بۇل شارالاردان ەشقانداي ناتيجە جوق: بەردىبەك ساپاربايەۆ وڭىردەگى اسسامبلەيانىڭ جۇمىسىن سىنادى

باسقوسۋ بارىسىندا جامبىل وبلىسى ق ح ا ءتوراعاسىنىڭ ورىنباسارى، حاتشىلىق مەڭگەرۋشىسى مارجان قوجايەۆا ءوز بايانداماسىندا بيىل 21 مىڭ ادامنىڭ قاتىسۋىمەن 202 ءىس-شارا ۇيىمداستىرىلعانىن جەتكىزدى.

«بۇل شارالاردىڭ ناتيجەسى قايدا؟ ەشقانداي وڭ وزگەرىستەردى بايقامادىم. ءبارى سول قالپىندا. تۇرمىستىق جانجالدارعا ۇلتارالىق سيپات بەرۋگە دايىن ادامدار ءالى دە كەزدەسەدى. بۇل جەرگىلىكتى جەردە ءتيىستى جۇمىس ءوز دەڭگەيىندە جۇرگىزىلىپ جاتقان جوق دەگەن ءسوز»، - دەدى وبلىس اكىمى.

ول «قوعامدىق كەلىسىم» ك م م مەن انالار كەڭەسىنىڭ قىزمەتىنىڭ ناتيجەسىزدىگىن العا تارتتى.

«قوعامدىق كەلىسىم» ك م م شتاتىندا 40 ادام بار. ولاردىڭ نەمەن اينالىسىپ جاتقانى تۇسىنىكسىز. ولار قاراپايىم ءىس-شارالاردى ۇيىمداستىرۋ، سانى كۇن سايىن كوبەيىپ وتىرعان مادەنيەت جانە سپورت نىساندارىن ءتيىمدى پايدالانۋ بويىنشا ارەكەت ەتپەيدى. بۇل جۇمىستار ءوز دەڭگەيىندە ورىندالار بولسا ول ۇلتارالىق كەلىسىمدى نىعايتۋ باعىتىنداعى ءساتتى قادامداردىڭ ءبىرى بولار ەدى»، - دەدى بەردىبەك ساپاربايەۆ.

سونداي-اق، جيىندا انالار كەڭەسى ءوز مىندەتىن تولىق ورىنداي الماي وتىرعانى، اعا بۋىننىڭ بالا تاربيەسىنە اتسالىسپايتىنى ايتىلدى.

بەردىبەك ساپاربايەۆ اۋىلداردا تۇراقتى تۇردە ساۋالناما جۇرگىزىپ، تۇرعىنداردى قانداي ماسەلەلەر تولعاندىراتىنىن انىقتاۋدى تاپسىردى.

ءوز كەزەگىندە ق ح ا حاتشىلىعىنىڭ جانە «قوعامدىق كەلىسىم» ك م م قۇرىلىمى مەن فۋنكسيالارى قايتا قارالادى.

كەڭەس بارىسىندا ەتنومادەني بىرلەستىكتەردىڭ وكىلدەرى دە ءوز ويلارىن ورتاعا سالدى. «ۆىنحۋا» دۇنگەن قاۋىمداستىعىنىڭ ءتورايىمى ايشا يدىبو ەتنومادەني بىرلەستىكتەر ۇلتارالىق كەلىسىمدى نىعايتۋعا جانە ۇلتتىق قۇندىلىقتاردى ناسيحاتتاۋعا ءوز ۇلەسىن قوسۋعا تىرىسىپ جاتقاندىعىن تىلگە تيەك ەتتى. «ۆىنحۋا» قاۋىمداستىعىنىڭ جاستار قاناتىنىڭ مۇشەلەرى، دۇنگەن ۇلتىنىڭ 175 پەداگوگى مەملەكەتتىك ءتىلدى مەڭگەرگەن. جاڭا وقۋ جىلىنان باستاپ بارلىق 1-سىنىپ وقۋشىلارى مەن بالاباقشالارداعى وقىتۋ مەملەكەتتىك تىلدە جۇرگىزىلمەك.

بەردىبەك ساپاربايەۆ دۇنگەن قاۋىمىنىڭ وكىلدەرىنە ماقتاارال حالقىنا كورسەتكەن كومەگى ءۇشىن العىس ايتتى.

سونداي-اق، «احىسكا» تۇرىك ەتنومادەني ورتالىعى فيليالىنىڭ ءتوراعاسى ماحمۇتجون داۆريشەۆ، «باربانگ» كۇردتەر قاۋىمداستىعى فيليالىنىڭ ءتوراعاسى لاتيف ايداروۆ ءوز ويلارىن ءبىلدىردى.

«حالىقتىڭ ءال-اۋقاتى ەكونوميكاعا، ەكونوميكانىڭ دامۋى - تۇراقتىلىققا، ال تۇراقتىلىق ەلىمىزدە تۇراتىن بارلىق ادامداردىڭ ءوزارا كەلىسىمى مەن تاتۋلىعىنا بايلانىستى. ءبىز بىرگە بولساق، تالاي اسۋلاردى باعىندىرامىز، قازاقتار «بىرلىك بار جەردە - تىرلىك بار» دەپ بەكەر ايتپايدى. ءبىز ءارقاشان تاتۋلىق پەن بىرلىكتە ءومىر سۇردىك. جىلدار بويى قالىپتاسقان دۇنيەدەن ءبىر ساتتە ايىرىلىپ قالۋعا جول بەرىلمەيدى. مۇنداي وقيعالار قايتالانباس ءۇشىن اقساقالداردىڭ تۇتاس ءبىر ۇلتتىڭ تاربيەسىنە جاۋاپكەرشىلىكپەن قارايتىن اسىل ءداستۇرىمىزدى قايتا جانداندىرۋ قاجەت. قازاقستاندا جۇزدەن استام ۇلتتار مەن ۇلىستار تۇرادى. ءبىزدىڭ ەلىمىز - دوستىق «زەرتحاناسىنا» اينالعان. تاتۋلىق پەن ىنتىماقتى ساقتاۋ - ءبىزدىڭ وسكەلەڭ ۇرپاق الدىنداعى مىندەتىمىز»، - دەپ تۇيىندەدى وبلىس اكىمى.