نۇر-سۇلتاندا اۆتوبۋس جۇرگىزۋشىسى جولاۋشىنى قۇتقارىپ قالدى

بۇل تۋرالى كۋاگەر Instagram جەلىسىندەگى zhaloby_astana پاراقشاسىندا جازعان. وقيعا 2-ماۋسىمدا بولعان.

«داستان» ايالداماسىندا جولاۋشىلار اۆتوبۋسقا كىرىپ كەلە جاتقان. ءبىر كەزدە تارس ەتە ءتۇستى. جولاۋشىلار شۋلاپ كەتتى دە سالونعا قاراسام ايەل ادام جەردە جاتىر. ول تۇرشىگىپ، دىرىلدەي باستاعان سوڭ دەم الا المادى. مەن مۇنداي جاعدايدا نە ىستەۋ كەرەگىن ءبىلدىم. ونى CTS كۋرسى كەزىندە ۇيرەنگەنبىز. ول ءتىلىن جۇتىپ قويماۋى كەرەك، دەرەۋ شەشىم قابىلداۋ كەرەك بولدى. ول ءتىلىن جۇتىپ قويماۋى ءۇشىن اۋزىن اشىپ، ءتىلىن شىعاردىم. ايەل ادام ءوز-وزىنە كەلدى، ءبىراق ءسال شوك بولدى. وعان سۋ بەرىپ، بەتىن شايدىق«، - دەيدى اۆتوبۋس جۇرگىزۋشىسى ەربول ەسكەندىروۆ.

جۇرگىزۋشى مەن جولاۋشىلار ايەل ادامنىڭ زاتتارىن جيناستىرىپ، جەدەل جاردەم كۇتكەن.

«جەدەل جاردەم كەلىپ، ونى الىپ كەتتى. شامامەن 15 مينۋتتاي كۇتتىك. ءبارى جاقسى اياقتالدى. جولاۋشىلاردى امان-ەسەن جەتكىزۋ - ءبىزدىڭ مىندەتىمىز. مەنىڭ ورنىمدا كەز كەلگەن ادام سولاي ىستەيتىن ەدى«، - دەيدى ەر ادام.

ەربول ەسكەندىروۆتىڭ جاسى 40 تا. نۇر-سۇلتاندا اۆتوبۋس جۇرگىزىپ جۇرگەنىنە بەس جىلدان اسقان.