قازاقستاندا شىلىم شەگۋگە تىيىم سالىنعان ورىندار ءتىزىمى كەڭەيتىلدى

سايتتىڭ جازۋىنشا، جابىق اۆتوبۋس ايالدامالارىندا، بالالار الاڭدارىندا، مەترودا جانە جەراستى وتكەلدەرىندە ەلەكتروندى تەمەكى، كاليان جانە تەمەكى ونىمدەرىنىڭ بارلىق تۇرلەرىن شەگۋگە تىيىم سالىنادى.

«ءبىزدىڭ جاستار كالياندى مەكەمەلەردە قولدانادى. ەندى ولارعا تولىقتاي تىيىم سالىندى. ءدامحانالاردا، قوعامدىق ورىنداردا، جازعى كافەلەردە شەگە المايدى، ونى تەك ۇيدە عانا تۇتىنۋعا بولادى»، - دەدى الكوگول جانە تەمەكى ونىمدەرىن ساتۋ قاۋىمداستىعىنىڭ اتقارۋشى ديرەكتورى تەمىرلان جاقىپبەكوۆ.

بۇعان دەيىن حابارلانعانداي، ەندى تەمەكىنى جانە كاليانعا ارنالعان ءتۇرلى قوسپالاردى 21 جاستان باستاپ قانا ساتىپ الۋعا بولادى. ساتۋشىلار ساتىپ الۋشىلاردان جەكە كۋالىكتەرىن تالاپ ەتۋى كەرەك.

تاعى ءبىر جاڭالىق - تەمەكى مەن كاليان قوسپالارى دۇكەن سورەلەرىندە بولمايدى. بۇل ەرەجە كەلەسى جىلدان باستاپ كۇشىنە ەنەدى. كاليانعا قارسى شەكتەۋلەرگە قاراماستان، تەك شىلدە ايىنىڭ وزىندە ەلوردالىق پوليتسيا 20 زاڭ بۇزۋشىلىقتى تىركەدى.

قۇقىق قورعاۋ ورگاندارىنىڭ قىزمەتكەرلەرى كۇن سايىن رەيدتەر وتكىزەدى. كاليان مەن تەمەكىنى رۇقسات ەتىلمەگەن جەردە شەككەنى ءۇشىن ايىپپۇل سالىنۋى مۇمكىن. ايىپپۇل مولشەرى ەكى ەسەگە ارتىپ، 42 مىڭ تەڭگەنى قۇرايدى.