قازاقستان ءبىرىنشى كەزەكتە قاي ەلدەرمەن اۋە قاتىناسىن اشۋدى كوزدەپ وتىر؟
«قازاقستان اۋماعىندا كوروناۆيرۋس ينفەكسياسى تارالۋىنىڭ الدىن الۋ بويىنشا ۆەدومستۆوارالىق كوميسسيانىڭ وتىرىسىندا سىرتقى ىستەر مينيسترلىگى مەن دەنساۋلىق ساقتاۋ مينيسترلىگىنە بىرلەسە وتىرىپ، بىرنەشە حالىقارالىق اۋە باعىتتارىن قايتا اشۋ بويىنشا جۇمىس جۇرگىزۋگە تاپسىرما بەرىلدى. سونىڭ ىشىندە ءبىرىنشى كەزەڭدە COVID-19 بويىنشا ەپيدەميولوگيالىق جاعدايىنىڭ كلاسسيفيكاتسيالىق دەڭگەيىنە سايكەس، وڭتۇستىك كورەيا، قىتاي جانە ازەربايجان كىردى. ءبىز اتالعان مەملەكەتتەردىڭ اۆياتسيالىق باسقارمالارىمەن اۋە رەيستەرىن جانداندىرۋ مۇمكىندىگىن ەندى پىسىقتاۋدى باستاپ جاتىرمىز»، - دەدى ت. لاستايەۆ «حابار 24» ارناسىنداعى بريفينگتە.
ال ەكىنشى كەزەڭدە ەپيدەميولوگيالىق قاۋىپسىزدىك دەڭگەيىنە بايلانىستى تۇركيا، ب ا ءا، گەرمانيا، تايلاند جانە چەحيا قاراستىرىلادى.
«اتاپ ءوتۋ كەرەك، بۇل رەيستەر ەرتەڭنەن باستاپ اشىلمايدى. ولار ەپيدەميولوگيالىق جاعدايعا بايلانىستى جانە بارلىق ينستانسيالارمەن كەلىسۋ دارەجەسىنە قاراي جاندانادى. رەيستەردىڭ ناقتى اشىلۋى كۇنى تۋرالى قوسىمشا حابارلايمىز»، - دەدى تالعات لاستايەۆ.
www.24.kz