇس تۇماۋىنا قارسى ۆاكتسينا ەگىلەتىنى حابارلاندى.

اۆتور: اقەركە داۋرەنبەك قىزى


سوڭعى جاڭالىقتار