11:57, 02 - شىلدە 2020 | GMT +6
گەننادي گولوۆكيننىڭ كەلەسى جەكپە-جەگى قاشان وتەدى؟
نۇر-سۇلتان. قازاقپارات - ESPN تەلەارناسىنىڭ بۇرىنعى جۋرناليسى دەن رافاەل قازاقستاندىق بوكسشى گەننادي گولوۆكين (40-1-1، 35 ك و) كۇزدە شارشى الاڭعا ورالىپ، IBF تيتۋلىنا مىندەتتى ۇمىتكەر پولياك كاميل شەرەمەتامەن (21-0، 5 ك و) كەزدەسەتىنىن راستادى، دەپ حابارلايدى قازاقپارات Sports.kz سايتىنا سىلتەمە جاساپ.
«گولوۆكين كەلەسى جەكپە-جەگىن كۇزدە ءوزىنىڭ مىندەتتى ۇمىتكەرىنە قارسى وتكىزەدى. كورەمىز»، — دەپ جازدى رافاەل Twitter پاراقشاسىندا.
بۇعان دەيىن شەرەمەتانىڭ پروموۋتەرى اندجەي ۆاسيليەۆسكي گولوۆكين كومانداسى جەكپە-جەكتى قازان نەمەسە قاراشا ايىندا وتكىزۋدى جوسپارلاپ وتىرعانىن ايتقان بولاتىن.
ءبىر قىزىعى، بۇل ايقاس بىرنەشە رەت كەيىنگە شەگەرىلدى، ال تامىزدىڭ ورتاسى جەكپە-جەكتىڭ سوڭعى جوسپارلانعان كۇنى بولىپ سانالعان ەدى.