قازاقستاندا تىركەلمەگەن ءدارى-دارمەكتەر زاڭسىز ساۋدالانىپ كەلگەن

بۇل تۋرالى قازاقپارات قارجى مونيتورينگى كوميتەتىنە سىلتەمە جاساپ حابارلايدى.

ق ر ق م قارجى مونيتورينگى كوميتەتىنىڭ پاۆلودار وبلىسى بويىنشا ەكونوميكالىق تەرگەۋ دەپارتامەنتى قىزمەتكەرلەرى پاۆلودار قالاسى ءدارىحانالارىنىڭ بىرىندە قازاقستان رەسپۋبليكاسىندا تىركەلمەگەن دارىلىك زاتتاردى ساتۋ فاكتىسىن انىقتادى.

سول كۇنى ءدارىحانانىڭ ورنالاسقان مەكەن-جاي بويىنشا جەدەل-تەرگەۋ ءىس-شاراسى بارىسىندا پاۆلودار وبلىسى تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ مامانىن قاتىستىرا وتىرىپ ءتىنتۋ جۇرگىزىلدى، ناتيجەسىندە ق ر اۋماعىندا ساتۋعا رۇقساتى جوق 670 بۋما ءدارى-دارمەكتىڭ 22 ءتۇرى تاركىلەنىپ الىندى («اتسەتيلساليتسيلوۆايا كيسلوتا مەديسوبر»، «تسەفترياكسون»، «پاراتسەتومول»، «ازيتروميتسين»، «اسكوفەن- پ»، «انتيگريپين دليا دەتەي»، «تەتراتسيكلين - لەنت»، «سپازمالگان»، «ەرينيت»، «نيكوتينوۆايا كيسلوتا»، «سەدالگين پليۋس»، «پەنتالگين»، «گەنتاميتسين»، «اتسيكلوۆير»، «ۆيكاسول»، «تەمپاlcin» «سپازگان»، «كەتورول ەكسپرەسس»، «پاراتسەتومول سۋسپەنزيا»، «انالگين»، «اندينال» جانە «مۋكالتين»).

كاسىپكەردەن تاركىلەنگەن ءدارى-دارمەكتەر ق ر ءۇشىن دايىندالماعان جانە ق ر دارىلىك زاتتار، مەديتسينالىق ماقساتتاعى بۇيىمدار مەن مەديتسينالىق تەحنيكانىڭ مەملەكەتتىك تىزىلىمىنە ەنگىزىلمەگەن، سونىمەن قاتار، «دارىلىك زاتتاردى جانە مەديتسينالىق ماقساتتاعى بۇيىمداردى قازاقستان رەسپۋبليكاسىنىڭ اۋماعىنا اكەلۋ جانە اكەتۋ ەرەجەلەرىن» بۇزا وتىرىپ، ياعني دارىلىك زاتتار مەن مەديتسينالىق ماقساتتاعى بۇيىمداردى ۇلتتىق ساراپتاۋ ورتالىعىنىڭ قاۋىپسىزدىك پەن ساپا تۋرالى سەرتيفيكاتىنسىز ەل اۋماعىنا اكەلىنگەن. قازىرگى ۋاقىتتا سوتقا دەيىنگى تەرگەۋ جۇرگىزىلۋدە.