كوكجايلاۋدا دجيپپەن جۇرگەن پوليتسەيلەرگە قاتىستى دەپارتامەنت تۇسىنىك بەردى

الەۋمەتتىك جەلىلەردە كوكجايلاۋعا دجيپپەن كەلگەن پوليتسەيلەردىڭ ۆيدەولارى مەن سۋرەتتەرى تاراپ، جەلىدە قىزۋ تالقىلاندى. الماتى قالالىق پ د باسپا ءسوز قىزمەتىنىڭ حابارلاۋىنشا، بەينەجازبا بوستاندىق اۋداندىق پوليتسيا باسقارماسى جەرگىلىكتى پوليتسيا قىزمەتى ءبولىمىنىڭ قىزمەتكەرلەرى ت ج د جانە ىلە- الاتاۋ مەملەكەتتىك ۇلتتىق تابيعي پاركىنىڭ وكىلدەرىمەن بىرلەسىپ تاۋلى جەرلەردە دەمالۋشىلارعا تابيعاتتى قورعاۋ، كارانتين جانە سانيتارلىق نورمالاردى ساقتاۋدى ءتۇسىندىرۋ ءۇشىن جۇرگىزىلگەن رەيد بارىسىندا تۇسىرىلگەن.

«30 - مامىر كۇنى تۇسكى ساعات 11:00-دە ءبىز تابيعاتتى قورعاۋ پوليتسياسى قىزمەتكەرلەرىمەن بىرگە كوكجايلاۋ اۋماعىندا كەلۋشىلەرمەن پروفيلاكتيكالىق جۇمىس جۇرگىزدىك. پاترۋل كولىگى جوعارى كوتەرىلە الماعاندىقتان، مەنىڭ جەكە Toyota Land Cruiser كولىگىممەن شىعۋعا تۋرا كەلدى، ال پاترۋلدىك كولىكتى ەكوپوستا قالدىرىپ كەتتىك. ىلە- الاتاۋ م ۇ ت پ اۋماعىندا وت جاعۋ، زاڭسىز اڭ اۋلاۋ سىندى ءتارتىپ بۇزۋشىلىقتاردى انىقتاۋعا كومەكتەسىپ جۇرگەن پوليتسياعا راقمەت»، - دەدى ىلە- الاتاۋ مەملەكەتتىك ۇلتتىق تابيعي پاركىنىڭ ينسپەكتورى الەكسەي پوتسەنكو.

پوليتسەيلەردىڭ ايتۋىنشا، تاۋلى جەرلەردە قالالىق رەيد 29 - مامىردا باستالعان، ول بىرنەشە كەزەڭمەن وتەدى.

اۆتور: الما مۇقانوۆا