كوروناۆيرۋس: سيمپتومسىز ناۋقاستارعا قاجەت بولمايتىن دارىلەر اتالدى

«كوروناۆيرۋس ينفەكسياسىنىڭ سيمپتومى از نەمەسە سيمپتومسىز ناۋقاستار ۇيدە ەمدەلۋى كەرەك. ارينە، ولار وزدىگىنەن ەم قابىلداپ جاتىر جانە دارىگەرلەر مۇنداي ناۋقاستاردىڭ ەم-دومىن رەتتەپ وتىرۋى كەرەك. كوروناۆيرۋستىڭ سيمپتومى از ءتۇرى پاتوگەنەتيكالىق ەمدەۋدى، دالىرەك ايتقاندا ۆيرۋسقا قارسى، انتيباكتەريالىق، ترومبقا قارسى پرەپاراتتار تاعايىنداۋدى قاجەت ەتپەيدى. مۇنداي پاتسيەنتتەر ەمدەۋ- ساقتانۋ رەجيمىندە اقۋىزى كوپ تاماق جەپ، سۇيىقتىقتى كوپ ءىشۋى كەرەك. ولارعا س، د دارۋمەندەرى جانە دەنە قىزۋى كوتەرىلگەن جاعدايدا پاراتسەتامول، يبۋپروفەن سىندى قىزۋ تۇسىرەتىن دارىلەر تاعايىندالادى»، - دەدى دارىگەر ورتالىق كوممۋنيكاتسيالار قىزمەتىندە وتكەن ونلاين كونفەرەنسيادا.

ونىڭ ايتۋىنشا، س دارۋمەنىنىڭ ۇلكەن دوزاسى تاعايىندالعان جاعدايدا، بۇيرەك اۋرۋلارىنىڭ، نەسەپ- تاس اۋرۋىنىڭ كۇشەيۋى مۇمكىن ەكەندىگىن ەستە ساقتاعان ءجون. ەگەر دەنە قىزۋى 38 گرادۋستان اسقاندا، بۇلشىقەت اۋىرىپ، السىزدىك بايقالسا، باس اۋىرىپ، جوتەل پايدا بولسا، كەۋدە تۇسى اۋىرسا دارىگەرگە جۇگىنىپ، وكپە قابىنۋىنىڭ الدىن الۋ كەرەك. ول ءۇشىن كوكىرەك قۋىسىنا رەنتگەنولوگيالىق زەرتتەۋ نەمەسە كومپيۋتەرلىك توموگرافيا جۇرگىزىلەدى.

«كوروناۆيرۋس ينفەكسياسىنداعى ەتيوتروپتى (نەگىزگى) ەم - ۆيرۋسقا قارسى پرەپاراتتار تاعايىنداۋ. قازىرگى ۋاقىتتا ك ۆ ي ەمدەۋ ءۇشىن لوپيناۆير/ريتوناۆير، گيدروكسيحلوروحين، فاۆيپيراۆير جانە رەمدەسيەۆير سىندى دارىلىك زاتتار جازىلادى. بۇل رەتتە اتالعان دارىلەردىڭ بەلگىلى ءبىر قاۋىپ توندىرەتىنىن، جۇرەك پەن باۋىرعا ۋىتتى اسەر ەتەتىنىن اتاپ وتكەن ءجون. وسىعان بايلانىستى سيمپتومى از جانە سيمپتومسىز ناۋقاستارعا بۇل دارىلەردى وزدىگىنەن قابىلداۋدىڭ قاجەتى جوق. بۇل پرەپاراتتاردى دارىگەرلەر عانا ستاتسيونارلىق جاعدايدا بەرە الادى»، - دەدى راۋشان قارابايەۆا.

اۆتور: ايجان سەرىكجان قىزى