قازاقستاننىڭ كوك بايراعى قالاي ازىرلەنەدى - كاسىپورىننان رەپورتاج

قازاقستان تۋى - تاۋەلسىزدىكدىڭ اسا ماڭىزدى بەلگىلەرىنىڭ ءبىرى. اتاۋلى كۇنگە وراي قازاقپارات ءتىلشىسى مەملەكەتتىك تۋدى ازىرلەۋ جۇمىستارىمەن تانىستى. تاۋەلسىز قازاقستاننىڭ مەملەكەتتىك تۋى 1992 -جىلى رەسمي تۇردە قابىلداندى.

ونىڭ اۆتورى - تانىمال سۋرەتشى شاكەن نيازبەكوۆ. مەملەكەتتىك ءرامىز تالابىنا سايكەس، قازاقستان رەسپۋبليكاسىنىڭ مەملەكەتتىك تۋى - ورتاسىندا شۇعىلالى كۇن، ونىڭ استىندا قالىقتاپ ۇشقان قىران بەينەلەنگەن كوگىلدىر ءتۇستى تىك بۇرىشتى ماتا. تۋدىڭ سابى تۇسىندا تىك جولاق تۇرىندە ۇلتتىق ورنەك ناقىشتالعان. كۇن مەن ونىڭ ساۋلەلەرى، قىران جانە ۇلتتىق ورنەك التىن تۇستەس. تۋدىڭ ەنى مەن ۇزىندىعىنىڭ اراقاتىناسى - 1:2 بولۋى ءتيىس.

ەلوردالىق «ZOOM» كومپانياسى 9 جىلدان بەرى مەملەكەتتىك سيمۆولداردى ازىرلەۋمەن اينالىسىپ كەلەدى. كومپانيا قر مەملەكەتتىك رامىزدەرىن ازىرلەۋ بويىنشا رەسمي ليتسەنزيا العان.

« ءبىز اقوردا، پارلامەنت جانە وزگە دە مەملەكەتتىك ورگاندار مەن ەلشىلىكتەر ءۇشىن تۋ ازىرلەيمىز. ول ءۇشىن اتلاس، گاباردين، تافتا ماتەريالدارى قولدانىلادى. مۇنداي ماتالار عيمارات ىشىندە تۇراتىن تۋلاردى ازىرلەۋگە جۇمسالادى. ال دالادا، عيمارات سىرتىنا ىلىنەتىن تۋلار جالاۋعا ارنالعان توردان (فلاجنايا سەتكا) تىگىلەدى. جالاۋ تورلارى - بارلىق اۋا رايى جاعدايىنا ءتوزىمدى بولىپ كەلەدى. ال اتلاس پەن گاباردين تىعىز بولعاندىقتان، اۋا وتكىزبەيدى»، - دەپ ءتۇسىندىردى «ZOOM» جارناما اگەنتتىگىنىڭ ديرەكتورى سالتانات احمەتوۆا «قازاقپارات» تىلشىسىنە بەرگەن سۇحباتىندا.

قازاقستان تۋىنداعى بەينەلەر مىندەتتى تۇردە ەكى جاقتان باسىلۋى كەرەك. ەڭ الدىمەن تۋ سۋبليماتسيالىق قاعازدا شىعارىلادى. بەينەلەر قانىق شىعۋ ءۇشىن 300 گرادۋستىق رەجيمدە بىرىكتىرۋ جۇمىستارى جۇرگىزىلەدى. بۇل پروتسەستەردەن كەيىن اق قاعاز پارامەترلەر بويىنشا قاجەتتى تۇستەرگە اينالادى. ودان بولەك، سەحتا تۋ كەستەلەيتىن ارنايى ماشينا جۇمىس ىستەيدى.

«سونىمەن بىرگە، جان-جاعىندا شاشاعى بار بايراق جاساۋمەن دە اينالىسامىز. ونى ءتۇرلى سالتاناتتى شارالاردا، فوتوسەسسيالاردا پايدالانادى، كابينەت ىشىنە قويادى جانە تۋتۇعىرعا ىلەدى. بايراق دالادا ىلىنبەيتىن بولعاندىقتان، ونى گابارديننەن ازىرلەيمىز. ونىڭ دا ەكى جاعى بىردەي كەستەلەنۋى كەرەك»، - دەيدى كومپانيا وكىلى.

ايتا كەتەيىك، قازاقستانداعى ەڭ ۇلكەن تۋدىڭ كولەمى - 15:30، ول نۇر-سۇلتان قالاسىندا «اتامەكەن» ەتنو- مەموريالدى كەشەنىنىڭ اۋماعىنا ورنالاسقان جانە بۇل تۋدى دا «ZOOM» كومپانياسى ازىرلەگەن.

«ەلىمىزدەگى ەڭ ۇلكەن تۋ جالاۋعا ارنالعان تور ماتادان تىگىلگەن. ونى باسىپ، تىگۋگە، جيناقتاۋعا ءبىر اي ۋاقىت جۇمسالدى. دايىن بولعان سوڭ قاسىمىزداعى №53-مەكتەپتىڭ وقۋشىلارى تۋدى جايىپ كوردى. ولار قازاقستاننىڭ ەڭ ۇلكەن تۋىن ۇستاپ، بويلارىن ەرەكشە ماقتانىش سەزىمى كەرنەگەنىن ايتتى. وسىلايشا، ءبىز مەملەكەتىمىزدىڭ كۇش- قۋاتىن كورسەتكىمىز كەلەدى»، - دەدى سالتانات احمەتوۆا.

ال ستاندارتتى 1:2 كولەمىندەگى تۋدى ازىرلەۋگە شامامەن ءبىر كۇن قاجەت. 1:2 كولەمىندەگى كابينەتتىك تۋلار شامامەن 25 مىڭ تەڭگەگە، توردان جاسالعان تۋلار - 15 مىڭ تەڭگەگە باعالانادى. «ءبىز نارىقتا 16 جىل جۇمىس ىستەپ كەلەمىز جانە سوڭعى 9 جىلدا قازاقستان تۋىنىڭ نەگىزگى جەتكىزۋشىسى اتاندىق. بارلىق وڭىرلەرمەن جانە ەلدەرمەن جۇمىس ىستەيمىز. وتكەن جىلى گەرمانياعا، برازيلياعا جانە قاتارداعى ەلشىلىكتەرگە كوك تۋىمىزدى جىبەردىك»، - دەدى ول. سونىمەن بىرگە، كومپانيا ق ر سىرتقى ىستەر مينيسترلىگىمەن جانە نۇر-سۇلتانداعى ەلشىلىكتەرمەن تىعىز جۇمىس ىستەيدى.

«قازاقستانعا كەلگەن ءاربىر شەتەلدىك قوناق ءوز تۋىنىڭ بارلىق ستاندارتقا سايكەس جاسالعانىن كورۋى كەرەك. ءبىزدىڭ باستى ماقساتىمىز - وسى. ءار ەلدىڭ تۋىنا بەلگىلى ءبىر ستاندارتتار قويىلادى. قازىر، ماسەلەن پورتۋگاليانىڭ تۋىن ازىرلەپ جاتىرمىز. مۇندا دا پورتۋگاليا تۋىنىڭ بارلىق ەرەكشەلىكتەرىن، قويىلاتىن تالاپتارىن زەرتتەدىك. وڭتۇستىك كورەيا، ا ق ش، جاپونيا تۋلارىن ازىرلەۋ وتە قيىن، وندا ەسكەرەتىن دۇنيە كوپ. مىسالى، جاپونيا تۋىنىڭ ءتۇسى ەل اۋماعىندا ءبىر تۇستە، شەكارا سىرتىندا - باسقا تۇستە بولادى. وتكەن جىلى 80 مەملەكەت وكىلدەرى قاتىسقان ۇلكەن فورۋم ءوتتى. ءبىز بارلىق ەلدىڭ تۋلارىن ازىرلەۋگە كومەكتەستىك. سوندا ءبىر مەملەكەت وكىلى ءوز تۋىنىڭ ساپاسىن ۇناتىپ، وزىمەن بىرگە الىپ كەتتى. ءبىز ءوز جۇمىستارىمىزبەن ماقتانامىز جانە مەملەكەتتىك رامىزدەردىڭ بارلىق تالاپقا ساي ازىرلەۋگە تىرىسامىز»، - دەدى س. احمەتوۆا.

سونىمەن بىرگە، س. احمەتوۆا تۋعا دۇرىس كۇتىم جاساۋ تاسىلدەرىن ايتىپ بەردى.

«سىرتقا ارنالعان، توردان تىگىلگەن تۋلار قاتتى جەل، داۋىل سىندى تابيعي قۇبىلىستار بولماسا، ۇزاققا شىداۋى ءتيىس. كۇننەن دە بوياۋىن وزگەرتە قويمايدى. ونى كورسەتىلگەن تەمپەراتۋرادا كىر جۋاتىن ماشينادا جۋۋعا بولادى. گاباردين، تافتا تۋلارى دا ءدال سولاي، جۋىپ- كەپتىرىپ، ۇتىكتەۋگە بولادى. ءار بۇيىمدا ءبىزدىڭ ليتسەنزيامىز كورسەتىلەدى، وندا تۋدى جۋۋ، ۇتىكتەۋ نۇسقاۋلىعى، كولەمى، شىعارىلعان مەرزىمى جازىلعان»، - دەدى سالتانات احمەتوۆا.

اۆتور: ايجان سەرىكجان قىزى