ۋحانداعى مەكتەپتەردە وقۋ قايتا جاندانادى

بۇل تۋرالى قازاقپارات ءتىلشىسى شينحۋا اگەنتتىگىنە سىلتەمە جاساي وتىرىپ حابارلايدى.

10- شىلدەدەن باستاپ بيىل وقۋدى بىتىرمەيتىن جوعارى دارەجەدەگى ورتا مەكتەپتەردىڭ وقۋشىلارى قايتىپ ورالادى. ولارمەن بىرگە كاسىبي-تەحنيكالىق ۋچيليشەدە ءبىلىم الۋشىلار دا قايتا وقۋىن جالعاستىرادى. ولاردىڭ جازعى دەمالىستارى 31- شىلدەدە باستالادى.

تومەنگى دارەجەدەگى ورتا مەكتەپتەردىڭ وقۋ بىتىرمەيتىن سىنىپتارىنداعى وقۋشىلار وزدەرىنىڭ ونلاين-ساباقتارىن 5- شىلدەدە اياقتايدى. 10- تامىز كۇنى مۇعالىمدەر مەن وقۋشىلار 30- تامىزعا دەيىن جالعاساتىن ساباققا كىرىسەدى. ال باستاۋىش مەكتەپتەر مەن بالاباقشالاردىڭ جازعى دەمالىسى 5- شىلدەدە باستالادى.

جوعارى وقۋ ورىندارىنىڭ وقۋ بىتىرمەيتىن ستۋدەنتتەرى قاجەتتىلىك تۋىنداماعان جاعدايدا كامپۋسقا قايتىپ كەلۋگە مىندەتتى ەمەس. ولار ءوتىنىم بەرىپ، قايتىپ كەلگىسى كەلسە ج و و- لارىنان رۇقسات الۋى ءتيىس. مەكتەپتەن تىس وقۋ ۇيىمدارى ەپيدەميانى باقىلاۋ جانە الدىن الۋ بويىنشا ءتيىستى تالاپتاردى ورىنداعان جاعدايدا ساباقتارىن جانداندىرا الادى.

بۇل تۋرالى ۋحان قالاسىنىڭ ءبىلىم باسقارماسى باستىعىنىڭ ورىنباسارى سيا شۋنين حابارلادى.

حۋبەي پروۆينتسياسى 13- ماۋسىمنان باستاپ قوعامدىق دەنساۋلىق ساقتاۋ سالاسىندا توتەنشە جاعدايلارعا قاراي شۇعىل ارەكەت ەتۋ دەڭگەيىن ەكىنشىدەن ۇشىنشىگە ءتۇسىردى.

دۇيسەنبىدەگى جاعداي بويىنشا پروۆينتسيادا اۋرۋ بەلگىسى جوق ءبىر ادامنىڭ مەديتسينالىق باقىلاۋدا جاتقانى حابارلانعان.