بۇلدىرشىندەر شەتەلدىك مۋلتسەريالداردى ەندى قازاق تىلىندە كورەتىن بولدى

None
None
نۇر-سۇلتان. قازاقپارات - «قازاقستان» تەلەراديوكورپوراتسياسىنا قاراستى «Balapan» تەلەارناسى ۇزدىك شەتەلدىك مۋلتحيكايالاردىڭ تەلەقۇقىعىمەن قوسا، ينتەرنەت قۇقىقتارىن ساتىپ الۋ باستاماسىن العاش بولىپ جۇزەگە اسىردى، دەپ حابارلايدى قازاقپارات «قازاقستان» ر ت ر ك» ا ق-نىڭ باسپا ءسوز قىزمەتىنە سىلتەمە جاساپ.

باسپا ءسوز مالىمەتتەرىنە قاراعاندا، الداعى ۋاقىتتا ارنادان كورسەتىلەتىن شەتەلدىك انيماتسيالىق جوبالار YouTube-تاعى «BalapanTV» كانالىنا سالىنادى. دەمەك، بۇل - مۋلتسەريالداردى بالالار الەمنىڭ كەز كەلگەن جەرىنەن، قالاعان ۋاقىتىندا تاماشالاي الادى دەگەن ءسوز.

ايتا كەتەرلىگى، بۇعان دەيىن شەتەلدىك جوبالاردىڭ دۋبلياجدالعان نۇسقاسىن الەۋمەتتىك جەلىلەرگە سالۋ قۇقىعى ەلىمىزدەگى ەشبىر ارنادا بولماعان.

«وسى كۇنگە دەيىن قازاقستاندىق بالالار الەمنىڭ وزىق مۋلتفيلمدەرىن YouTube پلاتفورماسىنان باسقا تىلدەردە كورىپ كەلسە، ەندى انا تىلىمىزدە تاماشالاۋ مۇمكىندىگىنە قول جەتكىزىپ وتىر. بۇل - قازاق ءتىلىنىڭ دامۋىنا ىقپال ەتەتىن ءارى ينتەرنەت جەلىسىندەگى قازاق تىلىندەگى ساپالى بالالار كونتەنتىنىڭ كوبەيۋىنە سەرپىن بەرەتىن ماڭىزدى باستاما. بۇگىندە تەلەارنانىڭ You tube-تەگى جازىلۋشىلارىنىڭ سانى ءبىر ميلليونعا جۋىقتادى»، - دەلىنگەن حابارلامادا.

1-ماۋسىم - حالىقارالىق بالالاردى قورعاۋ كۇنىنە وراي، بۇلدىرشىندەرگە تارتۋ رەتىندە YouTube-تاعى «BalapanTV» كانالىنا «قۇراستىرۋشى لەۆا» مۋلتسەريالىنىڭ 66 ءبولىمى سالىنادى.

الداعى ۋاقىتتا YouTube-ارنا «ۆيسپەر-1»، «ۆيسپەر-2»، «%100 Wolf» ، «اڭدار دوستىعى»، «كاپيتان شاركي»، «كۋنگ- فۋ قويان: وت ءامىرشىسى»، «قانات قاق»، «اياز اتانى قۇتقارۋ»، «كەمەدەگى وقيعا» سىندى انيماتسيالىق جوبالارمەن تولىقتىرىلادى.

بۇدان بولەك، «Balapan» تەلەارناسى ءتول انيماتسيانى دامىتۋ ىسىنە دە كوڭىل ءبولىپ كەلەدى.

ماسەلەن، تەلەارنا تاپسىرىسىمەن 2018 -جىلى 10، 2019 -جىلى 14 وتاندىق مۋلتسەريال جاسالسا، 2020 -جىلى كىشكەنتاي كورەرمەندەرگە 20 جوبا جول تارتپاق. ەفيردەن وتكەن بارلىق جوبالاردى ارنانىڭ YouTube كانالىنان كورۋگە بولادى.

سوڭعى جاڭالىقتار