حالىق ءبىلىم عانا داعدارىسقا ۇشىرامايتىنىن ءتۇسىندى - ىرىسبەك ءماۋىت

وسىنى مەكتەپ ديرەكتورى ىرىسبەك ءماۋىتتىڭ وزىنەن سۇراپ بىلدىك.

- كوروناۆيرۋس ىندەتىنە بايلانىستى شەكتەۋلەر بارلىق سالالارعا ءوزىنىڭ كەرى اسەرىن تيگىزگەنى بەلگىلى. جاڭا ريجىمدە جۇمىستارىڭىزدى قالاي ۇيىمداستىردىڭىزدار؟

- ەلورداداعى التى Zerdeli مەكتەبىندە 140 مۇعالىم جۇمىس ىستەيدى. ولار كارانتينگە دەيىن 2 مىڭ بالاعا ساباق بەردى. كارانتين جاريالانعان كەزدە 800 وقۋشىنى ونلاين وقىتتى. جالپى، پاندەميا ءبىلىم بەرۋ جۇيەسىنە كەرى اسەر ەتتى. وتاندىق ءبىلىم جۇيەسى ءبىلىم بەرۋدىڭ قازىرگى تاسىلىنە دايىن بولمادى. ءبىز ونلاين ءبىلىم بەرۋ جۇيەسىنە وسىدان 2 جىل بۇرىن كوشتىك. سەبەبى «وتانداستار» قورىمەن بىرلەسىپ، الەم قازاقتارىنا قازاق تىلىنەن ونلاين ءدارىس وقىدىق. جوبانى جۇزەگە اسىرۋ ءۇشىن شەتەلدەن ارنايى ستۋديا ساتىپ الىپ، ونلاين ساباق بەردىك. ەلىمىزدە كارانتين باستالعان كەزدە ءبىز وسىعان دەيىن قولدانعان تاسىلىمىزگە جۇگىندىك. ياعني باسقا ءبىلىم بەرۋ مەكەمەلەرى سياقتى قينالعان جوقپىز.

- بالا تاربيەسىندە ەر مۇعالىمدەردىڭ ءرولى جوعارى ەكەنىن ماماندار ءجيى ايتىپ ءجۇر. الايدا، جوعارى وقۋ ورنىن ءتامامداعان ەرلەردىڭ كوبى مەكتەپتە جۇمىس ىستەۋگە بارا بەرمەيتىنى بەلگىلى. سىزدەر وسى ماسەلەنى قالاي شەشىپ جۇرسىزدەر؟

- ورتالىق بولىپ قۇرىلعان كەزدە ەلورداداعى مىقتى ماتەماتيكتەردىڭ باسىن بىرىكتىرىپ، وقۋشىلارعا تەك ماتەماتيكا بويىنشا عانا ساباق بەردىك. كەيىن سۇرانىسقا بايلانىستى قىزمەت كورسەتۋ اياسىن كەڭەيتىپ، شەت تىلدەرى مەن باسقا پاندەردى قوستىق. ءوزىڭىز بىلەسىز، ءبىلىم سالاسىندا ەر ادامدار وتە از. ءبىز ولاردى ىزدەپ تاۋىپ، نەگىزگى جۇمىستان بولەك، قوسىمشا تابىس تابۋعا، مىقتى شاكىرت تاربيەلەۋگە جانە شىعارماشىلىقپەن اينالىسۋعا مۇمكىندىك بەردىك.

مۇعالىم ماماندىعىن وقىپ شىققان ەر ادامداردىڭ باسىم بولىگى شاكىرت تاربيەلەۋدەن باس تارتىپ، باسقا سالاعا بەت بۇرىپ جاتقانىن بايقاپ ءجۇرمىز. سايكەسىنشە، مەكتەپتەگى ەر مۇعالىمدەردىڭ ۇلەسى وتە از. بۇل تۇرعىدا اتاپ وتەتىن جايت - ەر مۇعالىمدەردىڭ باسىم كوپشىلىگى جۇيكە جۇقارتاتىن قاعازباستىلىق جۇمىستارىنان اۋلاق جۇرەدى. جالپى، وتباسىن اسىراۋ ءۇشىن وقۋ ورنىنان تىس جەردە قوماقتىلاۋ اقشاعا جۇمىس ىستەۋگە تىرىسادى. قازىرگى جاعدايعا توقتالساق، بالالار ۇيدە دە، مەكتەپتە دە ايەل ادامنىڭ تاربيەسىن كورەدى. بالا ەر ادامنىڭ دا تاربيەسىن السا، ونىڭ مىنەز- قۇلقىن، ءتارتىپتى تۇسىنەتىن ۇرپاق قالىپتاسادى.

وسى ورايدا ءبىراز جىل بۇرىن ەلوردادا اقىل- وي دامىتۋ ورتالىعىنىڭ نەگىزىن قالاعان كەزىمىزدە ماقساتتى تۇردە ماتەماتيكادان ساباق بەرەتىن ەر مۇعالىمدەردى ىزدەدىك. بۇل تۇرعىدا ولاردان قاعازباستىلىق جۇمىستارىن تالاپ ەتپەدىك. سونىمەن قاتار، الەۋمەتتىك ماسەلەلەرىنە نازار اۋدارىپ، شىعارماشىلىقپەن اينالىسۋعا مۇمكىندىك بەردىك. مۇعالىمدەرىمىز شاكىرت تاربيەلەپ، قازاق تىلىندە كىتاپ جازدى. اتاپ ايتقاندا، ناتيجە بولدى. بيىل نازاربايەۆ ۋنيۆەرسيتەتىنە 21 شاكىرتىمىز ءتۇستى. جىل سايىن اتالمىش جوعارى ورنىنا شامامەن 700 بالا قابىلدانادى.

- جەكەمەنشىك مەكتەپكە قاتىستى قوعامدا ءتۇرلى پىكىر ايتىلادى. وسى سالانى جاقسى مەڭگەرگەن مامان رەتىندە تۇسىنىك بەرسەڭىز...

- ەل اراسىندا: «ورتا ءبىلىم بەرۋ مەكەمەلەرى وقۋشىلارعا دۇرىس ءبىلىم بەرە المايدى، ەگەر، ولار ساپالى ءبىلىم بەرسە، جەكەمەنشىك ءبىلىم بەرۋ ورتالىقتارى مەن مەكتەپتەر بولماس ەدى» دەگەن ۇشقارى پىكىر بار. نەگىزى، جەكەمەنشىك ءبىلىم بەرۋ ورتالىقتارى مەن مەكتەپتەر الەمنىڭ كەز كەلگەن ەلىنەن تابىلادى. جەكەمەنشىك مەكتەپ كورەيادا دا بار. بۇل ەلدەگى وقۋشىلاردىڭ 70 پايىزى ءتۇرلى ۇيىرمەلەرگە قاتىسادى. وسىعان قاراپ كورەيانىڭ مەكتەپتەرى ساپاسىز ءبىلىم بەرەدى دەپ ايتا المايمىز عوي. سەبەبى بۇل ەلدە بىلىمگە ەرەكشە نازار اۋدارىلاتىنىن جاقسى بىلەمىز.

بۇل جاعدايدا ءبىز 2 فاكتوردى ەسكەرۋمىز كەرەك. ءبىرىنشىسى، مەكتەپتە بالا كوپ. ءۇش اۋىسىممەن وقيتىن مەكتەپتەر بار. ۇستازداردىڭ جۇكتەمەسى كوپ، جالاقىسى از. ەكىنشىسى، حالىق ءبىلىمدى ۇرپاق قانا جەتىستىكككە جەتەتىنىن، ءبىلىم عانا داعدارىسقا ۇشىرامايتىنىن ءتۇسىندى. سوندىقتان جەكەمەنشىك ءبىلىم بەرۋ ورتالىقتارى مەن مەكتەپتەردىڭ قىزمەتىنە جۇگىنە باستادى. بۇل جاعداي ەلىمىزدە ءبىلىم ناشار بولعاندىقتان ەمەس، حالىقتىڭ ءبىلىم الۋعا دەگەن قۇشتارلىعى ويانعاننان بولىپ جاتىر. بۇعان قۋانباساق، رەنجۋگە بولمايدى. بۇل - مەنىڭ جەكە پىكىرىم.

اۆتور: رۋسلان عابباسوۆ