موڭعوليا قازاعى بەس تىلدەگى جاڭىلتپاشتى مۇدىرمەي وقىدى - شەتەلدەگى قازاق ءتىلدى ب ا ق- قا شولۋ

None
None
نۇر- سۇلتان. قازاقپارات - «قازاقپارات» ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

موڭعوليا قازاعى بەس تىلدەگى جاڭىلتپاشتى مۇدىرمەي وقىدى - KAZNEWS

موڭعوليالىق قانداسىمىز ب. بارىسبەك Facebook-تەگى 1 Minute English دەپ اتالاتىن پاراقشادا بەس تىلدەگى جاڭىلتپاشتى وقىرماندارعا مۇدىرمەي وقىپ بەردى، دەپ جازادى موڭعوليالىق KAZNEWS اقپارات پورتالى.

«Facebook-تە 1 Minute English دەپ اتالاتىن قىزىقتى پاراقشا بار. بۇل پاراقشاعا كۇن سايىن اعىلشىن ءتىلىن ۇيرەنۋگە ارنالعان ءبىر مينۋتتىق اقىسىز ۆيدەولار جۇكتەلەدى. بۇل كونتەنتتەردى 1 Minute English دەپ اتالاتىن ونلاين- ترەنينگ ورتالىعى ۇسىنادى. ال بۇل ورتالىقتىڭ نەگىزىن قالاۋشى - ب. بارىسبەك بەس تىلدەگى جاڭىلتپاشتى وقىرماندارعا مۇدىرمەي وقىپ بەردى»، - دەپ جازادى KAZNEWS پورتالى.

تاڭبالى جايلاۋىنىڭ ءتورت ماۋسىمداعى كوز تارتاتىن اسەم كورىنىستەرى - التاي اقپارات

قىتاي حالىق رەسپۋبليكاسى ىلە قازاق اۆتونوميالىق وبلىسىنىڭ نىلقى اۋدانىنداعى تاڭبالى جايلاۋى كوركى كوز اربايتىن اسەم تابيعاتىمەن جۇرتقا تانىمال، دەپ جازادى altxw.com سايتى.

«قازاق ۇلتى قونىستانعان نىلقى اۋدانى تيان- شان تاۋىنىڭ ورتا بولىگىندە، ىلە وزەنىنىڭ جوعارعى اعىسىندا ورنالاسقان. اۋدان تۋريستىك رەسۋرستارعا باي تابيعاتىنىڭ سۇلۋلىعىمەن ەرەكشەلەنەدى. تاڭبالى جايلاۋى - ءوڭىردىڭ سونداي تۋريستىك ورتالىقتارىنىڭ ءبىرى. وسى تاڭبالى جايلاۋىنىڭ ءبىر جىلداعى ءتورت ماۋسىمىنىڭ كورىنىسى تۋرالى ايتار بولساق، جاز ماۋسىمىندا تاۋ ەتەگى جاسىل جەلەك جامىلسا، تاۋ شوقىلارى اق قارمەن اسەمدەنىپ كورىنەدى، كۇز ماۋسىمىندا سان مىڭداعان اعاشتار كوركەم تۇسپەن بويالىپ، الۋان تۇستەر كوزدىڭ جاۋىن الادى، ال قىس ماۋسىمىندا، ۇلان- بايتاق دالا قار- مۇز قۇرسانىپ، اسقار تاۋلارى ايباتتانا تۇسەدى. مەيلى قاي مەزگىل بولسىن، تەك تاڭبالى جايلاۋىنا بارا قالساڭىز، كوز سۇرىندىرەر كوركەم الاپتا تۇرىپ، جان دۇنيەڭىزدى تازارتىپ، ەستەن كەتپەس اسەرگە بولەنەسىز! نازارلارىڭىزعا وسى كوركەم تابيعات كورىنىستەرىنەن فوتورەپورتاج ۇسىنامىز»، - دەپ جازادى «التاي اقپارات» سايتى.

گەنەتيكاسى وزگەرتىلگەن ماسالار تابيعاتقا جىبەرىلەدى - TRT

ا ق ش- تا 2021-2022 -جىلدار اراسىندا گەنەتيكاسى وزگەرتىلگەن 750 ميلليون ماسا فلوريدا شتاتىنىڭ تابيعاتىنا جىبەرىلەدى دەگەن شەشىم جاسالدى، دەپ جازادى تۇركيا راديو تەلەۆيزيا پورتالى.

«جوبا ءۇشىن فلوريدا شتاتى سىناق ايماعى بولىپ تاڭدالدى. جوباعا جەرگىلىكتى حالىق پەن قورشاعان ورتا توپتارى نارازى بولدى. الايدا فلوريدا- كيس ماسا باسقارۋ ايماعى سىناق جوبانى ماقۇلدادى. لاۋازىمدىلار ايماقتاعى كەيبىر ماسالاردىڭ زيكا، دەنگە بەزگەگى، سارى بەزگەك سياقتى اۋرۋلاردى تاراتىپ وتىرعانىن، ال ونى وسى گەنەتيكاسى وزگەرتىلگەن ماسالار ارقىلى جويۋعا بولاتىنىن ايتىپ، تۇسىندىرۋدە. وسىلايشا اتالمىش جوبامەن گەنەتيكاسى وزگەرتىلگەن ماسالاردىڭ اۋرۋدى تاسىمالداعان ماسالارمەن جۇپتاسۋى ارقىلى اۋرۋدىڭ گەنەتيكاسىن وزگەرتۋ جانە الدىن الۋ جوسپارلانۋدا»، - دەپ جازادى TRT.

قىتاي كوروناۆيرۋس ۆاكسيناسىنىڭ كلينيكالىق سىناعى وزبەكستاندا ءوتۋى مۇمكىن – ءو ز ا

قىتايدىڭ COVID-19 ىندەتىنە قارسى جاسالعان ۆاكسيناسىنىڭ ءۇشىنشى كلينيكالىق سىناعى وزبەكستاندا دا ءوتۋى مۇمكىن، دەپ جازادى وزبەكستاننىڭ «ءو ز ا» مەملەكەتتىك اقپارات اگەنتتىگى.

«بۇل جونىندە ءور يننوۆاتسيالىق دامۋ مينيسترلىگى، دەنساۋلىق ساقتاۋ مينيسترلىگى، قىتاي عىلىمدار اكادەمياسى، حالىقارالىق عىلىمي ۇيىمدار اليانسى جانە «Anhui ZhifeiLongcom Biopharmaceutical» وكىلدەرى اراسىندا وتكەن بەينەكونفەرەنسيالى كەلىسسوز اياسىندا ءسوز بولدى. جاڭا ۆاكسينا تەحنولوگياسىن 2020 -جىلدىڭ 6 - تامىزىندا بەدەلدى «Cell» جۋرنالىندا ءبىر توپ قىتايلىق عالىمدار جاريالادى. قىتاي تاراپى قازىرگى كۇنى ۆاكسينانىڭ ەكىنشى كەزەڭىن اياقتاۋ ۇستىندە. بۇگىنگە دەيىن ۆاكسينا جاقسى ناتيجە كورسەتكەن. سوندىقتان كلينيكالىق سىناقتىڭ ءۇشىنشى كەزەڭىن بىرنەشە ەلدە قاتار وتكىزۋ جوسپارلانىپ وتىرعانىن ايتقان قىتاي وكىلدەرى ونى وزبەكستانداعى ەرىكتىلەر اراسىندا دا وتكىزۋ مۇمكىندىگى جايلى قىزىعۋشىلىق بىلدىرگەن. ودان بولەك قيىر شىعىس پەن اراب ەلدەرىندە دە وتكىزۋ جوسپارلانعان. ەگەر ۆاكسينا سىناقتاردا جاقسى ناتيجە كورسەتسە، وندا وسى ەمدىك ءونىمدى وزبەكستان مەن باسقا ورتالىق ازيا ەلدەرىندە قولدانۋعا بولاتىنى ايتىلعان»، - دەپ جازادى «ءو ز ا» اقپارات اگەنتتىگى.

تۇرىك رەجيسسەرى يتاليادا بەدەلدى جۇلدەگە يە بولدى - TRT

يتاليادا تۇراتىن تۇرىك رەجيسسەرى فەرزان وزپەتەك يتاليا جازۋشىلار جانە باسپاگەرلەر قوعامىنىڭ «ارنايى جۇلدەسىنە» لايىقتى دەپ تابىلدى، دەپ جازادى تۇركيا راديو تەلەۆيزيا پورتالى.

«77- حالىقارالىق ۆەنەتسيا كينوفەستيۆالى شەڭبەرىندە وتكەن شارادا اتالعان قوعامنىڭ جۇلدەلەرىن تابىستاۋ ءراسىمى ۇيىمداستىرىلدى. راسىمدە فەرزان وزپەتەك يتاليا كينەماتوگرافياسىنىڭ جاڭا كلاسسيگى، بىلىكتى جازۋشى جانە رەجيسسەر رەتىندە باعالانىپ، جۇلدەگە لايىقتى دەپ تانىلعان. وزپەتەك بۇدان بۇرىن اتاقتى يتاليالىق رەجيسسەرلەر العان جۇلدەگە يە بولدى. تۇرىك رەجيسسەرى راسىمدە «وسى جۇلدەنى الۋ - وتە تاماشا سەزىم. قۋانىشتىمىن» دەدى. وزپەتەك وتكەن جىلى جەلتوقسان ايىندا كارەراسىنداعى 13- فيلم - «شانس قۇدايىن» پروكاتقا شىعارسا، بيىل ماۋسىم ايىندا ءۇشىنشى رومانىن جاريالاعان»، - دەپ جازادىTRT.

Zoom باسشىسىنىڭ بايلىعى ءبىر تاۋلىكتە 6,6 ميلليارد دوللارعا ءوستى – ءو ز ا

«Zoom « اكسيالار نارىعى 40 پايىزدان جوعارى ءوسۋىنىڭ ەسەبىنەن پلاتفورمانىڭ نەگىزىن قالاۋشى ەريك يۋاننىڭ داۋلەتى ءبىر تاۋلىكتە 6,6 ميلليارد دوللارعا ءوستى، دەپ جازادى وزبەكستاننىڭ «ءو ز ا» مەملەكەتتىك اقپارات اگەنتتىگى.

«Bloomberg» اگەنتتىگىنىڭ جازۋىنشا، كومپانيا تابىسى الەمدىك پاندەميانىڭ اسەرىنەن رەكوردتىق دەڭگەيدە ءوسىمى تۋرالى قورىتىندى ەسەپتى جاريالادى. ونىڭ نەگىزىندە ەريك يۋاننىڭ بايلىعى ءبىر تاۋلىكتە 6,6 ميلليارد دوللارعا ءوسىپ 23 ميلليارد دوللارعا جەتتى.

«Zoom « اكسيالارى قورىتىندى ەسەپ شىققاننان كەيىن 40 پايىزدان جوعارى وسكەنى ءمالىم بولىپ، كومپانيا بيىلدىڭ وزىندە 663,5 ميلليون دوللار تابىس تاپقان. بۇل وتكەن جىلمەن سالىستىرعاندا 355 پايىزعا جوعارى.

ايتا كەتەيىك، 2020 -جىلدىڭ باسىندا «Amazon» نەگىزىن قالاۋشى دجەفف بەزوستىڭ بايلىعى 24 ساعات ىشىندە 13 ميلليارد دوللارعا ارتقان بولسا، «Tesla» كومپانياسىنىڭ باسشىسى يلون ماسكتىڭ داۋلەتى دە ءبار تاۋلىكتە 8 ميلليارد دوللارعا ءوسىپ رەكورد ورناتقان ەدى.

يراننىڭ قازاقستانداعى ەلشىسى وسى ەلدىڭ سىرتقى ىستەر مينيسترىمەن كەزدەستى – فارس

يراننىڭ قازاقستانداعى ەلشىسى مادجيد سابەر بەيسەنبى كۇنى قازاقستاننىڭ سىرتقى ىستەر ءمينيسترى مۇحتار تىلەۋبەردىمەن كەزدەسۋ وتكىزدى، دەپ جازادى «فارس» اقپارات اگەنتتىگى.

«ISNA اقپارات اگەنتتىگىنىڭ حابارلاۋىنشا، تاراپتار وسى كەزدەسۋدە ەكىجاقتى، ايماقتىق جانە حالىقارالىق ماسەلەلەردى تالقىلاپ، ءتۇرلى سالالاردا ەكى ەلدىڭ ارىپتەستىگىن جالعاستىرۋ تۋرالى پىكىر الماستى. سونداي- اق، ەكى ەلدىڭ ايماقتىق جانە حالىقارالىق ۇيىمدار اياسىنداعى ارىپتەستىگىن نىعايتۋ قاجەتتىگى ايتىلدى»، - دەپ جازادى Рarstoday .

اۆتور: باقىتجول كاكەش


سوڭعى جاڭالىقتار