باس پروكۋراتۋرا ەل تۇرعىندارىنا ۇندەۋ جاريالادى

« قۇرمەتتى ازاماتتار! 6 - ماۋسىمىنان باستاپ «قازاقستان رەسپۋبليكاسىندا بەيبىت جينالىستاردى ۇيىمداستىرۋ جانە وتكىزۋ ءتارتىبى تۋرالى» جاڭا زاڭ (بۇدان ءارى - زاڭ) قولدانىسقا ەنگىزىلەدى. جينالىستاردى، ميتينگىلەردى جانە پيكەتتەردى ۇيىمداستىرۋ جانە وتكىزۋ ءۇشىن زاڭمەن حابارلاما جاساۋ ءتارتىبى قاراستىرىلعان. ۇيىمداستىرۋشى ولاردى وتكىزۋ كۇنىنە دەيىن بەس جۇمىس كۇن بۇرىن جەرگىلىكتى اتقارۋشى ورگانعا حابارلاما بەرەدى، ول ءۇش جۇمىس كۇن ىشىندە ونى قاراۋعا ءتيىس (زاڭنىڭ 10, 11-باپتارى) . بۇل مەرزىم اياقتالعان سوڭ جاۋاپ بولماعان جاعدايدا، ۇيىمداستىرۋشى بەيبىت جينالىستى وتكىزەدى (زاڭنىڭ 11-بابى 1-تارماعىنىڭ 3-تارماقشاسى) . دەمونستراتسيالار مەن شەرۋلەر ءۇشىن كەلىسىم ءتارتىبى بەلگىلەنگەن. وتىنىشتەر وتكىزىلەتىن كۇنگە دەيىن ون جۇمىس كۇن بۇرىن بەرىلەدى، ول بويىنشا جەرگىلىكتى اتقارۋشى ورگان جەتى جۇمىس كۇن ىشىندە جاۋاپ بەرۋگە مىندەتتى (زاڭنىڭ 12, 13-باپتارى) . وسى ۋاقىت ىشىندە ۇيىمداستىرۋشى مەن جەرگىلىكتى اتقارۋشى ورگان بەيبىت جينالىستاردى قاۋىپسىز وتكىزۋ، ولارعا قاتىسۋشىلاردىڭ دەنساۋلىعىن ساقتاۋ ءۇشىن جاعدايلار جاسايدى. بۇل رەتتە بەيبىت جينالىستار ارنايى ورىنداردا وتكىزىلۋى ءتيىس (زاڭنىڭ 9-بابى) . ءدال وسى ساتتە جەرگىلىكتى وكىلدى ورگاندار وسىنداي ورىنداردى جانە دەمونستراتسيالار مەن شەرۋلەر ءۇشىن ءجۇرۋ مارشرۋتتارىن، ولاردى ماتەريالدىق- تەحنيكالىق جانە ۇيىمداستىرۋشىلىق قامتاماسىز ەتۋگە قويىلاتىن تالاپتاردى، پيكەتتەۋدى وتكىزۋگە تىيىم سالىنعان ىرگەلەس اۋماقتاردىڭ شەكارالارىن ايقىنداۋ بويىنشا ءراسىمدى جۇرگىزۋدە (زاڭنىڭ 1-بابىنىڭ 3 -تارماقشاسى، 8-بابىنىڭ 2-تارماعى) . بەيبىت جينالىستار كورسەتىلگەن ءراسىم اياقتالعاننان كەيىن ۇيىمداستىرىلۋى جانە وتكىزىلۋى مۇمكىن.

دەنساۋلىق ساقتاۋ مينيسترلىگى 2020 -جىلعى 4 - ماۋسىمدا ۇندەۋ تاراتىپ، وندا كارانتين كەزەڭىندە ەلدە بۇقارالىق ءىس- شارالاردى، ونىڭ ىشىندە ميتينگىلەردى وتكىزۋگە تىيىم سالىنعانىن كورسەتكەن. ونى ساقتاماعانى ءۇشىن اكىمشىلىك جانە قىلمىستىق جاۋاپتىلىق كوزدەلگەن. دەگەنمەن، جەكەلەگەن تۇلعالار ەل ازاماتتارىن 2020 -جىلعى 6 -ماۋسىمدا جاپپاي ميتينگىلەرگە شىعۋعا شاقىرۋدا. جاڭادان بەلگىلەنگەن ءتارتىپتى بۇزا وتىرىپ وتكىزىلەتىن جينالىستاردى ۇيىمداستىرۋ جانە ولارعا قاتىسۋ زاڭسىز بولىپ تابىلادى جانە اكىمشىلىك قۇقىق بۇزۋشىلىق تۋرالى كودەكستىڭ 488-بابى بويىنشا اكىمشىلىك جاۋاپتىلىققا اكەپ سوقتىرادى (ء تىپتى 15 تاۋلىككە قاماۋعا الۋعا دەيىن) . ەگەر بۇل ارەكەتتەر ازاماتتاردىڭ، ۇيىمداردىڭ، قوعامنىڭ نەمەسە مەملەكەتتىڭ قۇقىقتارى مەن زاڭدى مۇددەلەرىنە ەلەۋلى زيان كەلتىرۋمەن قاتار جۇرسە، قىلمىستىق جاۋاپتىلىق تۋىندايدى (ق ك- ءنىڭ 400-بابى) . وسىعان بايلانىستى، ازاماتتاردى ارانداتۋشىلىق جاساماۋعا جانە زاڭسىز جاريا اكتسيالارعا قاتىسۋدان باس تارتۋعا، بەيبىت جينالىستار ۇيىمداستىرۋ جانە وتكىزۋ كەزىندە جاڭا زاڭنىڭ ەرەجەلەرىن مۇلتىكسىز ساقتاۋعا شاقىرامىز» ، - دەلىنگەن ۇندەۋدە.