دەنساۋلىعىڭىز مىقتى بولۋ ءۇشىن قانشا سۋ ءىشۋ كەرەك؟

None
None
نۇر-سۇلتان. قازاقپارات - كۇندەلىكتى قانشا مولشەردە سۋ ءىشۋ كەرەك؟ - دەگەن سۇراققا ناقتى جاۋاپ جوق.

سەبەبى، بۇل بىرنەشە فاكتورعا بايلانىستى (ءسىزدىڭ دەنساۋلىعىڭىزدىڭ جاي-كۇيى، بەلسەندىلىكتىڭ دارەجەسى جانە ت. ب. ). ادەتتە، ءبىز ءار كۇنى تەرلەۋ، دەم الۋ جانە كىشى دارەتكە شىعۋ ارقىلى كوپ سۋ مولشەرىن جوعالتامىز. مۇنىڭ سوڭىندا - جوعالتقان سۋدىڭ ورنىن قايتا تولتىرۋ قاجەتتىلىگى تۋىندايدى.

سۋدى تەك ءشولىڭدى قاندىرۋ ءۇشىن ءىشۋ - اقىلعا قونىمسىز، ءسىز كۇنى بويى بەلگىلى ۋاقىت ارالىعىندا، سۋدى تۇراقتى تۇردە ءىشىپ تۇرۋدى ادەتكە اينالدىرۋىڭىز قاجەت. كۇندەلىكتى تاعام قۇرامىنا سۋدىڭ 20 پايىزى كىرەدى، الايدا، بۇدان باسقا، كۇنىنە 8 ستاكان سۋ ءىشۋدى ماماندار ۇسىنادى.

ءسىزدىڭ سۋدى قولدانۋىڭىز جاسايتىن مەكەنىڭىز بەن ونداعى كليماتقا بايلانىستى. ىستىق كۇندەرى قوسىمشا سۋ ىشۋگە تۋرا كەلەدى، سەبەبى، ۇلكەن سۋ قورى تەرلەۋ ارقىلى سىرتقا شىعىپ كەتەدى، بۇل جاعدايدا اعزانىڭ سۋسىزدىقتان شولدەۋگە ۇشىراۋى مۇمكىن. سۋىق اۋا- رايىندا نەمەسە تەڭىز دەڭگەيىنەن بيىك جەرلەردە كىشى دارەتكە ءجيى شىعۋعا تۋرا كەلەدى، بۇل ءوز كەزەگىندە اعزاداعى سۇيىقتىقتىڭ ازايۋىنا اكەپ سوقتىرۋى مۇمكىن.

دەنساۋلىقتىڭ جاي- كۇيىنە دە سۋدى قولدانۋدىڭ زور اسەرى بار. ەگەر ءسىز بەزگەك، ىستىقتىق، قۇسۋ نەمەسە ديارەيامەن اۋىرساڭىز، بۇل شامادان تىس سۋ جوعالتۋعا سەبەپ بولادى. ەكىقابات ايەلدەر دە سۋدى كوپ ءىشۋ كەرەك، سەبەبى، ولاردا اعزانىڭ سۋسىزدىققا ۇشىراۋ تاۋەكەلى جوعارى. سوندىقتان، دەنەڭىزدى سۋمەن قامتاماسىز ەتىپ وتىرۋعا ءجىتى كوڭىل ءبولىڭىز.

سىزگە نە ءۇشىن سۋ ءىشۋ قاجەت؟

ءسىز بىرنەشە اپتا بويى اس جەمەي شىداۋىڭىز مۇمكىن، ءبىراق سۋسىز 3-4 كۇننەن ارى اسا المايسىز. سوندىقتان، سۋ - ادام اعزاسىنا ەڭ قاجەتتى قورەكتەردىڭ ءبىرى. ءبىزدىڭ اعزامىزدىڭ 60 پايىزدان استامى سۋدان قۇرالعان، بۇل بىرنەشە سەبەپكە بايلانىستى.

1. دەنەگە كۇش- سالماق ءتۇسىرۋ تەرلەۋگە ۇشىراتىپ، اعزاداعى سۋدىڭ جوعالۋىنا سەبەپ بولادى. ءسىز كۇندەلىكتى قارا جۇمىستىڭ اراسىندا سۋدى ءجيى ءىشىپ، اعزانىڭ شولدەمەۋىن قامتاماسىز ەتۋگە ءتيىسسىز.

2. ءسىزدىڭ بۇلشىق ەتتەرىڭىز - قارا جۇمىستان سوڭ سۋعا ءزارۋ. ەگەر ، سۋ ىشپەسەڭىز ولاردىڭ وسۋىنە كەدەرگى كەلتىرەسىز.

3. سىزگە كۇندەلىكتى اس قورىتۋ ءۇشىن 25 گرامم جاسۇنىق(كلەتچاتكا) قاجەت، ال، ەگەر سۋ ىشپەسەڭىز، مۇنىڭ پايداسى جوق، سەبەبى، جاسۇنىق تەك سۋ ارقىلى قىزمەت اتقارادى.

4. بوس اسقازان ءسىزدىڭ اش ەكەنىڭىزدى ەسكە تۇسىرەدى. سۋ ءىشۋ ارقىلى، اشتىقتى كىشكەنە بولسىن باسۋعا بولادى.

5. تازا ءمولدىر سۋ - ءسىزدىڭ دەنەڭىزدىڭ تەمپەراتۋراسىن قالىپقا كەلتىرەدى، سونداي-اق، تاستاردىڭ بۇيرەككە تۇسپەۋىن قامتاماسىز ەتەدى، تەرىنىڭ جاعدايىن جاقسارتادى، بۋىنداردىڭ جۇمىسىن جەڭىلدەتەدى جانە ت. ب.

سۋ- تىرشىلىك كوزى، - دەپ بەكەر ايتىلماعان، الەمدەگى بارشا ءتىرى جانداردىڭ ءومىرى سۋمەن تىعىز بايلانىستى. ءومىرىڭىزدىڭ وسى بولىگىنە باسا نازار اۋدارىڭىز.

سوڭعى جاڭالىقتار