باسپانا نارىعى: باعانىڭ كۇرت تومەندەۋى بولا ما

None
None
نۇر- سۇلتان. قازاقپارات - كارانتين كەزەڭىندەگى وقشاۋلانۋ مەن نارىقتا شارتتار جاساۋ مۇمكىندىگىنىڭ بولماۋىنان قازاقستانداعى جىلجىمايتىن مۇلىك سالاسى ءبىرشاما تۇرالاپ قالدى.

الايدا، كارانتين تالاپتارى جەڭىلدەتىلگەننەن بەرى ءىرى قالالاردا بۇل پروتسەسس بىرتىندەپ جاندانىپ، بيىلعى مامىر ايىندا بەكىتىلگەن شارتتار ءبىرشاما ءوستى. وسى ورايدا قازاقستان ريەلتورلارىنىڭ بىرىككەن قاۋىمداستىعى پرەزيدەنتىنىڭ كەڭەسشىسى نينا لۋكيانەنكو جىلجىمايتىن مۇلىك نارىعىنىڭ دامۋىنا قاتىستى «قازاقپارات» اگەنتتىگىنە اڭگىمەلەپ بەردى.

ونىڭ سوزىنە قاراعاندا، ۇزاق ۋاقىتقا سوزىلعان وقشاۋلانۋ رەجيمى مەن جىلجىمايتىن مۇلىكپەن مامىلە جاساۋ مۇمكىندىگىنىڭ بولماۋى سالدارىنان ەلىمىزدە ءساۋىر ايىندا نەبارى 5211 مامىلە عانا جاسالدى. بۇل رەكوردتىق ەڭ تومەنگى كورسەتكىش. دەگەنمەن، قازىرگى ۋاقىتتا نوتاريالدى راسىمدەۋدى، مامىلەلەردى تىركەۋدى قوسا العاندا بارلىق سالاداعى قىزمەت ءىس جۇزىندە قالپىنا كەلدى دەسەك تە بولادى جانە مامىردا 17210 مامىلە جاسالدى.

«بۇل كورسەتكىش اي سايىنعى ستاندارتتى مامىلەلەرگە قاراعاندا ءبىرشاما تومەن. ءبىراق، بۇل مامىر ايىنىڭ العاشقى ون كۇنىندە بارلىعى ۇيىندە بولۋىنا بايلانىستى بولعان جايت»، - دەدى نينا لۋكيانەنكو.

اتاپ ايتقاندا، باسپانا الۋدى جوسپارلاپ وتىرعان تۇرعىنداردىڭ باسىم بولىگى داعدارىس كەزىندە سۇرانىس تومەندەپ، جىلجىمايتىن مۇلىك قۇنى ارزاندايدى دەپ كۇتىپ وتىرعانى جاسىرىن ەمەس. الايدا، ق ر ۇ ە م ستاتيستيكا كوميتەتى مالىمەتىنە سۇيەنسەك، 2020 -جىلعى مامىردا ونىڭ الدىڭعى ايمەن سالىستىرعاندا اباتتاندىرىلعان تۇرعىن ءۇيدى الىپ- ساتۋ باعاسى - %1، اباتتاندىرىلماعان ءۇيدى الىپ- ساتۋ باعاسى - % 0,5، جاڭا تۇرعىن ۇيلەردى ساتۋ % 0,2 ءوستى. اباتتاندىرىلعان تۇرعىن ءۇيدى جالعا الۋ تولەمى % 0,2 قىمباتتادى. اباتتاندىرىلعان تۇرعىن ءۇيدى جالعا الۋ تولەمى 1 شارشى مەترى ءۇشىن 1577 تەڭگە بولدى. وتكەن مامىر ايىندا جاڭا تۇرعىن ۇيلەردى ساتۋ باعاسى 1 شارشى مەترى ءۇشىن 297775 تەڭگەنى قۇرادى.

«رەسمي ستاتيستيكالىق مالىمەتتەرگە قاراعاندا، باسپانانىڭ ءبىر شارشى مەترىنە باعانىڭ ازداپ قىمباتتاعانى بايقالادى. ءوسىم 1 پايىزدى قۇراپ وتىر. مۇنىڭ ەشقانداي ەرەكشەلىگى جوق. بۇل بەلگىلى سەبەپتەرگە بايلانىستى مامىلەلەردىڭ ۇزاق ۋاقىت كەيىنگە شەگەرىلۋىمەن بايلانىستى. سونىمەن قاتار، جاڭا ءۇي سالۋ بارىسىندا قولدانىلاتىن ماتەريالداردىڭ 24-60 پايىزى يمپورتتالاتىندىعىن دا قاپەرگە الۋ قاجەت. ونىڭ ۇستىنە دوللار باعامى ءوستى. ال يمپورتتالاتىن ماتەريالدار دوللارمەن الىناتىندىقتان قۇرىلىس شىعىندارى دا ارتا تۇسەدى. بۇل دا باعاعا اسەرىن تيگىزەدى»، - دەدى نينا لۋكيانەنكو.

قازاقستان جىلجىمايتىن مۇلىك فەدەراتسياسىنىڭ پرەزيدەنتى ەرمەك مۇسىرەپوۆتىڭ پايىمىنشا، جاڭا تۇرعىن ۇيلەردەگى شارشى مەترلەر كارانتينگە دەيىنگى دەڭگەيدە ساقتالىپ وتىر. جاقىندا ونىڭ بۇقارالىق اقپارات قۇرالدارىندا پىكىرى جاريالانعان بولاتىن. وسى ورايدا ە. مۇسىرەپوۆ بىرنەشە اي بويى كارانتينمەن شەكتەلگەننەن كەيىن، نارىق بۇرىنعىسىنشا تۇرالاعان كۇيىندە ەكەنىن اتاپ ءوتتى.

«نارىقتا كەلىسىمشارتتار جاسالمادى. قازىرگى كەزدە مامىلە سانى بويىنشا بەلسەندىلىك جاندانادى. ءبىراق، بۇل ءۇردىس بىردەن قارقىن المايدى، شارتتار سانى بىرتىندەپ ارتا باستايدى»، - دەدى قازاقستان جىلجىمايتىن مۇلىك فەدەراتسياسىنىڭ پرەزيدەنتى.

ساراپشىنىڭ اتاپ وتۋىنشە، كەيبىر جاعدايلاردا قۇرىلىس سالاتىن كومپانيالار باسپانا قۇنىن ۇشتەن 10 پايىزعا دەيىن ارزانداتۋ بويىنشا اكسيالار جۇرگىزەدى. بۇل ءوز كەزەگىندە نارىقتا جاڭا باسپانانى ساتىپ الۋ ءۇشىن قارجىلىق جاعدايى جەتكىلىكتى الەۋەتتى ساتىپ الۋشىلار جوق ەكەنىن بايقاتادى. ەندى ستاتيستيكاعا توقتالساق، جاڭا تۇرعىن ۇيلەردى ساتۋ باعاسى 1 شارشى مەترى ءۇشىن 297775 تەڭگەنى قۇرادى. ءساۋىر ايىنان بەرى 0,2 پايىزعا ءوستى.

ەگەر بىلتىرعى جەلتوقسانمەن سالىستىرساق، بىرنەشە ايدا جاڭا باسپانانىڭ قۇنى 1,7 پايىزعا، ال ءبىر جىلدا 5,7 پايىزعا جوعارىلادى. ستاتيستيكا بويىنشا اباتتاندىرىلعان تۇرعىن ءۇيدىڭ باعاسى 1 پايىزعا ءوستى. وتكەن جىلعى جەلتوقسانعا قاراعاندا، بەس ايداعى ءوسىم 3,2 پايىز دەڭگەيىندە. مامىر ايىندا اباتتاندىرىلعان تۇرعىن ۇيلەردىڭ 1 شارشى مەترى 208148 تەڭگە شاماسىندا بولدى. ال اباتتاندىرىلماعان باسپانانىڭ 1 شارشى مەترىنىڭ باعاسى 128730 تەڭگەنى قۇرادى. ءوز كەزەگىندە قازاقستان ريەلتورلارىنىڭ بىرىككەن قاۋىمداستىعى پرەزيدەنتىنىڭ كەڭەسشىسى نينا لۋكيانەنكو نارىقتاعى جاعداي وزگەرگەنىمەن، تاڭعالارلىق وقيعالار بولمايتىنىن جەتكىزدى. وسى ورايدا باعانىڭ كۇرت تومەندەۋى نەمەسە كۇرت ءوسۋى سەكىلدى قانداي دا ءبىر ايتارلىقتاي وزگەرىستەر بايقالمايتىنىن ءسوز ەتتى.

«جىلجىمايتىن مۇلىك - ول الەمدەگى ەڭ قىمبات تاۋرالاردىڭ ءبىرى. سوندىقتان باعانىڭ جوعارى نەمەسە تومەن كورسەتكىشى نارىقتا جاسالعان شارتتار كولەمىنە بايلانىستى. باعانىڭ قۇلدىراۋىن كۇتىپ جۇرگەندەرگە تاكتيكانى وزگەرتىپ، قازىردەن باستاپ نارىقتى تىڭعىلىقتى زەرتتەۋگە كەڭەس بەرەر ەدىم. قازىرگى جاعدايدى جەتە ءتۇسىنۋ كەرەك: باسپانانى ساتۋعا اسىققاندار باعانى ءبىرشاما تومەندەتىپ، ساتىپ الاتىن ادامدى تابادى. ال باسپانا ساتىپ الۋدى جوسپارلاپ جۇرگەندەر ءتيىمدى باعاداعى جاقسى تۇرعىن ءۇي بىردەن ساتىلىپ كەتەتىنىن قاپەردە ۇستاۋى كەرەك. ەكونوميكالىق قارقىن بايالاۋلاعان كەزدە نارىقتان تۇراقسىز قۇرىلىس سالۋشىلار كەتە باستايدى، ياعني قىزىقتى جوبالار ازايا تۇسەدى»، - دەدى ساراپشى.

اۆتور: رۋسلان عابباسوۆ

سوڭعى جاڭالىقتار