باتىس قازاقستاندا كيىك اتقان تۇرعىندار سوتتالدى

قازتالوۆ اۋدانى پوليتسيا ءبولىمى باستىعىنىڭ مىندەتىن اتقارۋشى، پوليتسيا مايورى مارلەن قارابايەۆتىڭ ءمالىم ەتكەنىندەي، اتالعان تۇرعىندار ق ر ق ك 337-بابى 6-بولىگى 2-تارماعى جانە 339-بابى 2-بولىگى 2-تارماعىنا سايكەس ايىپتى دەپ تانىلدى. م. ايتجانوۆ پەن د. ايتجانوۆ مۇلىكتەرىن تاركىلەۋسىز التى جىل التى اي مەرزىمگە باس بوستاندىعىنان ايىرىلدى. سونداي- اق 10 جىل مەرزىمگە اڭشىلىق قىزمەتپەن اينالىسۋ قۇقىعىنان ايىرىلدى.

سوت تالقىسىندا بەلگىلى بولعانىنداي، اتالعان ەكەۋ -12 مامىر كۇنى ساعات 11.30 شاماسىندا تىركەلمەگەن، مەملەكەتتىك ءنومىرى جوق «Toyota Land Cruiser-80» ماركالى اۆتوكولىگىن پايدالانىپ، الدىن الا ءسوز بايلاسىپ، قازتالوۆ اۋدانى قازتالوۆ اۋىلىنا قاراستى بوزاي-2 قىستاعىنىڭ ماڭىنا بارعان. سول جەردە م. ايتجانوۆ اۆتوكولىكپەن كيىكتەردى قۋىپ، ال د. ايتجانوۆ زاڭسىز ساقتاپ جۇرگەن يج-18 ەم- م ماركالى «92117970» 12 كاليبرلى اڭشىلىق قارۋىمەن 15 كيىكتىڭ تەكەسىن اتقان. سودان كەيىن 30 ءمۇيىزدى كەسىپ الىپ، كيىك ۇشاسىن سول جەرگە تاستاپ كەتكەن. قىلمىس ۇستىندە قازتالوۆ اۋدانى پوليتسيا ءبولىمىنىڭ قىزمەتكەرلەرىنىڭ قولىنا تۇسكەن ولار مەملەكەتكە 62,505 ميلليون تەڭگە (15 كيىكتىڭ قۇنى) كولەمىندە ماتەريالدىق زالال كەلتىرگەن. سوت ۇكىمىنە سايكەس اتالعان اۆتوكولىك تاركىلەندى، كيىك ءمۇيىزى جويىلدى. سوتتالۋشىلاردان 62,505 ميلليون تەڭگە مەملەكەت پايداسىنا ءوندىرىلدى. ۇكىم كۇشىنە ەنگەن جوق. ەسكە سالا كەتەيىك، بۇدان بۇرىن ب ق و- دا تاعى ءبىر براكونەردىڭ كيىك مۇيىزىمەن ۇستالعانىن جازعان بولاتىنبىز.